Astanada 10 jyldan astam ýaqyt boiy áleýmettik osal sanattaǵy jalpy bilim beretin mektepterdiń túlekterine joǵary oqý oryndarynda kúndizgi oqý túri boiynsha bilim alýǵa áleýmettik kómek kórsetilip keledi. Biyl mundai kómek 50-den astam túlekke berildi. Osyǵan orai elordada arnaiy sertifikattardy tabystaý rásimi ótti,- dep habarlaidy Dalanews.kz
Is-sharaǵa elorda ákiminiń orynbasary Erik Meiirhan, qalalyq máslihat tóraǵasy Tabiǵat Zeinulqabden jáne birqatar JOO-nyń rektorlary qatysty.
Aita keteiik, áleýmettik kómek granttar túrinde myna sanattaǵy balalarǵa kórsetiledi:
- ata-anasynan aiyrylǵan balalarǵa;
- balalar úiiniń túlekterine;
- bala kezinen múgedektigi bar jandarǵa;
- ata-anasynyń qamqorlyǵynsyz qalǵan balalarǵa;
- asyraýshysynan aiyrylýyna bailanysty memlekettik járdemaqy alatyn azamattarǵa;
- kópbalaly otbasylardan shyqqan balalarǵa (sonyń ishinde eń kishi bala kámelet jasyna tolyp, ol joǵary oqý ornyna túskenge deiin arnaiy memlekettik járdemaqy tólemi toqtatylǵan jaǵdaida).
Astana qalasy ákiminiń orynbasary Erik Meiirhan elordada sapaly bilim berýdi damytýǵa jáne jastarǵa jaǵdai jasaýǵa erekshe kóńil bólinetinin atap ótti. Ol osy maqsatta áleýmettik bastamalar men ǵylymi jobalardy qoldaý kózdelgenin, sonyń arqasynda qalada jastardyń bilim alýyna jáne jas mamandardyń jumys isteýine qolaily orta qalyptasyp otyrǵanyn aitty.
Erik Meiirhannyń aitýynsha, qoldaý baǵdarlamalary kóp jyldan beri júzege asyrylyp keledi: tek 2008 jyldan beri júzdegen stýdent kómek alǵan, al biyl olardyń sany 50-den asty. Jalpy ártúrli baǵyttar boiynsha 438 maman daiyndalǵan, olardyń 331-i óz bilimin tabysty iske asyryp júr.
Ol jastardy qoldaý áleýmettik turaqtylyqty nyǵaityp, elordanyń ǵylymi áleýetin damytýǵa yqpal etetinin qosa aitty. Osylaisha, Astananyń bolashaq ósimine berik negiz qalanyp, jastarǵa oqýǵa, mamandyq boiynsha ózin júzege asyrýǵa jáne qala ómirine úles qosýǵa múmkindik jasalyp otyr.
Áleýmettik kómek otbasynyń jan basyna shaqqandaǵy ortasha tabysy eń tómengi kúnkóris deńgeiiniń tórt eselengen mólsherinen aspaǵan jaǵdaida aqshalai tólem túrinde beriledi.
Astana qalasy máslihatynyń tóraǵasy Tabiǵat Zeinulqabden memleket jastardy qoldaýǵa erekshe nazar aýdaratynyn, olardyń oqýyna jáne ózin-ózi júzege asyrýyna jaǵdai men múmkindik jasalyp jatqanyn atap ótti.
Ol kórsetilgen qoldaýdyń úmitti aqtaitynyna, al bilim alýshylardyń tabandylyq pen jaýapkershilik tanytatynyna senim bildirdi.
Aita keteiik, 2024-2025 oqý jylynda 22 stýdent oqýyn aiaqtady. Al 2008 jyldan beri qoldaý alǵan 438 túlektiń barlyǵy diplomdy maman atandy, olardyń 331-i tabysty jumys istep júr.
Biyl basymdyq meditsinalyq, pedagogikalyq jáne tehnikalyq baǵyttarǵa berildi.
Qazirgi tańda áleýmettik osal sanattaǵy 142 adam joǵary oqý oryndarynda bilim alyp jatyr, olardyń 88-i kelesi kýrsqa ótti.
