[caption id="attachment_18194" align="alignright" width="194"]
Árýaq adamdy qoldai ma? Iá, qoldaidy. Naqtylap aitsaq, Alla adamdy tek árýaq arqyly qoldaidy. Biz sol úshin de kálima shahadattyń «Muhammed onyń quly, ári elshisi» degen ekinshi syńaryn aitamyz. Barlyq paiǵambarlar, áýlie-ámbieler osy «qýat iesi» retinde áreket etedi. Bul – Allanyń raqymy. Onyń solai ekendigi Adam ata qissasynan bastaý alady. Eske túsirip kóreiik.
Adam peiishten qýylady. Allaǵa 300 jyl jalbarynyp, minájat etedi. Alla onyń duǵa-tilegin qabyl etpeidi. Sebebi... Adamǵa tek árýaq qorǵan bolatyny osy jerde málim bolady. Mán bergen jón. Biz de qysylǵan kezderde atamyz Adam siiaqty Allaǵa alaqan jaiyp, duǵa jasaimyz. Biraq atamyz duǵasynyń qalai qabyl bolǵanyna jete mán bere bermeimiz. Qabyl bolý úshin... Iá. Árýaq múmkindigin iske qosý qajet. Ol múmkindik kilti sonyń «iesi» esimin duǵaǵa qosý arqyly ashylady.
Adam ata tilegi Paiǵambarymyz esimin óz duǵasyna dáneker etý arqyly qabyl boldy. Mán bergen jón. Bul duǵadan alynatyn taǵylym – árýaq álemi Paiǵambarymyzdyń «quldyq qyzmetinde» turǵandyǵyn túisinýde. Ol – máńgilik qyzmet. Bizdiń ata-babalarymyz sol qyzmetti áýlie-ámbieler esimin óz duǵalaryna qosý arqyly paidalana alǵan. Esimderi ańyzǵa ainalǵan batyrlarymyz «Árýaq!» dep atoi salǵanda sol alapat qýat (dini tilde ol «Allanyń áskeri» delinedi) maidanǵa shyǵady. Qazaq batyrlarynyń jaýǵa jalǵyz shaba beretini sondyqtan.
Endi joǵaryda aitqanymyzǵa qaita oiysaiyq. Biz Allaǵa duǵa jasap ketirýin surap jatqan basymyzǵa túsken qiyndyqtardyń iesi – Alla. Sonda Alla ony bizge ózine jalbaryndyrý úshin jiberse, ol bir jaǵy májbúrlilik bolyp shyqpai ma?! Álde Alla onyń bizge qiyn bolatynyn «bilmei qaldy» dep túsinemiz be? Joq. Bul Allaǵa iman keltirýdiń máni. Alla qai nárseni de Ózi jiberedi jáne árýaq arqyly «Ózi» qorǵaidy. Sony bilgen bizdiń atalarymyz keiingi «Ózdi», iaǵni árýaqty «Ol – Qudai emes, Qudaidan bylai emes» dep qabyldaǵan. Sony túsingen adamdar «Alladan basqa táńir joq, Muhammed onyń quly, ári elshisi» dep iman keltiredi.
Avtordyń ruqsatymen kóshirilip basyldy.
