Almatynyń Almaly aýdanynda turǵyndardyń ótinishimen júzege asyrylǵan nysandarǵa arnalǵan boıynsha baspasóz týry ótti, dep habarlaıdy Dalanews.kz.
Alǵashqy nysan – qalanyń negizgi jaıaý júrginshiler kósheleriniń biri Panfılov kóshesi boldy. Kún saıyn bul kósheden 10-15 myń adam ótedi, demalys jáne mereke kúnderi bul kórsetkish birneshe esege artady. Aýdan ákimi Arman Shamshınniń aıtýynsha, kósheniń joǵary júktemesi men dámhanalar men meıramhanalarǵa taýar jetkizetin avtokólikter kóptigi jol tósemine jáne dekoratıvti elementterge úlken salmaq túsiredi. Osyǵan baılanysty turǵyndar kósheni jańartýdy ótingen.
2017 jyldan beri alǵash ret jol tósemin jóndeý týraly sheshim qabyldandy. Qyrkúıek aıynda bastalǵan jumystar aıasynda 2 myń sharshy metr kespe tas jańartyldy, 130 jańa oryndyq jáne 2 balalar alańy ornatyldy, sýburqaq jóndeldi. Jasyl aımaq 20%-ǵa keńeıtilip, jańa butalar otyrǵyzyldy jáne kógal egildi. Qolónershilerge arnalǵan modýldi úıler, stasıonarlyq polısıa beketi jáne zamanaýı "Sapar ortalyǵy" ornatyldy. Almatylyqtar jańartylǵan kósheniń qolaıly ári jaıly bolǵanyn atap ótti.
Kelesi nysan №136 jalpy bilim beretin mektep boldy. Munda 35 jyldan beri alǵash ret seısmıkalyq nyǵaıtý arqyly kúrdeli jóndeý júrgizildi. Zamanaýı talaptarǵa saı robototehnıka, hımıa, bıologıa, fızıka, ınformatıka kabınetteri jańartyldy, sondaı-aq uldar men qyzdarǵa arnalǵan tehnologıa kabınetteri men sheberhanalar jabdyqtaldy. Barlyq pán kabınetteri ınteraktıvti paneldermen jáne jańa jıhazdarmen jabdyqtalǵan.
Baspasóz týrynyń qatysýshylary 2023 jyly "Halyq qatysatyn búdjet" baǵdarlamasy aıasynda jańartylǵan "Shyǵys AZTM" skverine de bardy. Bul skverdi kórkeıtýdi jańa "Nomad" turǵyn úı kesheniniń turǵyndary usynǵan.
Skverde trenajerler, jaıaý júrginshiler joldary, shamamen 10 myń sharshy metr kógal, gúlder men aǵashtar otyrǵyzylyp, jańa jaryqtandyrý ornatyldy. Bul shaǵyn, biraq óte jaıly almatylyq skverge aınaldy.
Qala turǵyny ári "HQB" jobasynyń teń avtory Alena Shın munyń aýdan men almatylyqtardyń maqtanyshy ekenin jetkizdi.
"Bul tek skver ǵana emes, jalǵyz jasandy toǵany bar skver bizdiń aýdanda. Josparymyzdy ákimdik mamandarymen bólistik, olar bizge ony júzege asyrýǵa kómektesti. Balalarym únemi osy jerde oınaıdy, voleıbol alańy da keremet. Barlyq jaǵdaı otbasylyq demalys úshin jasalǵan".
Týr barysyndaǵy sońǵy nysan Rozybakıev kóshesiniń boıynda Dúısenov kóshesinen ońtústikke qaraı ornalasqan, aýmaǵy 0,49 ga bolatyn jańa skver edi. Buryn bul jerde beıbereket saýda oryndary bolǵan, bul jaqyn mańdaǵy úılerdiń turǵyndaryna qolaısyzdyq týdyratyn. Osyǵan baılanysty turǵyndar birneshe ret bazardy alyp tastap, onyń ornyna jasyl aımaq qurýdy suraǵan. Aqyry, burynǵy bazardyń ornyna shamamen 2 myń sharshy metr kógaldy jasyl aımaq, gúlder men aǵashtar otyrǵyzyldy.
Turǵyndar úshin zamanaýı ári sapaly materıaldardan jasalǵan oryndyqtar, trenajerler, pergolalar, balalar alańdary men júgirý joldary ornatylǵan. Sondaı-aq, avtomatty sýarý jáne jaryqtandyrý júıesi ornatyldy.
"Keshkisin munda óte ádemi, jaryq jaqsy. Biz ótinish berip, jumystardy baqylap júrdik, sondyqtan osynda kelip, tańdanamyz. Bul jerde eresekter men balalardyń jaıly ýaqyt ótkizýine barlyq jaǵdaı jasalǵan. Buryn terezeni ashý múmkin emes edi, sebebi beıbereket bazar boldy, shý men jaǵymsyz ıis bolatyn. Endi bul múlde basqa orynǵa aınaldy. Úlken jasyl aımaqtar men pergolalar bárin ásemdep tur. Jaı ǵana yńǵaıly emes, ádemi oryn boldy", – deıdi turǵynnyń biri Ásem Nurǵazına.
2023 jyly Almaly aýdanynda "Halyq qatysatyn búdjet" baǵdarlamasy aıasynda 34 joba júzege asyrylsa, 2024 jyly 52 joba josparlanǵan.
"Sońǵy jyldary Almatynyń kórkeıýine "Halyq qatysatyn búdjet" baǵdarlamasy oń áserin tıgizip keledi. Jasyl demalys aımaqtary qoǵamdyq keńistikterdi jaqsartýda jáne qalanyń ekologıalyq jaǵdaıyn arttyrýda mańyzdy ról atqarady. Biz árqashan aýdan turǵyndarynyń bastamalaryn qoldaımyz", – deıdi aýdan ákimi Arman Shamshın.
