Almatyda jaz bastalsa, balalardyń kúlkisi taýǵa qarai kóteriledi. Kópqabatty úilerdiń arasynan shyqqan mektep formasyn sheshken balalar jazdyń alǵashqy kúnderinde qala syrtyndaǵy lagerlerge bet aldy. Solardyń biri – «Órnek» lageri. Almaty oqýshylarynyń alǵashqy legi dál osy jerde demalystyń dámin tatyp jatyr.
Bul maýsym biyl erekshe nazarda. Ákimdik jazǵy demalys tek bos ýaqyt ótkizý ǵana emes, áleýmettik qoldaý, psihologiialyq saýyǵý, bilim men daǵdy jinaityn kezeń bolýy kerek dep esepteidi.
Almaty qalasy ákiminiń orynbasary Ásem Núsipova málimdegendei, qalada mektep jasyndaǵy 350 myńǵa jýyq bala bar. Olardyń árqaisysynyń jazdy mazmundy, qaýipsiz ári paidaly ótkizýi – biliktiń tikelei jaýapkershiliginde. Lagerge barlyq balany ornalastyrý múmkin bolmasa da, qala ákimdigi 95% bala túrli formattaǵy jazǵy baǵdarlamalarmen qamtylady dep otyr.
Biyl úsh myńǵa jýyq oqýshy qala syrtyndaǵy lagerlerge barady. Onyń 900-i – «Órnekke» ornalasty. Bul – jalǵyz qalalyq lager, ári Oqýshylar saraiynyń qaramaǵynda. «Órnekke» baratyn balalar qatarynda áleýmettik osal otbasylardan shyqqandar, erekshe bilim berý qajettiligi barlar jáne múgedektigi bar oqýshylar da bar. Iaǵni, jazǵy demalys – qoǵamnyń barlyq múshesine birdei qoljetimdi bolýǵa tiis degen ustanym baiqalady.
Qazir Almaty men Almaty oblysynyń aýmaǵynda 20-dan astam qala syrtyndaǵy lager jumys istep tur. Balalar kezekpen baryp, tynyǵady. Alaida ákim orynbasary aitqandai, infraqurylym bárine birdei jete bermeidi. Balalardyń búgingi suranysy – jai ǵana tynyǵý emes, mazmundy, zamanaýi ári yńǵaily formattaǵy demalys. Osyǵan orai, qala biligi balalardyń jazǵy infraqurylymyn damytýdy basymdyq retinde belgilegen.
Qala syrtyndaǵy lagerlerden bólek, 55 myń oqýshy mektep janyndaǵy lagerlerge qatysyp jatyr. Olar da tolyqqandy ystyq tamaqpen, qyzyqty baǵdarlamalarmen qamtylǵan. Bul jerde jai ǵana oiyn emes, kásibi baǵdar da bar. 17 kolledj oqý orny balalarmen jumys júrgizip, sheberlik saǵattaryn ótkizip jatyr. Balalar tiginshilik pen aspazdyqtan bastap, tehnikalyq mamandyqtarǵa deiin kózben kórip, qolmen ustap tanysýda.
«Órnektiń» aýlasy bala kúlkisine toly. Al ákimdik jaz ailarynda tek ata-analardyń ǵana emes, qoǵamnyń da nazaryn osy balalardyń qalai demalyp jatqanyna aýdaryp otyr. Sebebi sapaly demalys – densaýlyq kepili ǵana emes, teń múmkindiktiń de kórsetkishi. Balanyń bir maýsymda jinaǵan qýanyshy men áseri onyń jańa oqý jylyndaǵy jigerine ainalady. Al buǵan jaýapty orta – memleket pen jergilikti bilik. Almaty jazǵy tynyǵýdy jai ǵana shara emes, balanyń ómirindegi mańyzdy kezeń retinde qabyldap otyr.
