پاندەميا كەزىندە، ودان كەيىن حالىقتى جۇمىسپەن قامتۋ ءىسى جەرگىلىكتى بيلىك ورىندارى ءۇشىن وتە وزەكتى ماسەلە بولىپ تۇرعانى انىق. ەلىمىزدە جۇمىسسىزدىق دەڭگەيىنىڭ جوعارىلاماۋى ءۇشىن كوپتەگەن ءىس-شارالار قولعا الىنىپ، جۇمىسپەن قامتۋ ءىسى جۇيەلى جۇرگىزىلىپ كەلەدى. ءبىزدىڭ بۇل سوزىمىزگە نۇر-سۇلتان قالاسى اكىمدىگىنىڭ «ەڭبەك» مەملەكەتتىك باعدارلاماسىن جۇزەگە اسىرۋداعى جۇمىستارى ايقىن مىسال بولا الادى.

بۇگىندە ەلىمىزدىڭ جۇرەگى ەلورداعى كەلىپ جۇمىس ىستەپ، استانالىق بولۋدى كوپتەگەن جاستار ارماندايتىنى انىق. بۇل ءبىر جاعىنان قالىپتى ءۇردىس. ءقازىر جىل سايىن ەلوردامىزدا مىڭداعان جاستار وقۋىن ءبىتىرىپ، ۇلكەن ومىرگە قانات قاعىپ جاتىر. وسى رەتتە نۇر-سۇلتان قالاسى اكىمدىگى جۇزەگە اسىرىپ جاتقان «ەڭبەك» باعدارلاماسى ديپلوم العان جاستارمەن قاتار، جاڭا ماماندىقتى يگەرۋگە اڭسارى اۋعان ازاماتتارعا دا پايداسىن تيگىزىپ وتىر.

بۇگىندە نۇر-سۇلتان قالاسىندا حالىقتى جۇمىسپەن قامتۋ ورتالىعى جۇمىس ىزدەپ جۇرگەن قالا تۇرعىندارىن 2017-2021 جىلدارعا ارنالعان جاپپاي كاسىپكەرلىكتى ناتيجەلى دامىتۋ جانە جۇمىسپەن قامتۋدىڭ «ەڭبەك» مەملەكەتتىك باعدارلاماسى اياسىندا «العاشقى جۇمىس ورنى» باعىتى بويىنشا جۇمىسقا ورنالاسۋعا شاقىرۋدا.

اتى ايتىپ تۇرعانداي، «العاشقى جۇمىس ورنى» باعدارلاماسى ءبىرىنشى كەزەكتە جاستاردى قولداۋعا باعىتتالعان. زامان كوشى العا جىلجىعان سايىن جۇمىس بەرۋشىلەر جاڭادان وقۋ بىتىرگەن جاس ماماندارعا كوپتەگەن تالاپ-تىلەكتەرىن قويعان ساتتە جاستاردىڭ تاۋى شاعىلىپ قالاتىنى جاسىرىن ەمەس. ەلوردا اكىمدىگى بۇل ماسەلەگە نازار اۋدارىپ، «العاشقى جۇمىس ورنى» باعدارلاماسى اياسىندا بۇل ماسەلەنى قالا اۋماعىندا شەشۋگە بەل بۋىپ، بىلەك سىبانا كىرىسكەنى كوڭىلگە قۋانىش ۇيالاتادى.

ءىرى كومپانيالاردىڭ جاس ماماندارعا كوپتەگەن تالاپتار قويۋى، بۇل – تۇتاس ەلدەگى جاعداي. ەگەر وسى ماسەلە نۇر-سۇلتان قالاسىندا وڭ شەشىمىن تاپسا، بۇل تاجىريبە رەسپۋبليكا دەڭگەيىندە تۇتاستاي شەشىلىپ، وزگە وڭىرلەرگە تەز تارايتىنى انىق. سوندىقتان نۇر-سۇلتان قالاسىندا قولعا الىنعان بۇل جوبانىڭ عۇمىرى ۇزاق بولۋى ءبىز ءۇشىن ماڭىزدى. وسى رەتتە «قالا مەن دالا» گازەتىنىڭ تىلشىلەرىنە نۇر-سۇلتان قالاسى حالىقتى جۇمىسپەن قامتۋ ورتالىعىنىڭ قىزمەتكەرلەرى «العاشقى جۇمىس ورنى» باعدارلاماسىنا ەلوردالىق جاستاردىڭ قالاي قاتىساتىنىن قىسقاشا بايانداپ بەردى.

