قازاقستان پرەزيدەنتىنىڭ موڭعولياعا مەملەكەتتىك ساپارى اياسىندا جەردى قاشىقتىقتان زوندتاۋ جۇيەسىن قۇرۋ جانە دامىتۋعا باعىتتالعان تاريحي ينۆەستيسيالىق كەلىسىمگە قول قويىلدى. بۇل جوبا موڭعوليا ءۇشىن سپۋتنيك قۇرۋدى كوزدەيدى، ول جالپى قازاقستاندىق-موڭعولدىق سپۋتنيكتىك توپتامانىڭ قۇرامىنا كىرەدى، - دەپ حابارلايدى Dalanews.kz.
ءار تاراپتىڭ سپۋتنيكتەردى دەربەس باسقارۋى قازاقستان مەن موڭعولياعا تابيعي رەسۋرستاردى مونيتورينگىلەۋ جانە اۋىل شارۋاشىلىعىن دامىتۋ ءۇشىن قاجەتتى دەرەكتەرگە قول جەتكىزۋدى قامتاماسىز ەتەدى.
"ايرىقشا اتاپ وتەتىن جايت — بۇل قازاقستان تاريحىنداعى قازاقستاندىق ينجەنەرلەر تولىق ازىرلەگەن العاشقى ەكسپورتتىق سپۋتنيك بولماق. سپۋتنيك موڭعوليانىڭ قاجەتتىلىكتەرىنە بەيىمدەلىپ، وڭىرلىك سپۋتنيكتىك ينفراقۇرىلىمدى نىعايتادى جانە قازاقستاننىڭ عارىش تەحنولوگيالارى سالاسىنداعى الەۋەتىنىڭ ارتىپ كەلە جاتقانىن كورسەتەدى"، — دەپ اتاپ ءوتتى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ.
قاشىقتىقتان زوندتاۋ تەحنولوگيالارى ەكى ەلگە دە جەردىڭ جاعدايىن تيىمدىرەك باقىلاۋعا، سۋ رەسۋرستارىن باسقارۋعا جانە قورشاعان ورتاداعى وزگەرىستەردى تالداۋعا مۇمكىندىك بەرەدى. قازاقستان مەن موڭعوليا وزدەرىنىڭ تەحنيكالىق قۇزىرەتتەرىن بىرىكتىرە وتىرىپ، ەكونوميكانىڭ وزەكتى ماسەلەلەرىن شەشۋگە جانە تۇراقتى دامۋدى قولداۋعا باعىتتالعان قۇرالدار ازىرلەيدى.
جوبا قازاقستاننىڭ ۇلتتىق عارىش ورتالىعى بازاسىندا موڭعول ينجەنەرلەرىنىڭ قاتىسۋىمەن جۇزەگە اسىرىلادى. قازاقستاندىق ماماندار جوبا بارىسىندا موڭعول ارىپتەستەرىن وقىتۋ مىندەتىن ءوز موينىنا الىپ، قاجەتتى ءبىلىمنىڭ بەرىلۋى مەن كاسىبي بايلانىستى نىعايتۋعا ۇلەس قوسادى. مۇنداي ءوزارا ارەكەتتەستىك موڭعول ينجەنەرلەرىنىڭ بىلىكتىلىگىن ارتتىرىپ، ەكى ەل اراسىنداعى عىلىمي جانە تەحنيكالىق ىنتىماقتاستىقتى تەرەڭدەتەدى.
بۇل جوبا قازاقستان مەن موڭعوليانىڭ وزىق تەحنولوگيالاردى دامىتۋعا دەگەن ۇمتىلىسىن ءبىلدىرىپ، عارىش سالاسى مەن تابيعي رەسۋرستاردى تۇراقتى پايدالانۋدا سەرىكتەستىككە جاڭا پەرسپەكتيۆالار اشادى دەپ كۇتىلەدى.
ايتا كەتسەك، 29 قازاندا مەملەكەت باسشىسى قاسىم-جومارت توقايەۆ موڭعولياعا رەسمي ساپارمەن باردى. قازاقستان پرەزيدەنتى شاعىن قۇرامداعى كەزدەسۋدىڭ قورىتىندىسىنا جوعارى باعا بەرىپ، موڭعوليامەن مەملەكەتارالىق قارىم-قاتىناستى ودان ءارى دامىتۋدىڭ باسىم باعىتتارىن ايقىندادى. ال ۋحنااگيين حۋرەلسۋح قاسىم-جومارت توقايەۆتىڭ ەكى ەل اراسىنداعى تاۋار اينالىمىن 500 ميلليون دوللارعا دەيىن جەتكىزۋ تۋرالى ۇسىنىسىن قولدادى.
