كاسىپكەر، داريعا نازاربايەۆانىڭ بۇرىنعى قۇداسى قايرات بورانبايەۆ رەسەيدە الاياقتاردىڭ قۇربانى بولدى. بەلگىسىز ادامدار ونىڭ جىلجىمايتىن مۇلكىن جالعان قۇجاتتار ارقىلى ساتىپ جىبەرگەن، دەپ حابارلايدى Dalanews.kz.
"ۆىحود ك موريۋ" مالىمەتىنشە، بۇل كەزدە بورانبايەۆ قازاقستاندا ءىرى كولەمدە ۇرلىق جاسادى دەگەن ايىپپەن قاماۋدا وتىرعان ەدى. ەكى جىلعا جۋىق سوت داۋلارىنىڭ ناتيجەسىندە مامىلە جارامسىز دەپ تانىلىپ، مۇلىك قايتا يەسىنە قايتارىلدى. ساراپشىلاردىڭ پايىمىنشا، بۇل ءىس ونىڭ كورشىسى ءارى ىسكەر سەرىكتەسى تيمۋر قۇلىبايەۆتىڭ قولداۋىنسىز شەشىلمەگەن بولۋى مۇمكىن.
بورانبايەۆ وزىنە تيەسىلى «كونسالتينگگاز» ءجشس-نىڭ اۋديت ەسەبىنەن بەلگىلى بولعانداي، اڭگىمە ەكى جەر تەلىمى مەن عيماراتتارعا قاتىستى بولعان. ولاردىڭ كاداسترلىق قۇنى 157،8 ملن رۋبل دەپ كورسەتىلگەن. كومپانيا بالانسىندا بار ءىرى نىسانداردىڭ ءبىرى پودموسكوۆەدەگى ءۇي 2023 جىلى ساتىلىپ كەتكەن، سوندىقتان سيپاتتاماعا سايكەس كەلمەيدى. ال «گازپروم» توپ-مەنەدجەرلەرىنە ارنالعان جابىق «بوگورودسكوە» كوتتەدج قالاشىعىنداعى بورانبايەۆتىڭ جىلجىمايتىن مۇلكى ەسەپتەگى كورسەتكىشتەرگە ءدال كەلەدى.
وندا كاسىپكەردىڭ يەلىگىندە 86 سوتىق جەر، 1،8 مىڭ شارشى مەترلىك باس ءۇي، 425 شارشى مەترلىك قوناق ءۇي جانە 411 شارشى مەترلىك اياقتالماعان قۇرىلىس بولعان. 2022 جىلعى كاداسترلىق قۇنى 148 ملن رۋبل بولسا، 2024 جىلعا قاراي 157،8 ملن رۋبلگە جەتكەن. ال نارىقتاعى ناقتى باعاسى 2023 جىلى شامامەن 1 ملرد رۋبل نەمەسە 5 ملرد تەڭگە دەپ ەسەپتەلدى.
الاياقتار بورانبايەۆ قاماۋدا وتىرعاندا، 2023 جىلى وسى مۇلىكتى ساتقانعا ۇقسايدى. ادەتتە رەسەيدە مۇنداي سوت پروسەستەرى جىلدار بويى سوزىلادى. ءبىراق بۇل جولى نەبارى ءبىر جىلدان ءسال اسا ۋاقىت ىشىندە مامىلە جارامسىز دەپ تانىلدى. بۇعان ىقپال ەتكەن جاعدايدىڭ ءبىرى – بورانبايەۆتىڭ «كونسالتينگگاز» ءجشس-ى ءدال سول جىلى وسى مۇلىكتى تيمۋر قۇلىبايەۆتىڭ كومپانياسىنا بەرەشەكتى قامتاماسىز ەتۋ ءۇشىن كەپىلگە قويعانى. ونىڭ ۇستىنە قارىز رەسەيلىك قۇرىلىمعا ەمەس، قايراتتىڭ اعاسى تالعات بورانبايەۆ باسقاراتىن قازاقستاندىق «LPG ديستريبيۋشن» سەرىكتەستىگىنە قاتىستى بولعان. وسى فاكتور مامىلەنىڭ زاڭسىز دەپ تانىلۋىنا اسەر ەتكەن بولۋى مۇمكىن.
بورانبايەۆتىڭ ەندى بۇل مۇلىكتە تۇرمايتىنى انىق. اۋديتورلىق ەسەپكە سايكەس، ول اتالعان اكتيۆتى، سونداي-اق كومپانيا بالانسىندا قالعان كولىكتەردى بيىلعى جىلى ساتۋدى جوسپارلاپ وتىر. تۇسكەن قارجى – ميللياردتاعان تەڭگە – باا-دە تىركەلگەن Nexta FZE كومپانياسىنا قارىزدى وتەۋگە جۇمسالماق. ايتا كەتسەك، بۇل كومپانيانى دا قايرات بورانبايەۆ باقىلاۋدا ۇستايدى. ول قاماۋعا الىناردان بىرنەشە اي بۇرىن عانا لاتۆيا ارقىلى وسى قۇرىلىمنىڭ شوتىنا 16 ملرد تەڭگەگە جۋىق قارجى اۋدارعان.
ساراپشىلار اتاپ وتكەندەي، مۇنداي سحەما ءقازىر ماسكەۋدەگى كوپتەگەن اۋقاتتى ازاماتتار اراسىندا كەڭ تارالعان. قايرات بورانبايەۆ تا بۇل ۇردىستەن تىس قالعان جوق.
