Almaty ákimi Darhan Satybaldy Bostandyq aýdanynyń basshysymen birge jiyn ótkizip, óńirdiń áleýmettik-ekonomikalyq damýy, infraqurylym jáne áleýmettik saladaǵy túitkilderdi talqylandy,- dep habarlaidy Dalanews.kz
Aýdan biylǵy alǵashqy jartyjyldyqty jospardan joǵary kórsetkishpen aiaqtady. Jyl basynan aýdan biýdjetine 708,8 milliard teńge tústi. Bul josparlanǵan 663,5 milliard teńgeden edáýir kóp. Degenmen, shahar basshysy oń nátije qala ómiriniń sapasyn arttyrýǵa degen nazardy báseńdetpeýi tiis ekenin eskertti.
Ákim apparaty júrgizgen taldaý birqatar júieli máseleni ashyp kórsetti. Aýyzsý, jol jáne áleýmettik infraqurylym siiaqty basty qajettilikterge qarjy jetispeidi, halyqpen bailanys nashar. Turǵyndardyń ótinishi atústi qaralady, bul jergilikti bilikke degen senimdi seldiretedi.
Keibir mektep pen meditsina mekemenniń jai-kúii, áleýmettik nysandardy jańartý merziminiń sozylýy, kóshkin qaýpi bar aýmaqtar men órtke qarsy sý júiesin qamtityn keshendi qaýipsizdik sharalarynyń bolmaýy da alańdatady Al qylmys deńgeiiniń ósýi, sonyń ishinde kámeletke tolmaǵandar arasyndaǵy zańbuzýshylyqtar, politsiianyń aldyn alý sharalarynyń álsiz ekenin ańǵartady.
Darhan Satybaldy jaýapty tulǵalarǵa anyqtalǵan máselelerdi jedel sheship, nátijesin qysqa merzimde baiandaýdy tapsyrdy.
«Apparatqa tapsyrma berdim. Endi apta saiyn joldardyń, trotýarlardyń, abattandyrý men injenerlik jelilerdiń jaǵdaiyn baqylap otyramyz», – dedi Almaty ákimi.
Darhan Satybaldynyń aitýynsha, qalalyq qyzmettiń árdaiym alda júrip, máseleniń aldyn alý kerek.
«Sizder birdeńeniń buzylǵanyn kútip otyrasyzdar, al ol buzylǵan soń: jobalyq-smetalyq qujattama daiyndaimyz, oǵan taǵy bir jyl ketedi deisizder. Sodan keiin tender ótkizesizder, al merdiger jaýapsyz bolyp shyqsa, jumys taǵy da toqtaidy. Al siz aýdan ákimi bolsańyz, sheshimin tabýyńyz kerek», – dedi ol Bostandyq aýdanynyń ákimine.
Qala basshysy biýdjet qarajatyn únemdi paidalaný qajettigin jáne jumys josparlaý kezinde aldyn alý sharalary men infraqurylymdy ýaqytyly jańartýdy eskerý kerek ekenin de basa aitty.
Ákimniń tapsyrmasy aiasynda Bostandyq aýdanynda jyl sońyna deiin sý, káriz, jylý jáne elektr jelilerin qaita jańartý aiaqtalmaq. Buǵan qosa, 3 myńnan astam sham aýystyrylyp, buryn jaryqsyz qalǵan kóshelerge jańa jaryq baǵandary ornatylady.
Keńes aiaqtalǵan soń Darhan Satybaldy turǵyndardy qabyldady. Kezdesýde aýdan halqy abattandyrý, injenerlik jáne áleýmettik infraqurylymdy damytý, turǵyn úi-kommýnaldyq qyzmet sapasy jaiyn talqylady. Ár másele boiynsha tiisti basqarmalar men aýdandyq qyzmetterge naqty merzim belgilei otyryp tapsyrma berdi.
