"QazMunaiGaz "UK" AQ (QMG) Basqarma tóraǵasynyń orynbasary Áset Maǵaýov ózderiniń kez kelgen qubylmaly baǵaǵa daiyn ekendikterin aitady. Al álemdik naryqta quldyrap jatqan munai baǵasy Qazaqstan naryǵyna asa bir qaýip tóndirmeitin kórinedi. Onyń aitýynsha, kompaniia óndirgen munaidyń shamamen 70%-y onsyz da ishki naryqta turaqty baǵamen satylady. Al baǵa qatty tómendegen jaǵdaiǵa degen kompaniianyń ázirlep qoiǵan balamaly stsenarileri men aldyn ala qarastyrylǵan yntalandyrý sharalary bar eken, dep habarlaidy Dalanews.kz.
Ol munai naryǵy aitarlyqtai qubylmaly ekenin, iaǵni kez kelgen geosaiasi nemese ekonomikalyq faktorlar munai baǵasynyń aitarlyqtai tómendeýine nemese kerisinshe ósýine ákelip soǵyp jatatynyn aitady.
"QazMunaiGazǵa" keletin bolsaq, onda biz óndirgen munaidyń shamamen 70%-y ishki naryqta satylady, onyń ústine bizdiń baǵalar eksporttyq baǵadan áldeqaida tómen. Tiisinshe, eksporttyq baǵa qubylyp jatqanda ishki baǵalar eń tómengi eksporttyq baǵadan da tómen kúiinde qala beredi. Iaǵni, "quldyrady" degen eksporttyq baǵanyń ózi ishki naryqtyq deńgeiden edáýir joǵary. Osy jaǵynan alǵanda, ishki naryqqa tiesili biz óndirgen munaidyń 70%-y baǵa túzetýleri jaǵdaiyna baǵynbaidy. Oǵan onsha táýeldi emes. Onyń ústine, elimizdegi janar-jaǵarmai men dizel otynynyń eksporty shekteýli, barlyǵy derlik óz ishimizde satylady. Al qalǵan bólikke keletin bolsaq, sarapshylar biylǵy jyly munaidyń bir barreli 65 dollar deńgeiinde saqtalatynyn aitady. Biraq baǵany dóp basyp, qazir eshkim boljai almaidy", – deidi ol.
Onyń pikirinshe, "QazMunaiGaz" úshin bul arada eshqandai qaýip joq.
"Baǵa qatty tómendegen jaǵdaiǵa degen daiyn turǵan bizde balama stsenariiler, aldyn ala aiqyndalǵan ońtailandyrý sharalary bar. Negizinde, biz kez kelgen qubylmaly munai baǵasyna daiynbyz. Qubylý kún saiyn oryn alýda. Bul arada uzaqmerzimdi trend mańyzdy. Sońǵy boljamdar bir barrel 65 dollar deńgeiinde qalyptasatynyn baiqatady", - deidi Áset Maǵaýov.
Munai baǵasynyń tómendeýine ol kóptegen faktor túrtki ekenin, al onyń ishinde qaisy birin bóle-jara ataý qiynyraq ekenin de jetkizdi.
Aita ketsek, Brent munaiynyń quny bir apta barysynda 10,34%-ǵa tómendep, bir barreli 59 dollar, al WTI 56 dollar boldy. Buǵan OPEC+ uiymynyń osyǵan deiin ustanyp kelgen strategiiasyn kúrt ózgertýi sebep ekeni aitylady. Demalys kúnderi atalǵan uiym maýsymnan bastap munaidyń táýligine óndirisi kólemin taǵy 400 myń barrelden asaǵa ósirý týraly sheshim qabyldady.
Buǵan deiin saitymyzda munai baǵasy 60 dollardan da tómendegeni, OPEK+ elderi munai óndirisi kólemin arttyryp jatqany, bul rette Úkimettiń ne qam jasap jatqany týraly maqala jariialanǵan bolatyn.
