Almaty qalasynyń ákimi Darhan Satybaldy jumys saparymen «Raiymbek batyr kesenesi» memorialdyq kesheniniń qurylys alańyna bardy. Joba tarihi murany saqtaýǵa jáne Qazaqstannyń kórnekti qolbasshysyna arnalǵan zamanaýi mýzei keńistigin jańartýǵa arnalǵan,- dep habarlaidy Dalanews.kz
Qala basshysy qurylys-montaj jumystaryn qarap, aýmaqty abattandyrý josparlarymen tanysty. Keshende batyrlar murajaiy, bulaq kózi, ziiarat etýge kelgenderge arnalǵan úi-jailar, ákimshilik ǵimaraty jáne qurbandyq shalý oryndary bolady. Qurylys aiaqtalǵannan keiin nysandy mýzei retinde kópshilikke usyný úshin ǵylymi tujyrymdama ázirlendi, eksponattar qoryn qalyptastyrý, onyń ishinde XVIII ǵasyrdaǵy jaýyngerlik jabdyqtardy qaita qurý júrgizilýde.
Darhan Satybaldy jobanyń barlyq kezeńderin sapaly ári jedel oryndaýdyń mańyzdylyǵyn atap ótti.
«Jyl sońyna deiin mýzei ǵimaratynyń qurylysyn jáne negizgi abattandyrý jumystaryn aiaqtaý qajet. Materialdar sapaly, al jumys ýaqytynda oryndalýǵa tiis. Kelesi jyldyń qańtarynan bastap ekspozitsiiany qurýdy bastaǵan jón. 2026 jyldyń mamyr aiynda kelýshiler úshin murajaidy ashý kerek», - dedi ákim.
Raiymbek batyr kesenesi jalpyulttyq mańyzy bar nysan jáne Qazaqstannyń kieli jerleriniń kartasyna engizilgen. Qurylys-montaj jumystary aiaqtalǵan soń keshendi mýzeige ainaldyryp, batyrdyń ómiri men erligi týraly baiandaityn zamanaýi ekspozitsiia jasaý josparlanyp otyr.
Eske salaiyq, Raiymbek batyr kesenesi 2017 jyly Almaty qalasynyń kommýnaldyq menshigine berilip, 2018 jyly «Almaty qalasynyń murajailar birlestigi» jedel basqarmasynyń qaraýyna ótken edi. Joba bastalǵan sátten bastap izdestirý, jobalaý-smetalyq qujattamany túzetý jáne baiqaý ótkizý rásimderi júrgizildi. Qurylys-montaj jumystary 2025 jyldyń mamyr aiynda bastaldy. Jumystardy aiaqtaý jáne mýzeidiń ashylýy 2026 jyldyń mamyryna josparlanǵan bolatyn.
