الماتى قالاسىنىڭ اكىمى دارحان ساتىبالدى جۇمىس ساپارىمەن «رايىمبەك باتىر كەسەنەسى» مەموريالدىق كەشەنىنىڭ قۇرىلىس الاڭىنا باردى. جوبا تاريحي مۇرانى ساقتاۋعا جانە قازاقستاننىڭ كورنەكتى قولباسشىسىنا ارنالعان زاماناۋي مۋزەي كەڭىستىگىن جاڭارتۋعا ارنالعان،- دەپ حابارلايدى Dalanews.kz
قالا باسشىسى قۇرىلىس-مونتاج جۇمىستارىن قاراپ، اۋماقتى اباتتاندىرۋ جوسپارلارىمەن تانىستى. كەشەندە باتىرلار مۇراجايى، بۇلاق كوزى، زيارات ەتۋگە كەلگەندەرگە ارنالعان ءۇي-جايلار، اكىمشىلىك عيماراتى جانە قۇرباندىق شالۋ ورىندارى بولادى. قۇرىلىس اياقتالعاننان كەيىن نىساندى مۋزەي رەتىندە كوپشىلىككە ۇسىنۋ ءۇشىن عىلىمي تۇجىرىمداما ازىرلەندى، ەكسپوناتتار قورىن قالىپتاستىرۋ، ونىڭ ىشىندە XVIII عاسىرداعى جاۋىنگەرلىك جابدىقتاردى قايتا قۇرۋ جۇرگىزىلۋدە.
دارحان ساتىبالدى جوبانىڭ بارلىق كەزەڭدەرىن ساپالى ءارى جەدەل ورىنداۋدىڭ ماڭىزدىلىعىن اتاپ ءوتتى.
«جىل سوڭىنا دەيىن مۋزەي عيماراتىنىڭ قۇرىلىسىن جانە نەگىزگى اباتتاندىرۋ جۇمىستارىن اياقتاۋ قاجەت. ماتەريالدار ساپالى، ال جۇمىس ۋاقىتىندا ورىندالۋعا ءتيىس. كەلەسى جىلدىڭ قاڭتارىنان باستاپ ەكسپوزيسيانى قۇرۋدى باستاعان ءجون. 2026 جىلدىڭ مامىر ايىندا كەلۋشىلەر ءۇشىن مۇراجايدى اشۋ كەرەك»، - دەدى اكىم.
رايىمبەك باتىر كەسەنەسى جالپىۇلتتىق ماڭىزى بار نىسان جانە قازاقستاننىڭ كيەلى جەرلەرىنىڭ كارتاسىنا ەنگىزىلگەن. قۇرىلىس-مونتاج جۇمىستارى اياقتالعان سوڭ كەشەندى مۋزەيگە اينالدىرىپ، باتىردىڭ ءومىرى مەن ەرلىگى تۋرالى باياندايتىن زاماناۋي ەكسپوزيسيا جاساۋ جوسپارلانىپ وتىر.
ەسكە سالايىق، رايىمبەك باتىر كەسەنەسى 2017 جىلى الماتى قالاسىنىڭ كوممۋنالدىق مەنشىگىنە بەرىلىپ، 2018 جىلى «الماتى قالاسىنىڭ مۇراجايلار بىرلەستىگى» جەدەل باسقارماسىنىڭ قاراۋىنا وتكەن ەدى. جوبا باستالعان ساتتەن باستاپ ىزدەستىرۋ، جوبالاۋ-سمەتالىق قۇجاتتامانى تۇزەتۋ جانە بايقاۋ وتكىزۋ راسىمدەرى جۇرگىزىلدى. قۇرىلىس-مونتاج جۇمىستارى 2025 جىلدىڭ مامىر ايىندا باستالدى. جۇمىستاردى اياقتاۋ جانە مۋزەيدىڭ اشىلۋى 2026 جىلدىڭ مامىرىنا جوسپارلانعان بولاتىن.
