Qazaqstan Prezıdentiniń Mońǵolıaǵa memlekettik sapary aıasynda Jerdi qashyqtyqtan zondtaý júıesin qurý jáne damytýǵa baǵyttalǵan tarıhı ınvestısıalyq kelisimge qol qoıyldy. Bul joba Mońǵolıa úshin spýtnık qurýdy kózdeıdi, ol jalpy qazaqstandyq-mońǵoldyq spýtnıktik toptamanyń quramyna kiredi, - dep habarlaıdy Dalanews.kz.
Ár taraptyń spýtnıkterdi derbes basqarýy Qazaqstan men Mońǵolıaǵa tabıǵı resýrstardy monıtorıńileý jáne aýyl sharýashylyǵyn damytý úshin qajetti derekterge qol jetkizýdi qamtamasyz etedi.
"Aıryqsha atap ótetin jaıt — bul Qazaqstan tarıhyndaǵy qazaqstandyq ınjenerler tolyq ázirlegen alǵashqy eksporttyq spýtnık bolmaq. Spýtnık Mońǵolıanyń qajettilikterine beıimdelip, óńirlik spýtnıktik ınfraqurylymdy nyǵaıtady jáne Qazaqstannyń ǵarysh tehnologıalary salasyndaǵy áleýetiniń artyp kele jatqanyn kórsetedi", — dep atap ótti QR sıfrlyq damý, ınovasıalar jáne aeroǵarysh ónerkásibi mınıstri Jaslan Mádıev.
Qashyqtyqtan zondtaý tehnologıalary eki elge de jerdiń jaǵdaıyn tıimdirek baqylaýǵa, sý resýrstaryn basqarýǵa jáne qorshaǵan ortadaǵy ózgeristerdi taldaýǵa múmkindik beredi. Qazaqstan men Mońǵolıa ózderiniń tehnıkalyq quzyretterin biriktire otyryp, ekonomıkanyń ózekti máselelerin sheshýge jáne turaqty damýdy qoldaýǵa baǵyttalǵan quraldar ázirleıdi.
Joba Qazaqstannyń Ulttyq ǵarysh ortalyǵy bazasynda mońǵol ınjenerleriniń qatysýymen júzege asyrylady. Qazaqstandyq mamandar joba barysynda mońǵol áriptesterin oqytý mindetin óz moınyna alyp, qajetti bilimniń berilýi men kásibı baılanysty nyǵaıtýǵa úles qosady. Mundaı ózara árekettestik mońǵol ınjenerleriniń biliktiligin arttyryp, eki el arasyndaǵy ǵylymı jáne tehnıkalyq yntymaqtastyqty tereńdetedi.
Bul joba Qazaqstan men Mońǵolıanyń ozyq tehnologıalardy damytýǵa degen umtylysyn bildirip, ǵarysh salasy men tabıǵı resýrstardy turaqty paıdalanýda seriktestikke jańa perspektıvalar ashady dep kútiledi.
Aıta ketsek, 29 qazanda Memleket basshysy Qasym-Jomart Toqaev Mońǵolıaǵa resmı saparmen bardy. Qazaqstan Prezıdenti shaǵyn quramdaǵy kezdesýdiń qorytyndysyna joǵary baǵa berip, Mońǵolıamen memleketaralyq qarym-qatynasty odan ári damytýdyń basym baǵyttaryn aıqyndady. Al Ýhnaagıın Hýrelsýh Qasym-Jomart Toqaevtyń eki el arasyndaǵy taýar aınalymyn 500 mıllıon dollarǵa deıin jetkizý týraly usynysyn qoldady.
