استانادا 10 جىلدان استام ۋاقىت بويى الەۋمەتتىك وسال ساناتتاعى جالپى ءبىلىم بەرەتىن مەكتەپتەردىڭ تۇلەكتەرىنە جوعارى وقۋ ورىندارىندا كۇندىزگى وقۋ ءتۇرى بويىنشا ءبىلىم الۋعا الەۋمەتتىك كومەك كورسەتىلىپ كەلەدى. بيىل مۇنداي كومەك 50-دەن استام تۇلەككە بەرىلدى. وسىعان وراي ەلوردادا ارنايى سەرتيفيكاتتاردى تابىستاۋ ءراسىمى ءوتتى،- دەپ حابارلايدى Dalanews.kz
ءىس-شاراعا ەلوردا اكىمىنىڭ ورىنباسارى ەرىك مەيىرحان، قالالىق ءماسليحات ءتوراعاسى تابيعات زەينۇلقابدەن جانە ءبىرقاتار جوو-نىڭ رەكتورلارى قاتىستى.
ايتا كەتەيىك، الەۋمەتتىك كومەك گرانتتار تۇرىندە مىنا ساناتتاعى بالالارعا كورسەتىلەدى:
- اتا-اناسىنان ايىرىلعان بالالارعا؛
- بالالار ءۇيىنىڭ تۇلەكتەرىنە؛
- بالا كەزىنەن مۇگەدەكتىگى بار جاندارعا؛
- اتا-اناسىنىڭ قامقورلىعىنسىز قالعان بالالارعا؛
- اسىراۋشىسىنان ايىرىلۋىنا بايلانىستى مەملەكەتتىك جاردەماقى الاتىن ازاماتتارعا؛
- كوپبالالى وتباسىلاردان شىققان بالالارعا (سونىڭ ىشىندە ەڭ كىشى بالا كامەلەت جاسىنا تولىپ، ول جوعارى وقۋ ورنىنا تۇسكەنگە دەيىن ارنايى مەملەكەتتىك جاردەماقى تولەمى توقتاتىلعان جاعدايدا).
استانا قالاسى اكىمىنىڭ ورىنباسارى ەرىك مەيىرحان ەلوردادا ساپالى ءبىلىم بەرۋدى دامىتۋعا جانە جاستارعا جاعداي جاساۋعا ەرەكشە كوڭىل بولىنەتىنىن اتاپ ءوتتى. ول وسى ماقساتتا الەۋمەتتىك باستامالار مەن عىلىمي جوبالاردى قولداۋ كوزدەلگەنىن، سونىڭ ارقاسىندا قالادا جاستاردىڭ ءبىلىم الۋىنا جانە جاس مامانداردىڭ جۇمىس ىستەۋىنە قولايلى ورتا قالىپتاسىپ وتىرعانىن ايتتى.
ەرىك مەيىرحاننىڭ ايتۋىنشا، قولداۋ باعدارلامالارى كوپ جىلدان بەرى جۇزەگە اسىرىلىپ كەلەدى: تەك 2008 جىلدان بەرى جۇزدەگەن ستۋدەنت كومەك العان، ال بيىل ولاردىڭ سانى 50-دەن استى. جالپى ءارتۇرلى باعىتتار بويىنشا 438 مامان دايىندالعان، ولاردىڭ 331ء-ى ءوز ءبىلىمىن تابىستى ىسكە اسىرىپ ءجۇر.
ول جاستاردى قولداۋ الەۋمەتتىك تۇراقتىلىقتى نىعايتىپ، ەلوردانىڭ عىلىمي الەۋەتىن دامىتۋعا ىقپال ەتەتىنىن قوسا ايتتى. وسىلايشا، استانانىڭ بولاشاق وسىمىنە بەرىك نەگىز قالانىپ، جاستارعا وقۋعا، ماماندىق بويىنشا ءوزىن جۇزەگە اسىرۋعا جانە قالا ومىرىنە ۇلەس قوسۋعا مۇمكىندىك جاسالىپ وتىر.
الەۋمەتتىك كومەك وتباسىنىڭ جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنىڭ ءتورت ەسەلەنگەن مولشەرىنەن اسپاعان جاعدايدا اقشالاي تولەم تۇرىندە بەرىلەدى.
استانا قالاسى ءماسليحاتىنىڭ ءتوراعاسى تابيعات زەينۇلقابدەن مەملەكەت جاستاردى قولداۋعا ەرەكشە نازار اۋداراتىنىن، ولاردىڭ وقۋىنا جانە ءوزىن-وزى جۇزەگە اسىرۋىنا جاعداي مەن مۇمكىندىك جاسالىپ جاتقانىن اتاپ ءوتتى.
ول كورسەتىلگەن قولداۋدىڭ ءۇمىتتى اقتايتىنىنا، ال ءبىلىم الۋشىلاردىڭ تاباندىلىق پەن جاۋاپكەرشىلىك تانىتاتىنىنا سەنىم ءبىلدىردى.
ايتا كەتەيىك، 2024-2025 وقۋ جىلىندا 22 ستۋدەنت وقۋىن اياقتادى. ال 2008 جىلدان بەرى قولداۋ العان 438 تۇلەكتىڭ بارلىعى ديپلومدى مامان اتاندى، ولاردىڭ 331ء-ى تابىستى جۇمىس ىستەپ ءجۇر.
بيىل باسىمدىق مەديسينالىق، پەداگوگيكالىق جانە تەحنيكالىق باعىتتارعا بەرىلدى.
قازىرگى تاڭدا الەۋمەتتىك وسال ساناتتاعى 142 ادام جوعارى وقۋ ورىندارىندا ءبىلىم الىپ جاتىر، ولاردىڭ 88ء-ى كەلەسى كۋرسقا ءوتتى.
