الماتى اكىمى دارحان ساتىبالدى جۇمىس ساپارى اياسىندا «اقپاراتتىق تەحنولوگيالار پاركى» ارنايى ەكونوميكالىق ايماعىندا («اتپ» اەا) ورنالاسقان كاسىپورىنداردى ارالاپ، وندىرىستىك الەۋەتىمەن تانىستى. بۇل كاسىپورىندار ەلەكترونيكا، تەلەكوممۋنيكاسيا جانە مەديسينالىق جابدىقتار وندىرىسىنە باعىتتالعان،- دەپ حابارلايدى Dalanews.kz
بۇگىندە اەا اۋماعىندا 60-تان استام شاعىن جانە ورتا بيزنەس سۋبەكتىسى جۇمىس ىستەيدى. ولاردىڭ قاتارىندا ءوندىرىستى جەرگىلىكتەندىرۋ دەڭگەيى جوعارى، ەكسپورتتىق الەۋەتى بار كومپانيالار دا بار. قالا باسشىلىعىنا ايماقتىڭ نەگىزگى دامۋ كورسەتكىشتەرى مەن جوسپار تانىستىرىلدى.
العاش تانىستىرىلعان نىسان جىلۋ، سۋ، ەلەكتر قۋاتى مەن گازدى ەسەپتەۋگە ارنالعان قۇرىلعىلار شىعاراتىن NERO كومپانيالار توبى بولدى. كاسىپورىن 1600 شارشى مەتر اۋماقتا ورنالاسقان. جالپى ينۆەستيسيا كولەمى 1،5 ملرد تەڭگە. مۇندا 65 ادام تۇراقتى جۇمىسپەن قامتىلعان. كومپانيانىڭ ونىمدەرى رەسپۋبليكا كولەمىندە كەڭ قولدانىلادى. اتاپ ايتقاندا، «الاتاۋ جارىق كومپانياسى» اق جانە شىمكەنت قالاسىنداعى «قۋات جىلۋ ورتالىق – 3» مەكەمەسىمەن بىرلەسكەن جوبالاردا پايدالانىلادى.
كەيىن شاھار باسشىسى XFinity Solutions كومپانياسىنىڭ تىنىس-تىرشىلىگىمەن تانىستى. بۇل كاسىپورىن 2024 جىلى الەمگە تانىمال Acer برەندىنىڭ كومپيۋتەرلىك تەحنيكالارىن جەرگىلىكتى جەردە قۇراستىرۋ ءىسىن قولعا العان. جىلىنا 100 مىڭ دانا تەحنيكا شىعارا الادى. ءقازىر 70 ادام جۇمىس ىستەيدى. مۇندا Microsoft باعدارلامالارىمەن جابدىقتالعان نوۋتبۋكتەر، مونوبلوكتار مەن جۇيەلىك بلوكتار جاسالادى. كومپانيا XFinity Group حالىقارالىق حولدينگىنىڭ قۇرامىنا كىرەدى، تمد مەن ورتالىق ازيا نارىعىندا ءساتتى جۇمىس ىستەپ كەلەدى.
ساپار اياسىنداعى كەلەسى نىسان 2024 جىلدىڭ قاراشا ايىنان باستاپ تەلەكوممۋنيكاسيالىق قۇرىلعىلار – كوممۋتاتورلار، مودەمدەر، IP-تەلەفوندار مەن تەلەديدار پريستاۆكالارىن وندىرە باستاعان SMART ALATAU زاۋىتى. مۇندا 60 قىزمەتكەر ەڭبەك ەتىپ جاتىر. جىلدىق قۋاتى – 300 مىڭ دانا ءونىم شىعارۋ.
ساپار سوڭىندا اكىم Juldyz Kenan Co.، LTD كومپانياسىنا باردى. كاسىپورىن كاتەتەر مەن زوندتان باستاپ، بەتپەردە، سونداي-اق، پەدياتريا جانە حيرۋرگياعا ارنالعان ونىمگە دەيىن ءارتۇرلى مەديسينالىق بۇيىمدار شىعارادى. 2025 جىلى اقپان ايىندا ىسكە قوسىلعان زاۋىت جىلىنا 10 ميلليون دانا ءونىم وندىرەدى. جوبانىڭ ينۆەستيسيا كولەمى 2،1 ملرد تەڭگە. مۇندا 120 ادام ءناپاقاسىن ايىرىپ ءجۇر.
ساپار قورىتىندىسى بويىنشا دارحان ساتىبالدى جوعارى تەحنولوگيالى جانە يمپورت الماستىراتىن وندىرىستەردى دامىتۋ، ەكسپورتتىق باعىتتاعى كاسىپورىنداردى قولداۋ، سونداي-اق، جاڭا، ساپالى جۇمىس ورىندارىن اشۋ اكىمدىك جۇمىسىنىڭ باستى باسىمدىقتارىنىڭ ءبىرى ەكەنىن ايتتى.
سونىمەن قاتار ول اياقتالماعان قۇرىلىس نىساندارىنا تەحنيكالىق اۋديت جۇرگىزىپ، ولاردىڭ بولاشاعىنا قاتىستى ناقتى ۇسىنىستار ازىرلەۋدى تاپسىردى. ۇسىنىستا ىسكە اسىرۋ مەرزىمى مەن ينۆەستيسيا تارتۋ مۇمكىندىكتەرى دە كورىنىس تابۋعا ءتيىس.
«قازىرگى جاعدايعا تالداۋ جاساۋ ماڭىزدى. كىم بەلسەندى جۇمىس ىستەپ جاتىر، كىم ءالى دە توقتاپ تۇر، ال كىم جەر تەلىمىن العانىمەن، قۇرىلىس جۇمىستارىن باستاماعان. وسىنىڭ ءبارى ناقتى، ءادىل باعالانۋى قاجەت. قابىلداناتىن شەشىمدەر تيىمدىلىككە نەگىزدەلۋگە ءتيىس»، – دەدى دارحان ساتىبالدى.
سونداي-اق، ول الماتىدا سۇرانىسقا يە وتاندىق تاۋار وندىرۋشىلەردى قولداۋدىڭ ماڭىزىن اتاپ، ينۆەستيسيا تارتۋ مەن قوسىلعان قۇنى جوعارى وندىرىستىك ايماقتاردى دامىتۋ باعىتىندا جۇيەلى جۇمىس ىستەۋگە دايىن ەكەنىن ءبىلدىردى.
