Memlekettik hatshy Gúlshara Ábdihalyqovanyń nazaryna!
Bir-eki kún buryn «Er Nýr & Nika» qazaq-káris dostyǵy qoǵamdyq qorynyń basshysy Ignatii Tio Qaraǵandy qalasy ákimi Nurlan Áýbákirovtyń qabyldaýynda bolyp Viktor Tsoiǵa Qaraǵandyda eskertkish ornatý týraly bastama kótergen. Qala ákimi bastamany birden qoldapty. Jýyqta Tsoidyń eskertkishi ortalyq Qazaqstannan boi kóterse, tań qalmańyz.
Árine, mýzykant, akter, ánshi Viktor Tsoidyń talantyna tabynýshylardyń kóp ekeni málim. Onyń Qazaqstanda týyp-óskenin de jurt biledi. Biraq, Tsoidan buryn Qaraǵandyda Alash qairatkerlerine áli kúnge deiin nege kóshe berilip, eskertkish ornatylmai keledi degen saýal kókirekti kemirip jatqany uzaq jyl boldy.
Byltyr Álihan Bókeihannyń IýNESKO kóleminde toilanǵan 150 jyldyǵynda Qaraǵandy oblysynyń burynǵy ákimi Nurmuhambet Ábdibekov oblys ortalyǵynan bir aýdannyń aty Á.Bókeihannyń atyna berý josparlanyp otyrǵanyn aityp, qýantqan edi. Alaida, ol másele jospar kúiinde qaldy. Ákim ketti. Jańa ákim keldi. Al, qala ákiminiń áreketi – anaý. Anaý deitinimiz, Qaraǵandy qalasynda kúni búginge deiin Lenin, Oktiabr qatarly sovettik kósheler myzǵymai tur. Táýelsizdigimizge shirek ǵasyrdan ýaqyt assa da Qaraǵandyda Alash arystary oryn tabylmai turǵanyn qalai, nemen túsindirýge bolady? Bizdiń she, Úkimetten eshkim Alash qairatkerlerine eskertkish ornatpańdar, kóshe ataýyn bermeńder degen tikelei tapsyrma bermeidi. Bul – jergilikti ákim-qaralardyń nieti men erik-jigerine bailanystyn. Oblys ortalyǵynda ózge etnos ókilderinen qaimyǵyp, sovettik ókimet kósemderimen kúresinge tastai almaityn ákimderden qandai iskerlik, nendei batyl qadamdar kútýge bolady? Tarihi tulǵalardy tuǵyryna qondyra almai otyrǵan Qaraǵandy oblys, qala ákimderdi búgingi tiri qazaqtyń múddesin qorǵaidy, qamyn oilaidy degen kim senedi?! Alashtyń 100 jyldyǵy bolsa, bastalyp ketti. Álihan Bókeihannyń týǵan jeri, Álimhan Ermekovtiń qyzmet istep, eńbegi sińgen meken – Qaraǵandy oblysyndaǵy Alashtyń taǵdyry osyndai bolǵanda ózge aimaqtarǵa ne dersiń.
Aimaq basshy bolǵan talai ákimge hat jazyp, másele kótergen sol óńirdegi ziialylardyń daýsy jergilikti biliktiń qulaǵyna jetpedi. Biz de ákim-qaralardan qairan bolmasyn bilip, memlekettik hatshy Gúlshara Ábdihalyqovanyń nazaryna osy máseleni jetkizgimiz keledi. Óitkeni, tarihty, tarihi tulǵalardy ulyqtaý, qoǵamdy biriktirý men uiystyrýdaǵy memlekettik mańyzy bar ideologiialyq is.
P.S. Qazaq-káris dostyǵy qorynyń basshysy Ignatii myrza shynymen qazaq-káris dostyǵyn tý etip ustaǵan azamat bolsa, Alashtyń 100 jyldyǵyna orai Qaraǵandy qalasyndaǵy Lenin kóshesin Álihan Bókeihanovtyń atyna berip, eskertkish ornatyp, Álimhan Ermekov turǵan úige eskertkish taqta ornataiyq dep usynys nege kótermedi eken degen bir suraq kókeiimizde áli tur...
Nura Matai
Abai.kz
