Alataý qalasynda merdiger uńǵymany burǵylaý jumystaryn jobalyq qujattamasyz, saraptamasyz jáne tiisti habarlamasyz júrgizgen,- dep habarlaidy Dalanews.kz Almaty oblysy ákimdiginiń baspasóz qyzmetine silteme jasap.
Zarechnyi shaǵynaýdanynda ótken kóshpeli keńes barysynda «LH AL» JShS-ǵa tiesili qurylys nysanynda ruqsat qujattarynsyz jer qazý jumystary júrgizilgeni belgili boldy. Tekserý nátijesinde kompaniianyń Qazaqstan Respýblikasynyń qurylys zańnamalaryn saqtamai jumys júrgizip jatqany anyqtalǵan.
Oblys ákimi zańbuzýshylyqtardy qatań synǵa alyp, tiisti sharalar qabyldanatynyn atap ótti.
– Biz retsiz qurylysqa jáne jer men ekologiiaǵa nemquraily qaraýǵa jol bermeimiz. Barlyq jumystar zań talaptaryna sáikes júrgizilýi tiis, – dedi Marat Sultanǵaziev.
Osyǵan bailanysty ákim birqatar memlekettik organdarǵa naqty tapsyrmalar júktedi. Almaty oblysynyń Memlekettik sáýlet-qurylys baqylaý basqarmasyna «LH AL» JShS nysanyndaǵy barlyq qurylys jumystaryn tiisti jobalyq jáne ruqsat qujattary tolyq rettelgenge deiin toqtatý tapsyryldy. Alataý qalasynyń ákimdigine ýákiletti organdarmen birlese otyryp, uńǵymanyń ózdiginen aǵýyn joiý boiynsha is-sharalar josparyn ázirleý mindetteldi.
Sonymen qatar, «BABI» respýblikalyq memlekettik kásipornyna uńǵymanyń aǵýyn joiý protsesine turaqty baqylaý ornatý tapsyryldy. Almaty oblysynyń Ekologiia departamenti tarapynan uńǵymadan taraǵan sýdyń qorshaǵan ortaǵa áserin baǵalap, tiisti ekologiialyq monitoring júrgizilýi qajet. Al Tótenshe jaǵdailar departamentine nysanda tótenshe jaǵdaidyń týyndaýyna jol bermeý maqsatynda baqylaýdy qamtamasyz etý júkteldi.
Tabiǵat qorǵaý prokýratýrasy men Politsiia departamentine zańnama talaptarynyń saqtalýyna baqylaý ornatyp, quqyqtyq sharalar qabyldaý tapsyryldy. Oblys ákiminiń apparatyna bul jaǵdai boiynsha oblystyq deńgeidegi tiisti qurylymdardyń áreketsizdigi týraly ortalyq memlekettik organdarǵa usynys joldaý mindeti júkteldi. Sonymen qatar, «LH AL» JShS-ǵa anyqtalǵan zańbuzýshylyqtardy joiý boiynsha kún saiyn Alataý qalasy ákimdigine esep berip otyrý tapsyryldy.
Atalǵan másele oblys ákiminiń jeke baqylaýynda. Quqyqtyq baǵa berý úshin barlyq materialdar ýákiletti organdarǵa joldanady. Ekologiia salasyndaǵy mamandardyń pikiri men qosymsha aqparattar keiinirek usynylady.
