Sonymen birge áleýmettik salaǵa jaýapty aýdan, qala ákimderiniń orynbasarlary jáne jumyspen qamtý organdarynyń qyzmetkerleri shaqyrylǵan.
Oblys ákiminiń orynbasary áleýmettik qorǵaý salasynyń qyzmetkerlerin kásibı merekemen quttyqtap, olardyń qoǵamdaǵy, Túrkistan óńirin damytýdaǵy eńbegin joǵary baǵalady. Sala ardagerlerimen, qazir eńbek etip júrgen qyzmetkerlermen jáne múgedektigi bar azamattarmen kezdesip, usynys-pikirlerin tyńdady.
Saltanatty jıynda áleýmettik salanyń úzdik qyzmetkerleri QR Eńbek jáne áleýmettik qorǵaý mınıstrliginiń, Túrkistan oblysy ákimdiginiń, oblystyq máslıhattyń, «Nur Otan» partıasy Túrkistan oblystyq fılıalynyń jáne oblystyq kásipodaqtar uıymynyń gramotalary men Alǵyshattarymen marapattaldy.
Búginde Túrkistan oblysy boıynsha áleýmettik salada 4 myńǵa jýyq qyzmetker eńbek etedi.
Oblysta áleýmettik qorǵaý salasynda qamqorlyqty jáne kómekti qajet etetin jekelegen sanattaǵy turǵyndar sany 726,8 myńnan asady. Atap aıtsaq, 176,1 myń zeınetker, 96,9 myń múmkindigi shekteýli jan, az qamtamasyz etilgen 218,1 myń turǵyn bar. Kópbalaly otbasylar sany boıynsha Túrkistan óńiri kósh basynda. Oblysta «Altyn alqa», «Kúmis alqa» ıegerleri men kópbalaly analar sany 160,8 myńǵa jetti.
Óńirde halyqtyń áleýetin kóterý maqsatynda «Eńbek» memlekettik baǵdarlamasy, «Nur Otan» partıasynyń Jol kartasy júzege asyrylyp jatyr. «Eńbek» memlekettik baǵdarlamasyn júzege asyrýǵa 20,5 mlrd. teńge qaralyp, 78 myńnan astam adam jumyspen qamtý sharalaryna tartyldy. 2021 jyly az qamtylǵan azamattarǵa memlekettik búdjetten 37 mlrd. teńgeden astam qarajat bólinip, 218 myń adamǵa áleýmettik kómekter berilgen.
Múgedektigi bar azamattardy áleýmettik qoldaý baǵytynda áleýmettik qyzmetter portaly engizilip, kómekke muqtaj turǵyndar úshin qolaıly jaǵdaı jasalǵan.
