Búginde elimizdiń júregi Elordaǵy kelip jumys istep, astanalyq bolýdy kóptegen jastar armandaityny anyq. Bul bir jaǵynan qalypty úrdis. Qazir jyl saiyn elordamyzda myńdaǵan jastar oqýyn bitirip, úlken ómirge qanat qaǵyp jatyr. Osy rette Nur-Sultan qalasy ákimdigi júzege asyryp jatqan «Eńbek» baǵdarlamasy diplom alǵan jastarmen qatar, jańa mamandyqty igerýge ańsary aýǵan azamattarǵa da paidasyn tigizip otyr.
Búginde Nur-Sultan qalasynda Halyqty jumyspen qamtý ortalyǵy jumys izdep júrgen qala turǵyndaryn 2017-2021 jyldarǵa arnalǵan Jappai kásipkerlikti nátijeli damytý jáne jumyspen qamtýdyń «Eńbek» memlekettik baǵdarlamasy aiasynda «Alǵashqy jumys orny» baǵyty boiynsha jumysqa ornalasýǵa shaqyrýda.
Aty aityp turǵandai, «Alǵashqy jumys orny» baǵdarlamasy birinshi kezekte jastardy qoldaýǵa baǵyttalǵan. Zaman kóshi alǵa jyljyǵan saiyn jumys berýshiler jańadan oqý bitirgen jas mamandarǵa kóptegen talap-tilekterin qoiǵan sátte jastardyń taýy shaǵylyp qalatyny jasyryn emes. Elorda ákimdigi bul máselege nazar aýdaryp, «Alǵashqy jumys orny» baǵdarlamasy aiasynda bul máseleni qala aýmaǵynda sheshýge bel býyp, bilek sybana kiriskeni kóńilge qýanysh uialatady.
Iri kompaniialardyń jas mamandarǵa kóptegen talaptar qoiýy, bul – tutas eldegi jaǵdai. Eger osy másele Nur-Sultan qalasynda oń sheshimin tapsa, bul tájiribe respýblika deńgeiinde tutastai sheshilip, ózge óńirlerge tez taraityny anyq. Sondyqtan Nur-Sultan qalasynda qolǵa alynǵan bul jobanyń ǵumyry uzaq bolýy biz úshin mańyzdy. Osy rette «Qala men Dala» gazetiniń tilshilerine Nur-Sultan qalasy Halyqty jumyspen qamtý ortalyǵynyń qyzmetkerleri «Alǵashqy jumys orny» baǵdarlamasyna elordalyq jastardyń qalai qatysatynyn qysqasha baiandap berdi.
– «Alǵashqy jumys orny» baǵdarlamasyna qatysýǵa niet bildirgen jastar bizdiń ortalyqqa kelip, bul baǵdarlamany búge-shigesine deiin túsinip alýy kerek. Bizdiń qyzmetkerler kez kelgen suraqqa tiianaqty jaýap beredi. «Alǵashqy jumys orny» baǵdarlamasyna qatysýshylar Nur-Sultan qalasy Halyqty jumyspen qamtý ortalyǵymen jasalatyn sharttyń negizinde jumysqa ornalasý múmkindigine ie bolady. Bizder jumys berýshilermen birge úmitker kandidattyń múmkindikterin saralaimyz. Eger jumysqa turýshynyń biliktiligi jumys berýshiniń oiynan shyǵyp jatsa, úsh tarap arnaiy shart jasaidy. Jastar jumysqa kiriskennen keiin bizder Nur-Sultan qalasy ákimdiginiń qoldaýyna súiene otyryp, jumysshynyń jalaqysynyń belgilengen mólsherin sýbsidiialaityn bolamyz. Bul úsh tarap úshin de tiimdi deidi, – ortalyq qyzmetkeri.
