الماتىدا جاڭا وقۋ جىلىندا 28 مىڭ بالا العاش رەت مەكتەپكە بارادى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا الماتى اكىمىنىڭ ورىنباسارى اسەم ءنۇسىپوۆا حابارلادى، – دەپ حابارلايدى Dalanews.kz.
21 تامىزداعى جاعداي بويىنشا 1 سىنىپقا 27490 بالا قابىلداندى. الايدا قابىلداۋ 31 تامىزعا دەيىن جالعاسادى جانە ءبىلىم باسقارماسىنىڭ بولجامىنشا ءبىرىنشى سىنىپقا باراتىن بۇلدىرشىندەردىڭ سانى 28144 بولادى.
– سوڭعى 3 جىلدا العاش رەت ءبىرىنشى سىنىپ وقۋشىلارى سانىنىڭ تومەندەۋى بايقالدى، وتكەن جىلمەن سالىستىرعاندا 4 مىڭ ادامعا تومەندەدى. جالپى، 308519 بالا مەكتەپ پارتاسىنا وتىرادى، – دەدى اسەم ءنۇسىپوۆا.
بالالاردى مەكتەپكە دايىنداۋ ءۇشىن 1 تامىزدا جىل سايىنعى «مەكتەپكە جول» رەسپۋبليكالىق اكسياسى باستالدى. 55 مىڭ تەڭگە كولەمىندە 12684 مۇقتاج بالا قارجىلاي كومەك الدى. ەستەرىڭىزگە سالا كەتەيىك، اكسيا حالىقتىڭ الەۋمەتتىك وسال توپتارىنان شىققان بالالاردى قولداۋعا باعىتتالعان جانە «جالپىعا بىردەي ءبىلىم بەرۋ» قورىنىڭ، دەمەۋشىلەر مەن مەسەناتتاردىڭ بيۋدجەت قاراجاتى ەسەبىنەن وتكىزىلەدى.
– بيىل جەرگىلىكتى بيۋدجەتتەن «جالپىعا بىردەي ءبىلىم بەرۋ قورىنا» 1،6 ملرد تەڭگە ءبولىندى. مەكتەپ فورماسىن، سپورتتىق كيىمدەردى جانە كەڭسە تاۋارلارىن ساتىپ الۋعا 697 ملن تەڭگە قاراستىرىلعان. دەمەۋشىلەر مەن مەسەناتتار جالپى سوماسى 275 ملن تەڭگەگە 5010 بالاعا كومەك كورسەتتى. بۇل باعىتتاعى جۇمىس جالعاسادى، – دەدى اكىمنىڭ ورىنباسارى.
سونىمەن قاتار، جاڭا وقۋ جىلىندا بىلتىر 30 مەملەكەتتىك مەكتەپتە باستالعان «مەكتەپ اۆتوبۋسى» جوباسىن جۇزەگە اسىرۋ جالعاسادى.
– 2023 جىلى 100 اۆتوبۋس ساتىپ الىندى، بۇل 8 مىڭنان استام بالانى تاسىمالدايدى. بيىل 6 مىڭنان استام بالانى قامتيتىن 23 مەكتەپكە تاعى 100 اۆتوبۋس ساتىپ الۋ جوسپارلانۋدا. وسىلايشا، جاڭا وقۋ جىلىندا 14 مىڭنان استام بالانى 200 اۆتوبۋسپەن تاسىمالداۋ ۇيىمداستىرىلادى. بۇعان بارلىعى 2،5 ملرد تەڭگە ءبولىندى، – دەدى اسەم ءنۇسىپوۆا.
بۇعان قوسا، الماتىدا دۇرىس تەڭدەستىرىلگەن تاماقتانۋ جوباسى قولعا الىنعان.
– بيىل ءحاوت ساناتىنداعى 1-4 سىنىپ بالالارى مەن 5-11 سىنىپ بالالارىن تەگىن تاماقپەن قامتاماسىز ەتۋ ءۇشىن جەرگىلىكتى بيۋدجەتتە 16،5 ملرد تەڭگە قاراستىرىلعان. 133 مىڭنان استام وقۋشىنى قامتۋ جوسپارلانعان. تاماقتانۋ قۇنى ورتا ەسەپپەن 840 تەڭگە، بۇل ەلىمىز بويىنشا ەڭ جوعارى كورسەتكىش، – دەدى قالا اكىمىنىڭ ورىنباسارى.
ءبىلىم باسقارماسىنىڭ مالىمەتىنشە، الماتىدا بارلىعى 337 مەكتەپ بار، ونىڭ 215ء-ى مەملەكەتتىك جانە 122ء-سى جەكەمەنشىك. وتكەن وقۋ جىلىندا ولاردا 336486 بالا ءبىلىم الدى.
