"قازمۇنايگاز "ۇك" اق (قمگ) باسقارما تٶراعاسىنىڭ ورىنباسارى ەسەت ماعاۋوۆ ٶزدەرٸنٸڭ كەز كەلگەن قۇبىلمالى باعاعا دايىن ەكەندٸكتەرٸن ايتادى. ال ەلەمدٸك نارىقتا قۇلدىراپ جاتقان مۇناي باعاسى قازاقستان نارىعىنا اسا بٸر قاۋٸپ تٶندٸرمەيتٸن كٶرٸنەدٸ. ونىڭ ايتۋىنشا, كومپانييا ٶندٸرگەن مۇنايدىڭ شامامەن 70%-ى ونسىز دا ٸشكٸ نارىقتا تۇراقتى باعامەن ساتىلادى. ال باعا قاتتى تٶمەندەگەن جاعدايعا دەگەن كومپانييانىڭ ەزٸرلەپ قويعان بالامالى ستسەناريلەرٸ مەن الدىن الا قاراستىرىلعان ىنتالاندىرۋ شارالارى بار ەكەن, دەپ حابارلايدى Dalanews.kz.
ول مۇناي نارىعى ايتارلىقتاي قۇبىلمالى ەكەنٸن, ياعني كەز كەلگەن گەوساياسي نەمەسە ەكونوميكالىق فاكتورلار مۇناي باعاسىنىڭ ايتارلىقتاي تٶمەندەۋٸنە نەمەسە كەرٸسٸنشە ٶسۋٸنە ەكەلٸپ سوعىپ جاتاتىنىن ايتادى.
"قازمۇنايگازعا" كەلەتٸن بولساق, وندا بٸز ٶندٸرگەن مۇنايدىڭ شامامەن 70%-ى ٸشكٸ نارىقتا ساتىلادى, ونىڭ ٷستٸنە بٸزدٸڭ باعالار ەكسپورتتىق باعادان ەلدەقايدا تٶمەن. تيٸسٸنشە, ەكسپورتتىق باعا قۇبىلىپ جاتقاندا ٸشكٸ باعالار ەڭ تٶمەنگٸ ەكسپورتتىق باعادان دا تٶمەن كٷيٸندە قالا بەرەدٸ. ياعني, "قۇلدىرادى" دەگەن ەكسپورتتىق باعانىڭ ٶزٸ ٸشكٸ نارىقتىق دەڭگەيدەن ەدەۋٸر جوعارى. وسى جاعىنان العاندا, ٸشكٸ نارىققا تيەسٸلٸ بٸز ٶندٸرگەن مۇنايدىڭ 70%-ى باعا تٷزەتۋلەرٸ جاعدايىنا باعىنبايدى. وعان ونشا تەۋەلدٸ ەمەس. ونىڭ ٷستٸنە, ەلٸمٸزدەگٸ جانار-جاعارماي مەن ديزەل وتىنىنىڭ ەكسپورتى شەكتەۋلٸ, بارلىعى دەرلٸك ٶز ٸشٸمٸزدە ساتىلادى. ال قالعان بٶلٸككە كەلەتٸن بولساق, ساراپشىلار بيىلعى جىلى مۇنايدىڭ بٸر باررەلٸ 65 دوللار دەڭگەيٸندە ساقتالاتىنىن ايتادى. بٸراق باعانى دٶپ باسىپ, قازٸر ەشكٸم بولجاي المايدى", – دەيدٸ ول.
ونىڭ پٸكٸرٸنشە, "قازمۇنايگاز" ٷشٸن بۇل ارادا ەشقانداي قاۋٸپ جوق.
"باعا قاتتى تٶمەندەگەن جاعدايعا دەگەن دايىن تۇرعان بٸزدە بالاما ستسەنارييلەر, الدىن الا ايقىندالعان وڭتايلاندىرۋ شارالارى بار. نەگٸزٸندە, بٸز كەز كەلگەن قۇبىلمالى مۇناي باعاسىنا دايىنبىز. قۇبىلۋ كٷن سايىن ورىن الۋدا. بۇل ارادا ۇزاقمەرزٸمدٸ ترەند ماڭىزدى. سوڭعى بولجامدار بٸر باررەل 65 دوللار دەڭگەيٸندە قالىپتاساتىنىن بايقاتادى", - دەيدٸ ەسەت ماعاۋوۆ.
مۇناي باعاسىنىڭ تٶمەندەۋٸنە ول كٶپتەگەن فاكتور تٷرتكٸ ەكەنٸن, ال ونىڭ ٸشٸندە قايسى بٸرٸن بٶلە-جارا اتاۋ قيىنىراق ەكەنٸن دە جەتكٸزدٸ.
ايتا كەتسەك, Brent مۇنايىنىڭ قۇنى بٸر اپتا بارىسىندا 10,34%-عا تٶمەندەپ, بٸر باررەلٸ 59 دوللار, ال WTI 56 دوللار بولدى. بۇعان OPEC+ ۇيىمىنىڭ وسىعان دەيٸن ۇستانىپ كەلگەن ستراتەگيياسىن كٷرت ٶزگەرتۋٸ سەبەپ ەكەنٸ ايتىلادى. دەمالىس كٷندەرٸ اتالعان ۇيىم ماۋسىمنان باستاپ مۇنايدىڭ تەۋلٸگٸنە ٶندٸرٸسٸ كٶلەمٸن تاعى 400 مىڭ باررەلدەن اساعا ٶسٸرۋ تۋرالى شەشٸم قابىلدادى.
بۇعان دەيٸن سايتىمىزدا مۇناي باعاسى 60 دوللاردان دا تٶمەندەگەنٸ, وپەك+ ەلدەرٸ مۇناي ٶندٸرٸسٸ كٶلەمٸن ارتتىرىپ جاتقانى, بۇل رەتتە ٷكٸمەتتٸڭ نە قام جاساپ جاتقانى تۋرالى ماقالا جارييالانعان بولاتىن.