– «العاشقى جۇمىس ورنى» باعدارلاماسىنا قاتىسۋعا نيەت بىلدىرگەن جاستار ءبىزدىڭ ورتالىققا كەلىپ، بۇل باعدارلامانى بۇگە-شىگەسىنە دەيىن ءتۇسىنىپ الۋى كەرەك. ءبىزدىڭ قىزمەتكەرلەر كەز كەلگەن سۇراققا تياناقتى جاۋاپ بەرەدى. «العاشقى جۇمىس ورنى» باعدارلاماسىنا قاتىسۋشىلار نۇر-سۇلتان قالاسى حالىقتى جۇمىسپەن قامتۋ ورتالىعىمەن جاسالاتىن شارتتىڭ نەگىزىندە جۇمىسقا ورنالاسۋ مۇمكىندىگىنە يە بولادى. بىزدەر جۇمىس بەرۋشىلەرمەن بىرگە ۇمىتكەر كانديداتتىڭ مۇمكىندىكتەرىن سارالايمىز. ەگەر جۇمىسقا تۇرۋشىنىڭ بىلىكتىلىگى جۇمىس بەرۋشىنىڭ ويىنان شىعىپ جاتسا، ءۇش تاراپ ارنايى شارت جاسايدى. جاستار جۇمىسقا كىرىسكەننەن كەيىن بىزدەر نۇر-سۇلتان قالاسى اكىمدىگىنىڭ قولداۋىنا سۇيەنە وتىرىپ، جۇمىسشىنىڭ جالاقىسىنىڭ بەلگىلەنگەن مولشەرىن سۋبسيديالايتىن بولامىز. بۇل ءۇش تاراپ ءۇشىن دە ءتيىمدى دەيدى، – ورتالىق قىزمەتكەرى.

نۇر-سۇلتان قالاسى حالىقتى جۇمىسپەن قامتۋ ورتالىعىنىڭ قىزمەتكەرلەرى «العاشقى جۇمىس ورنى» باعدارلاماسىنا قاتىسۋعا تىلەك بىلدىرگەندەرگە قويىلاتىن از-كەم تالاپتارى بار ەكەنىن دە تىلگە تيەك ەتتى. ءسوز اراسىندا ايتقانىمىزداي، اتالعان باعدارلاماعا ءبىرىنشى كەزەكتە العاش رەت جۇمىس ىزدەپ جۇرگەن وقۋ ورىندارىنىڭ بىتىرۋشىلەرى، حالىقتى جۇمىسپەن قامتۋ ورتالىعىندا تىركەلۋىنە قاراماستان، جۇمىس ىزدەپ جۇرگەن تۇلعالار مەن ءبىرقاتار جۇمىسسىزدار قاتىسا الادى. ۇمىتكەرلەردىڭ جاسى 29 جاستان اسپاۋى كەرەك، سونىمەن قاتار NEET ساناتىنداعى جۇمىس تاجىريبەسى جوق جاستار دا وسى باعدارلاماعا قاتىسا الادى.

وسى رەتتە باعدارلاماعا قاتىسۋعا نيەت بىلدىرگەن جاستارعا «العاشقى جۇمىس ورنى» باعدارلاماسى ۇلكەن مۇمكىندىك ەكەنىن ايتقىمىز كەلەدى. ەكى قولعا ءبىر كاسىپ ىزدەپ جۇرگەن ەلوردالىق جاستار وسى باعدارلامانىڭ مۇمكىندىگىن پايدالانىپ، وزدەرى ەسىگىنەن اتتاپ كىرە الماي جۇرگەن مەكەمەلەر مەن ءىرى كومپانيالاردىڭ تولىققاندى قىزمەتكەرىنە اينالۋىنا بولادى. جۇمىسقا تۇرعاننان كەيىن ءوزىنىڭ بىلىكتىلىگىن تانىتقان جاس مامانداردى جۇمىس بەرۋشىلەر دە ايلىعىن كوبەيتىپ، قۇندى كادارلاردىڭ قاتارىنا قوساتىنى انىق. سوندىقتان ەلوردا اكىمدىگى ۇسىنىپ وتىرعان باعدارلامانىڭ مۇمكىنشىلىگىن بارىنشا پايدالانىپ قالۋعا كەڭەس بەرەمىز.



