Almaty ákimi Darhan Satybaldy Alataý aýdanyndaǵy «Nurkent» turǵyn úi kesheniniń turǵyndarymen júzdesti. Kezdesý barysynda qala turǵyndary aýyzsýdyń tapshylyǵy, elektr qýatynyń jii óshýi, sondai-aq balabaqsha men mekteptegi oryn jetispeýshiligi jaiyn kóterdi,- dep habarlaidy Dalanews.kz
Sýdyń azaiyp ketýi Alataý aýdanynyń batys bóliginde qarqyndy júrgizilip jatqan turǵyn úi qurylystarymen bailanysty. Qazirgi tańda «Nurkent» kesheni aýyz sýdy «Qalqaman» sorǵy beketinen alady (táýligine 10 600 tekshe metr), alaida tutyný kólemi shegine taiap qalǵandyqtan, jaz mezgilinde sý qysymy tómendep, sý berý jii toqtaidy. Bul túitkildi sheshý úshin kórshiles turǵyn úi keshenindegi sorǵy beketi qalpyna keltiriledi. Qalalyq energetika jáne sýmen jabdyqtaý basqarmasynyń málimetinshe, qurylys kompaniiasy nysanǵa kúrdeli jóndeý júrgizip, turǵyndardy úzdiksiz aýyzsýmen qamtýǵa múmkindik jasaidy. Jóndeý jumystary 25 qyrkúiekke deiin aiaqtalyp, nysan «Almaty Sý» ShJQ MKK balansyna beriledi.
Elektr qýatymen qamtýdyń úzilýi jeti transformatorlyq qosalqy stantsiianyń «Alataý Jaryq Kompaniiasy» AQ balansyna berilmeýinen týyndaǵan. Ákim bul máseleni jedel sheship, turaqty elektrmen qamtýdy qamtamasyz etýdi tapsyrdy.
Turǵyndar retsiz qoiylǵan avtokólikter men tazalyqtyń saqtalmaýyna qatysty shaǵym aitty. Darhan Satybaldynyń aitýynsha, atalǵan avtoturaq ornalasqan jer telimi memleket menshigine qaitarylyp, onyń ornyna jańa balabaqsha boi kóteredi. Sondai-aq, turǵyndar aýlalardyń jóndelmegendigi men ruqsatsyz qoqys tastaityn oryndardyń baryn jetkizdi. Ákim aýdan ákimdigine aýlalardy abattandyryp, sanitarlyq jaǵdaidy turaqty baqylaýda ustaýdy tapsyrdy.
«Búgin aitylǵan barlyq másele hattamaǵa engizildi. Oryndalýyn ózim qadaǵalaimyn. 25 qyrkúiekke deiin jóndelgen sorǵy beketi «Almaty Sý» balansyna, al elektr jelileri «Alataý Jaryq Kompaniiasynyń» ieligine beriledi. Aýla abattandyrylyp, balabaqsha salynady. Qalǵan máseleler de jumys tártibimen sheshimin tabady», – dedi Darhan Satybaldy.