Nur-Sultan qalasy Halyqty jumyspen qamtý ortalyǵynyń qyzmetkerleri «Alǵashqy jumys orny» baǵdarlamasyna qatysýǵa tilek bildirgenderge qoiylatyn az-kem talaptary bar ekenin de tilge tiek etti. Sóz arasynda aitqanymyzdai, atalǵan baǵdarlamaǵa birinshi kezekte alǵash ret jumys izdep júrgen oqý oryndarynyń bitirýshileri, Halyqty jumyspen qamtý ortalyǵynda tirkelýine qaramastan, jumys izdep júrgen tulǵalar men birqatar jumyssyzdar qatysa alady. Úmitkerlerdiń jasy 29 jastan aspaýy kerek, sonymen qatar NEET sanatyndaǵy jumys tájiribesi joq jastar da osy baǵdarlamaǵa qatysa alady.
Osy rette baǵdarlamaǵa qatysýǵa niet bildirgen jastarǵa «Alǵashqy jumys orny» baǵdarlamasy úlken múmkindik ekenin aitqymyz keledi. Eki qolǵa bir kásip izdep júrgen elordalyq jastar osy baǵdarlamanyń múmkindigin paidalanyp, ózderi esiginen attap kire almai júrgen mekemeler men iri kompaniialardyń tolyqqandy qyzmetkerine ainalýyna bolady. Jumysqa turǵannan keiin óziniń biliktiligin tanytqan jas mamandardy jumys berýshiler de ailyǵyn kóbeitip, qundy kadarlardyń qataryna qosatyny anyq. Sondyqtan elorda ákimdigi usynyp otyrǵan baǵdarlamanyń múmkinshiligin barynsha paidalanyp qalýǵa keńes beremiz.
Ortalyq qyzmetkerleriniń aitýynsha, kez kelgen jas maman jumysqa ornalasqan kúninen bastap, jumys berýshiler tiisti salyqtary men áleýmettik aýdarymdardy turaqty túrde aýdaryp turatynyn alǵa tartty. Mundai jaǵdaida kez kelgen jastyń áleýmettik statýsy anyqtalyp, olardyń turǵyn úi kezegine turý múmkindigine ie bolady.
Nur-Sultan qalasy Halyqty jumyspen qamtý ortalyǵy «Alǵashqy jumys orny» baǵdarlamasyna qatysatyn jumys berýshi mekemeler men kompaniialardyń jalaqy boiynsha merzimi ótken bereshegi joq bolýyna basa mán berip otyr. Osylaisha, ortalyq bul baǵdarlamaǵa kóldeneńnen kelgen kók attylardyń kirip ketýine jol bermei otyr. Bul óte durys. Óitkeni jumysshylary aldynda júzi jaryq mekemeler men kompaniialardyń qatysýy baǵdarlamanyń tartymdylyǵyn arttyra túsetini aitpasaq ta túsinikti. Al elordada jumysshylardyń aldyndaǵy mindettemesin zań aiasynda júz paiyz oryndaityn jumys berýshiler jetedi. Sondyqtan jastar jumys berýshilerge kúdiktenbese de bolady.
«Alǵashqy jumys orny» baǵdarlamasy jastarǵa ne beredi?
- 24 aiǵa mamandyǵy boiynsha jumys tájiribesi;
- eńbek ótili;
- «Alǵashqy jumys orny» baǵdarlamasy boiynsha jumysqa ornalasý maqsatynda mekemeni óziniń tańdaýy;
- kepildendirilgen ai saiynǵy jalaqy, 20 AEK.
«Alǵashqy jumys orny» baǵdarlamasyna qatysý úshin qandai qujattar qajet?
- jeke basyn kýálandyratyn qujattyń kóshirmesi;
- attestat, tehnikalyq jáne kásiptik, orta bilimnen keiingi, joǵary jáne joǵary oqý ornynan keiingi bilimniń bar ekenin rastaityn qujattyń kóshirmesi (bar bolsa).
«Alǵashqy jumys orny» baǵdarlamaǵa qatysý suraqtary boiynsha kelesi telefondarǵa habarlasýǵa bolady +7 717 272-93-56, 8-705-329-77-19.
Arman ShANShARHANOV, Nur-Sultan qalasy Halyqty jumyspen qamtý ortalyǵynyń Ýaqytsha jumysqa ornalastyrý bólim basshysy.
Ainash ShOIYNBEKOVA, Nur-Sultan qalasy Halyqty jumyspen qamtý ortalyǵynyń baspasóz hatshysy.
