Almaty qalasynyń ákimi Darhan Satybaldy Jetisý aýdanynda birqatar ózekti másele talqylanǵan jumys jiynyn ótkizdi. Keńeske aýdan ákimdigi, salalyq basqarmalar, kommýnaldyq qyzmetter men tiisti mekemelerdiń ókilderi qatysty.
Kún tártibindegi basty máselelerdiń biri Soltústik ainalma jol boiyndaǵy ruqsatsyz saýda oryndary boldy. Atap aitqanda, osy jol men Jumabaev kóshesiniń boiynan beibereket saýda núkteleri kóptep anyqtalǵan. Aýdandyq politsiia ókilderiniń málimetinshe, biyl jyl basynan beri osy fakti boiynsha 756 ákimshilik hattama toltyrylyp, jalpy somasy 4 million teńge kóleminde aiyppul salynǵan. Bul baǵyttaǵy reidtik sharalar jalǵasyp keledi.
Jiyn barysynda bazar aýmaqtaryndaǵy órt qaýipsizdigi de jeke qaraldy. 2022 jyldyń qarashasynan beri bul aýmaqta birneshe órt oqiǵasy tirkelgen. Oǵan elektr symdarynyń qysqa tuiyqtalýy, alǵashqy órt sóndirý quraldarynyń bolmaýy jáne qasaqana órt qoiý sebep bolǵan. Qalalyq tótenshe jaǵdailar departamentiniń ókilderi nysan ielerine eskertý únemi tabystalatynyn, al zańbuzýshylyqtar boiynsha materialdar sotqa joldanatynyn habarlady.
«Eger jaǵdai ózgermei, nátije shyqpasa, onda budan da qatań sharalar qabyldanýǵa tiis», – dedi Almaty ákimi TJD ókilderine qarata sóilegen sózinde.
Keńeste injenerlik jelilerdiń qurylysy, olardy kommýnaldyq menshikke ótkizý, jol jóndeý jumystary, sondai-aq «Halyq qatysatyn biýdjet» baǵdarlamasy aiasynda júzege asyrylyp jatqan jobalardyń sapasy sóz boldy. Sonymen qatar, Jetisý aýdanyndaǵy densaýlyq saqtaý jáne bilim berý mekemeleriniń jai-kúii talqylandy.
«Eń bastysy, jaryq, sý, gaz sekildi ár adam kúndelikti tutynatyn negizgi qajettilikterden eshkim tapshylyq kórmeýi kerek. Sondyqtan birde-bir joba sozylyp ketpeýge tiis. Eger bir isti qolǵa alsańyzdar, sońyna deiin jetkizińizder. Barlyq joba 1 qyrkúiekke deiin aiaqtalýy qajet», – dedi Darhan Satybaldy.
Almaty ákimi jiyn aiasynda Jetisý aýdanynyń turǵyndaryn qabyldap, olardy tolǵandyrǵan túitkilderdi tyńdady. Atap aitqanda, turǵyn úi qoryn jańǵyrtý, jer telimine jáne Ýssýriiskaia kóshesindegi jeke sektordy ortalyq káriz júiesine qosý jaiy talqylandy. Árbir ótinish boiynsha naqty jaýap berilip, sheshý joldary men oryndalý merzimi belgilendi.