ورتالىق قىزمەتكەرلەرىنىڭ ايتۋىنشا، كەز كەلگەن جاس مامان جۇمىسقا ورنالاسقان كۇنىنەن باستاپ، جۇمىس بەرۋشىلەر ءتيىستى سالىقتارى مەن الەۋمەتتىك اۋدارىمداردى تۇراقتى تۇردە اۋدارىپ تۇراتىنىن العا تارتتى. مۇنداي جاعدايدا كەز كەلگەن جاستىڭ الەۋمەتتىك ستاتۋسى انىقتالىپ، ولاردىڭ تۇرعىن ءۇي كەزەگىنە تۇرۋ مۇمكىندىگىنە يە بولادى.

نۇر-سۇلتان قالاسى حالىقتى جۇمىسپەن قامتۋ ورتالىعى «العاشقى جۇمىس ورنى» باعدارلاماسىنا قاتىساتىن جۇمىس بەرۋشى مەكەمەلەر مەن كومپانيالاردىڭ جالاقى بويىنشا مەرزىمى وتكەن بەرەشەگى جوق بولۋىنا باسا ءمان بەرىپ وتىر. وسىلايشا، ورتالىق بۇل باعدارلاماعا كولدەنەڭنەن كەلگەن كوك اتتىلاردىڭ كىرىپ كەتۋىنە جول بەرمەي وتىر. بۇل وتە دۇرىس. ويتكەنى جۇمىسشىلارى الدىندا ءجۇزى جارىق مەكەمەلەر مەن كومپانيالاردىڭ قاتىسۋى باعدارلامانىڭ تارتىمدىلىعىن ارتتىرا تۇسەتىنى ايتپاساق تا تۇسىنىكتى. ال ەلوردادا جۇمىسشىلاردىڭ الدىنداعى مىندەتتەمەسىن زاڭ اياسىندا ءجۇز پايىز ورىندايتىن جۇمىس بەرۋشىلەر جەتەدى. سوندىقتان جاستار جۇمىس بەرۋشىلەرگە كۇدىكتەنبەسە دە بولادى.

 

«العاشقى جۇمىس ورنى» باعدارلاماسى جاستارعا نە بەرەدى؟

- 24 ايعا ماماندىعى بويىنشا جۇمىس تاجىريبەسى؛

- ەڭبەك ءوتىلى؛

- «العاشقى جۇمىس ورنى» باعدارلاماسى بويىنشا جۇمىسقا ورنالاسۋ ماقساتىندا مەكەمەنى ءوزىنىڭ تاڭداۋى؛

- كەپىلدەندىرىلگەن اي سايىنعى جالاقى، 20 اەك.

«العاشقى جۇمىس ورنى» باعدارلاماسىنا قاتىسۋ ءۇشىن قانداي قۇجاتتار قاجەت؟

- جەكە باسىن كۋالاندىراتىن قۇجاتتىڭ كوشىرمەسى؛

- اتتەستات، تەحنيكالىق جانە كاسىپتىك، ورتا بىلىمنەن كەيىنگى، جوعارى جانە جوعارى وقۋ ورنىنان كەيىنگى ءبىلىمنىڭ بار ەكەنىن راستايتىن قۇجاتتىڭ كوشىرمەسى (بار بولسا).

«العاشقى جۇمىس ورنى» باعدارلاماعا قاتىسۋ سۇراقتارى بويىنشا كەلەسى تەلەفوندارعا حابارلاسۋعا بولادى +7 717 272-93-56، 8-705-329-77-19.

 

ارمان شانشارحانوۆ، نۇر-سۇلتان قالاسى حالىقتى جۇمىسپەن قامتۋ ورتالىعىنىڭ ۋاقىتشا جۇمىسقا ورنالاستىرۋ ءبولىم باسشىسى.

ايناش شويىنبەكوۆا،  نۇر-سۇلتان قالاسى حالىقتى جۇمىسپەن قامتۋ ورتالىعىنىڭ باسپا ءسوز حاتشىسى.