Saiasattanýshy Ǵaziz Ábishev mekteptegi jaratylystaný baǵytynyń qysqarýyna qarsy pikir bildirdi, dep habarlaidy Dalanews.kz.
Ábishev orta bilim berý júiesinde jaratylystaný-matematikalyq baǵyttaǵy pánderdiń biriktirilýi – bilim sapasyna jasalǵan «diversiia» dep esepteidi.
Onyń aitýynsha, algebra men geometriiany bir pánge ainaldyrý oqý protsesine ziian keltiredi.
«Algebra abstraktili, arifmetikany jalpylai otyryp, matematikalyq qurylymdardy zertteidi. Al geometriia - kózben kórýge bolatyn naqty pán, ol balalarǵa teoriiany shynaiy dúniemen bailanystyrýǵa múmkindik beredi. Pánderdi bólek oqytý kerek, biraq bir-birinen alynǵan materialdy qoldanýǵa jol ashý qajet», – deidi saiasattanýshy.
Sondai-aq ol biologiia, himiia, fizika siiaqty ǵylymdardy da biriktirýge bolmaitynyn basa aitty.
«Biologiia - himiianyń, himiia - fizikanyń jekelegen bólimi degen pikir bar. Biraq dál osy aiyrmashylyqtar olardy bólek oqytýdyń qajettiligin dáleldeidi. Oqýshylardyń bir bóligi barlyq pándi birdei jaqsy meńgerse, ekinshisi naqty salada ozyq bolady. Pánderdiń bólinýi balalarǵa óz qyzyǵýshylyǵyn durys anyqtaýǵa múmkindik beredi», – dep túsindirdi Ǵaziz Ábishev.
Saiasattanýshy jaratylystaný-matematika sabaqtarynyń saǵattaryn qysqartý – bolashaq ulttyq básekege qabilettilikti álsiretetinin atap ótti.
«Qysqartýǵa bolmaidy, tek arttyra túsý kerek. Aziia elderiniń tájiribesine qarańyzdar. Qytai, Japoniia, Ońtústik Koreia, Singapýr – bári matematika boiynsha qatań daiyndyqqa negizdelgen. Nátijesinde olar olimpiadalarda, testter men ýniversitet emtihandarynda alda keledi. Bul – innovatsiiaǵa daiyndyqtyń jáne tehnologiialyq basymdyqtyń kilti», – deidi ol.
Ábishev Qazaqstannyń bolashaǵy matematikalyq saýatqa tikelei bailanysty ekenin aitty.
«Biz qazaqtardy tabysty tarihi ult retinde qalyptastyrǵymyz kelse, eń bastysy – myqty matematikalyq bilim, daǵdylar men mashyqtar», – dep qorytyndylady saiasattanýshy.
Eske salaiyq, buǵan deiin oqý-aǵartý ministri Juldyz Súleimenova jaratylystaný baǵytyndaǵy pánderdi biriktirý týraly usynysqa óz pikirin bildirgen bolatyn.
Ministrdiń aitýynsha, fizika, himiia jáne biologiia pánderiniń mazmuny men maqsattary bir-birinen túbegeili erekshelenedi, sondyqtan olardy jeke pán retinde saqtaý qajet.
Onyń sózinshe, jaratylystaný pánderin jeke pán retinde saqtaý ári olardyń baǵdarlamalaryn odan ári jetildirý baǵytynda jumys jalǵasady.
Ministrdiń aitýynsha, elde jańa bilim berý standarty boiynsha tájiribelik synaq jeltoqsan aiynyń sońyna deiin jalǵasady. Aprobatsiia aiaqtalǵannan keiin nátijeler taldanyp, jańartylǵan oqý baǵdarlamalary ázirlenedi.
