الاتاۋ قالاسىندا مەردىگەر ۇڭعىمانى بۇرعىلاۋ جۇمىستارىن جوبالىق قۇجاتتاماسىز، ساراپتاماسىز جانە ءتيىستى حابارلاماسىز جۇرگىزگەن،- دەپ حابارلايدى Dalanews.kz الماتى وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.
زارەچنىي شاعىناۋدانىندا وتكەن كوشپەلى كەڭەس بارىسىندا «LH AL» جشس-عا تيەسىلى قۇرىلىس نىسانىندا رۇقسات قۇجاتتارىنسىز جەر قازۋ جۇمىستارى جۇرگىزىلگەنى بەلگىلى بولدى. تەكسەرۋ ناتيجەسىندە كومپانيانىڭ قازاقستان رەسپۋبليكاسىنىڭ قۇرىلىس زاڭنامالارىن ساقتاماي جۇمىس جۇرگىزىپ جاتقانى انىقتالعان.
وبلىس اكىمى زاڭبۇزۋشىلىقتاردى قاتاڭ سىنعا الىپ، ءتيىستى شارالار قابىلداناتىنىن اتاپ ءوتتى.
– ءبىز رەتسىز قۇرىلىسقا جانە جەر مەن ەكولوگياعا نەمقۇرايلى قاراۋعا جول بەرمەيمىز. بارلىق جۇمىستار زاڭ تالاپتارىنا سايكەس جۇرگىزىلۋى ءتيىس، – دەدى مارات سۇلتانعازييەۆ.
وسىعان بايلانىستى اكىم ءبىرقاتار مەملەكەتتىك ورگاندارعا ناقتى تاپسىرمالار جۇكتەدى. الماتى وبلىسىنىڭ مەملەكەتتىك ساۋلەت-قۇرىلىس باقىلاۋ باسقارماسىنا «LH AL» ج ش س نىسانىنداعى بارلىق قۇرىلىس جۇمىستارىن ءتيىستى جوبالىق جانە رۇقسات قۇجاتتارى تولىق رەتتەلگەنگە دەيىن توقتاتۋ تاپسىرىلدى. الاتاۋ قالاسىنىڭ اكىمدىگىنە ۋاكىلەتتى ورگاندارمەن بىرلەسە وتىرىپ، ۇڭعىمانىڭ وزدىگىنەن اعۋىن جويۋ بويىنشا ءىس-شارالار جوسپارىن ازىرلەۋ مىندەتتەلدى.
سونىمەن قاتار، «بابي» رەسپۋبليكالىق مەملەكەتتىك كاسىپورنىنا ۇڭعىمانىڭ اعۋىن جويۋ پروسەسىنە تۇراقتى باقىلاۋ ورناتۋ تاپسىرىلدى. الماتى وبلىسىنىڭ ەكولوگيا دەپارتامەنتى تاراپىنان ۇڭعىمادان تاراعان سۋدىڭ قورشاعان ورتاعا اسەرىن باعالاپ، ءتيىستى ەكولوگيالىق مونيتورينگ جۇرگىزىلۋى قاجەت. ال توتەنشە جاعدايلار دەپارتامەنتىنە نىساندا توتەنشە جاعدايدىڭ تۋىنداۋىنا جول بەرمەۋ ماقساتىندا باقىلاۋدى قامتاماسىز ەتۋ جۇكتەلدى.
تابيعات قورعاۋ پروكۋراتۋراسى مەن پوليسيا دەپارتامەنتىنە زاڭناما تالاپتارىنىڭ ساقتالۋىنا باقىلاۋ ورناتىپ، قۇقىقتىق شارالار قابىلداۋ تاپسىرىلدى. وبلىس اكىمىنىڭ اپپاراتىنا بۇل جاعداي بويىنشا وبلىستىق دەڭگەيدەگى ءتيىستى قۇرىلىمداردىڭ ارەكەتسىزدىگى تۋرالى ورتالىق مەملەكەتتىك ورگاندارعا ۇسىنىس جولداۋ مىندەتى جۇكتەلدى. سونىمەن قاتار، «LH AL» جشس-عا انىقتالعان زاڭبۇزۋشىلىقتاردى جويۋ بويىنشا كۇن سايىن الاتاۋ قالاسى اكىمدىگىنە ەسەپ بەرىپ وتىرۋ تاپسىرىلدى.
اتالعان ماسەلە وبلىس اكىمىنىڭ جەكە باقىلاۋىندا. قۇقىقتىق باعا بەرۋ ءۇشىن بارلىق ماتەريالدار ۋاكىلەتتى ورگاندارعا جولدانادى. ەكولوگيا سالاسىنداعى مامانداردىڭ پىكىرى مەن قوسىمشا اقپاراتتار كەيىنىرەك ۇسىنىلادى.
