Almaty ákimi Darhan Satybaldy jumys sapary aiasynda «Aqparattyq tehnologiialar parki» arnaiy ekonomikalyq aimaǵynda («ATP» AEA) ornalasqan kásiporyndardy aralap, óndiristik áleýetimen tanysty. Bul kásiporyndar elektronika, telekommýnikatsiia jáne meditsinalyq jabdyqtar óndirisine baǵyttalǵan,- dep habarlaidy Dalanews.kz
Búginde AEA aýmaǵynda 60-tan astam shaǵyn jáne orta biznes sýbektisi jumys isteidi. Olardyń qatarynda óndiristi jergiliktendirý deńgeii joǵary, eksporttyq áleýeti bar kompaniialar da bar. Qala basshylyǵyna aimaqtyń negizgi damý kórsetkishteri men jospar tanystyryldy.
Alǵash tanystyrylǵan nysan jylý, sý, elektr qýaty men gazdy esepteýge arnalǵan qurylǵylar shyǵaratyn NERO kompaniialar toby boldy. Kásiporyn 1600 sharshy metr aýmaqta ornalasqan. Jalpy investitsiia kólemi 1,5 mlrd teńge. Munda 65 adam turaqty jumyspen qamtylǵan. Kompaniianyń ónimderi respýblika kóleminde keń qoldanylady. Atap aitqanda, «Alataý Jaryq Kompaniiasy» AQ jáne Shymkent qalasyndaǵy «Qýat Jylý Ortalyq – 3» mekemesimen birlesken jobalarda paidalanylady.
Keiin shahar basshysy XFinity Solutions kompaniiasynyń tynys-tirshiligimen tanysty. Bul kásiporyn 2024 jyly álemge tanymal Acer brendiniń kompiýterlik tehnikalaryn jergilikti jerde qurastyrý isin qolǵa alǵan. Jylyna 100 myń dana tehnika shyǵara alady. Qazir 70 adam jumys isteidi. Munda Microsoft baǵdarlamalarymen jabdyqtalǵan noýtbýkter, monobloktar men júielik bloktar jasalady. Kompaniia XFinity Group halyqaralyq holdinginiń quramyna kiredi, TMD men Ortalyq Aziia naryǵynda sátti jumys istep keledi.
Sapar aiasyndaǵy kelesi nysan 2024 jyldyń qarasha aiynan bastap telekommýnikatsiialyq qurylǵylar – kommýtatorlar, modemder, IP-telefondar men teledidar pristavkalaryn óndire bastaǵan SMART ALATAU zaýyty. Munda 60 qyzmetker eńbek etip jatyr. Jyldyq qýaty – 300 myń dana ónim shyǵarý.
Sapar sońynda ákim Juldyz Kenan Co., LTD kompaniiasyna bardy. Kásiporyn kateter men zondtan bastap, betperde, sondai-aq, pediatriia jáne hirýrgiiaǵa arnalǵan ónimge deiin ártúrli meditsinalyq buiymdar shyǵarady. 2025 jyly aqpan aiynda iske qosylǵan zaýyt jylyna 10 million dana ónim óndiredi. Jobanyń investitsiia kólemi 2,1 mlrd teńge. Munda 120 adam nápaqasyn aiyryp júr.
Sapar qorytyndysy boiynsha Darhan Satybaldy joǵary tehnologiialy jáne import almastyratyn óndiristerdi damytý, eksporttyq baǵyttaǵy kásiporyndardy qoldaý, sondai-aq, jańa, sapaly jumys oryndaryn ashý ákimdik jumysynyń basty basymdyqtarynyń biri ekenin aitty.
Sonymen qatar ol aiaqtalmaǵan qurylys nysandaryna tehnikalyq aýdit júrgizip, olardyń bolashaǵyna qatysty naqty usynystar ázirleýdi tapsyrdy. Usynysta iske asyrý merzimi men investitsiia tartý múmkindikteri de kórinis tabýǵa tiis.
«Qazirgi jaǵdaiǵa taldaý jasaý mańyzdy. Kim belsendi jumys istep jatyr, kim áli de toqtap tur, al kim jer telimin alǵanymen, qurylys jumystaryn bastamaǵan. Osynyń bári naqty, ádil baǵalanýy qajet. Qabyldanatyn sheshimder tiimdilikke negizdelýge tiis», – dedi Darhan Satybaldy.
Sondai-aq, ol Almatyda suranysqa ie otandyq taýar óndirýshilerdi qoldaýdyń mańyzyn atap, investitsiia tartý men qosylǵan quny joǵary óndiristik aimaqtardy damytý baǵytynda júieli jumys isteýge daiyn ekenin bildirdi.
