الماتى اكىمى دارحان ساتىبالدى بوستاندىق اۋدانىنىڭ باسشىسىمەن بىرگە جيىن وتكىزىپ، ءوڭىردىڭ الەۋمەتتىك-ەكونوميكالىق دامۋى، ينفراقۇرىلىم جانە الەۋمەتتىك سالاداعى تۇيتكىلدەردى تالقىلاندى،- دەپ حابارلايدى Dalanews.kz
اۋدان بيىلعى العاشقى جارتىجىلدىقتى جوسپاردان جوعارى كورسەتكىشپەن اياقتادى. جىل باسىنان اۋدان بيۋدجەتىنە 708،8 ميلليارد تەڭگە ءتۇستى. بۇل جوسپارلانعان 663،5 ميلليارد تەڭگەدەن ەداۋىر كوپ. دەگەنمەن، شاھار باسشىسى وڭ ناتيجە قالا ءومىرىنىڭ ساپاسىن ارتتىرۋعا دەگەن نازاردى باسەڭدەتپەۋى ءتيىس ەكەنىن ەسكەرتتى.
اكىم اپپاراتى جۇرگىزگەن تالداۋ ءبىرقاتار جۇيەلى ماسەلەنى اشىپ كورسەتتى. اۋىزسۋ، جول جانە الەۋمەتتىك ينفراقۇرىلىم سياقتى باستى قاجەتتىلىكتەرگە قارجى جەتىسپەيدى، حالىقپەن بايلانىس ناشار. تۇرعىنداردىڭ ءوتىنىشى ءاتۇستى قارالادى، بۇل جەرگىلىكتى بيلىككە دەگەن سەنىمدى سەلدىرەتەدى.
كەيبىر مەكتەپ پەن مەديسينا مەكەمەننىڭ جاي-كۇيى، الەۋمەتتىك نىسانداردى جاڭارتۋ مەرزىمىنىڭ سوزىلۋى، كوشكىن ءقاۋپى بار اۋماقتار مەن ورتكە قارسى سۋ جۇيەسىن قامتيتىن كەشەندى قاۋىپسىزدىك شارالارىنىڭ بولماۋى دا الاڭداتادى ال قىلمىس دەڭگەيىنىڭ ءوسۋى، سونىڭ ىشىندە كامەلەتكە تولماعاندار اراسىنداعى زاڭبۇزۋشىلىقتار، پوليسيانىڭ الدىن الۋ شارالارىنىڭ ءالسىز ەكەنىن اڭعارتادى.
دارحان ساتىبالدى جاۋاپتى تۇلعالارعا انىقتالعان ماسەلەلەردى جەدەل شەشىپ، ناتيجەسىن قىسقا مەرزىمدە بايانداۋدى تاپسىردى.
«اپپاراتقا تاپسىرما بەردىم. ەندى اپتا سايىن جولداردىڭ، تروتۋارلاردىڭ، اباتتاندىرۋ مەن ينجەنەرلىك جەلىلەردىڭ جاعدايىن باقىلاپ وتىرامىز»، – دەدى الماتى اكىمى.
دارحان ساتىبالدىنىڭ ايتۋىنشا، قالالىق قىزمەتتىڭ ءاردايىم الدا ءجۇرىپ، ماسەلەنىڭ الدىن الۋ كەرەك.
«سىزدەر بىردەڭەنىڭ بۇزىلعانىن كۇتىپ وتىراسىزدار، ال ول بۇزىلعان سوڭ: جوبالىق-سمەتالىق قۇجاتتاما دايىندايمىز، وعان تاعى ءبىر جىل كەتەدى دەيسىزدەر. سودان كەيىن تەندەر وتكىزەسىزدەر، ال مەردىگەر جاۋاپسىز بولىپ شىقسا، جۇمىس تاعى دا توقتايدى. ال ءسىز اۋدان اكىمى بولساڭىز، شەشىمىن تابۋىڭىز كەرەك»، – دەدى ول بوستاندىق اۋدانىنىڭ اكىمىنە.
قالا باسشىسى بيۋدجەت قاراجاتىن ۇنەمدى پايدالانۋ قاجەتتىگىن جانە جۇمىس جوسپارلاۋ كەزىندە الدىن الۋ شارالارى مەن ينفراقۇرىلىمدى ۋاقىتىلى جاڭارتۋدى ەسكەرۋ كەرەك ەكەنىن دە باسا ايتتى.
اكىمنىڭ تاپسىرماسى اياسىندا بوستاندىق اۋدانىندا جىل سوڭىنا دەيىن سۋ، كارىز، جىلۋ جانە ەلەكتر جەلىلەرىن قايتا جاڭارتۋ اياقتالماق. بۇعان قوسا، 3 مىڭنان استام شام اۋىستىرىلىپ، بۇرىن جارىقسىز قالعان كوشەلەرگە جاڭا جارىق باعاندارى ورناتىلادى.
كەڭەس اياقتالعان سوڭ دارحان ساتىبالدى تۇرعىنداردى قابىلدادى. كەزدەسۋدە اۋدان حالقى اباتتاندىرۋ، ينجەنەرلىك جانە الەۋمەتتىك ينفراقۇرىلىمدى دامىتۋ، تۇرعىن ۇي-كوممۋنالدىق قىزمەت ساپاسى جايىن تالقىلادى. ءار ماسەلە بويىنشا ءتيىستى باسقارمالار مەن اۋداندىق قىزمەتتەرگە ناقتى مەرزىم بەلگىلەي وتىرىپ تاپسىرما بەردى.
