Kásipker, Dariǵa Nazarbaevanyń burynǵy qudasy Qairat Boranbaev Reseide alaiaqtardyń qurbany boldy. Belgisiz adamdar onyń jyljymaityn múlkin jalǵan qujattar arqyly satyp jibergen, dep habarlaidy Dalanews.kz.
"Vyhod k moriý" málimetinshe, bul kezde Boranbaev Qazaqstanda iri kólemde urlyq jasady degen aiyppen qamaýda otyrǵan edi. Eki jylǵa jýyq sot daýlarynyń nátijesinde mámile jaramsyz dep tanylyp, múlik qaita iesine qaitaryldy. Sarapshylardyń paiymynsha, bul is onyń kórshisi ári isker seriktesi Timýr Qulybaevtyń qoldaýynsyz sheshilmegen bolýy múmkin.
Boranbaev ózine tiesili «Konsaltinggaz» JShS-niń aýdit esebinen belgili bolǵandai, áńgime eki jer telimi men ǵimarattarǵa qatysty bolǵan. Olardyń kadastrlyq quny 157,8 mln rýbl dep kórsetilgen. Kompaniia balansynda bar iri nysandardyń biri Podmoskovedegi úi 2023 jyly satylyp ketken, sondyqtan sipattamaǵa sáikes kelmeidi. Al «Gazprom» top-menedjerlerine arnalǵan jabyq «Bogorodskoe» kottedj qalashyǵyndaǵy Boranbaevtyń jyljymaityn múlki eseptegi kórsetkishterge dál keledi.
Onda kásipkerdiń ieliginde 86 sotyq jer, 1,8 myń sharshy metrlik bas úi, 425 sharshy metrlik qonaq úi jáne 411 sharshy metrlik aiaqtalmaǵan qurylys bolǵan. 2022 jylǵy kadastrlyq quny 148 mln rýbl bolsa, 2024 jylǵa qarai 157,8 mln rýblge jetken. Al naryqtaǵy naqty baǵasy 2023 jyly shamamen 1 mlrd rýbl nemese 5 mlrd teńge dep esepteldi.
Alaiaqtar Boranbaev qamaýda otyrǵanda, 2023 jyly osy múlikti satqanǵa uqsaidy. Ádette Reseide mundai sot protsesteri jyldar boiy sozylady. Biraq bul joly nebári bir jyldan sál asa ýaqyt ishinde mámile jaramsyz dep tanyldy. Buǵan yqpal etken jaǵdaidyń biri – Boranbaevtyń «Konsaltinggaz» JShS-i dál sol jyly osy múlikti Timýr Qulybaevtyń kompaniiasyna bereshekti qamtamasyz etý úshin kepilge qoiǵany. Onyń ústine qaryz reseilik qurylymǵa emes, Qairattyń aǵasy Talǵat Boranbaev basqaratyn qazaqstandyq «LPG Distribiýshn» seriktestigine qatysty bolǵan. Osy faktor mámileniń zańsyz dep tanylýyna áser etken bolýy múmkin.
Boranbaevtyń endi bul múlikte turmaityny anyq. Aýditorlyq esepke sáikes, ol atalǵan aktivti, sondai-aq kompaniia balansynda qalǵan kólikterdi biylǵy jyly satýdy josparlap otyr. Túsken qarjy – milliardtaǵan teńge – BAÁ-de tirkelgen Nexta FZE kompaniiasyna qaryzdy óteýge jumsalmaq. Aita ketsek, bul kompaniiany da Qairat Boranbaev baqylaýda ustaidy. Ol qamaýǵa alynardan birneshe ai buryn ǵana Latviia arqyly osy qurylymnyń shotyna 16 mlrd teńgege jýyq qarjy aýdarǵan.
Sarapshylar atap ótkendei, mundai shema qazir Máskeýdegi kóptegen aýqatty azamattar arasynda keń taralǵan. Qairat Boranbaev ta bul úrdisten tys qalǵan joq.
