Almatyda jańa oqý jylynda 28 myń bala alǵash ret mektepke barady. Bul týraly Óńirlik kommýnikatsiialar qyzmetiniń alańynda Almaty ákiminiń orynbasary Ásem Núsipova habarlady, – dep habarlaidy Dalanews.kz.
21 tamyzdaǵy jaǵdai boiynsha 1 synypqa 27490 bala qabyldandy. Alaida qabyldaý 31 tamyzǵa deiin jalǵasady jáne bilim basqarmasynyń boljamynsha birinshi synypqa baratyn búldirshinderdiń sany 28144 bolady.
– Sońǵy 3 jylda alǵash ret birinshi synyp oqýshylary sanynyń tómendeýi baiqaldy, ótken jylmen salystyrǵanda 4 myń adamǵa tómendedi. Jalpy, 308519 bala mektep partasyna otyrady, – dedi Ásem Núsipova.
Balalardy mektepke daiyndaý úshin 1 tamyzda jyl saiynǵy «Mektepke jol» respýblikalyq aktsiiasy bastaldy. 55 myń teńge kóleminde 12684 muqtaj bala qarjylai kómek aldy. Esterińizge sala keteiik, aktsiia halyqtyń áleýmettik osal toptarynan shyqqan balalardy qoldaýǵa baǵyttalǵan jáne «Jalpyǵa birdei bilim berý» qorynyń, demeýshiler men metsenattardyń biýdjet qarajaty esebinen ótkiziledi.
– Biyl jergilikti biýdjetten «Jalpyǵa birdei bilim berý qoryna» 1,6 mlrd teńge bólindi. Mektep formasyn, sporttyq kiimderdi jáne keńse taýarlaryn satyp alýǵa 697 mln teńge qarastyrylǵan. Demeýshiler men metsenattar jalpy somasy 275 mln teńgege 5010 balaǵa kómek kórsetti. Bul baǵyttaǵy jumys jalǵasady, – dedi ákimniń orynbasary.
Sonymen qatar, jańa oqý jylynda byltyr 30 memlekettik mektepte bastalǵan «Mektep avtobýsy» jobasyn júzege asyrý jalǵasady.
– 2023 jyly 100 avtobýs satyp alyndy, bul 8 myńnan astam balany tasymaldaidy. Biyl 6 myńnan astam balany qamtityn 23 mektepke taǵy 100 avtobýs satyp alý josparlanýda. Osylaisha, jańa oqý jylynda 14 myńnan astam balany 200 avtobýspen tasymaldaý uiymdastyrylady. Buǵan barlyǵy 2,5 mlrd teńge bólindi, – dedi Ásem Núsipova.
Buǵan qosa, Almatyda durys teńdestirilgen tamaqtaný jobasy qolǵa alynǵan.
– Biyl HÁOT sanatyndaǵy 1-4 synyp balalary men 5-11 synyp balalaryn tegin tamaqpen qamtamasyz etý úshin jergilikti biýdjette 16,5 mlrd teńge qarastyrylǵan. 133 myńnan astam oqýshyny qamtý josparlanǵan. Tamaqtaný quny orta eseppen 840 teńge, bul elimiz boiynsha eń joǵary kórsetkish, – dedi qala ákiminiń orynbasary.
Bilim basqarmasynyń málimetinshe, Almatyda barlyǵy 337 mektep bar, onyń 215-i memlekettik jáne 122-si jekemenshik. Ótken oqý jylynda olarda 336486 bala bilim aldy.
