Qazaqstanda meditsina kadrlarynyń tapshylyǵy jii aitylǵanymen, óńirlerge barǵan jas mamandarǵa jasalatyn naqty jaǵdai kóńil kónshitpei otyr. Bul týraly Ánel Jumadil esimdi jas dáriger áleýmettik jelide ashyq málimdedi, dep habarlaidy Dalanews.kz.
Onyń aitýynsha, ózin Alataý qalasyna dáriger retinde jumysqa shaqyrǵan. Jumys berýshi tarapynan qyzmettik páter berý jáne turǵyn úige arnalǵan kótermeaqy qarastyrylatyny aitylǵan. Osy ýádelerge senip, ol resmi túrde jumysqa ornalasqan. Alaida qyzmettik turǵyn úidi dárigerge tek arada ýaqyt ótken soń ǵana kórsetken.
«Mundai jerde adam tura almaidy»
Dárigerdiń sózinshe, aldymen usynylǵan páterdiń jaǵdaiy tym nashar bolǵan.
«Alǵash kórsetilgen páterdi tipti videoǵa da túsire almadym. Ishinde araq bótelkeleri shashylyp jatyr, jóndeý jumystary jasalmaǵan, tóbesi opyrylǵan, antisanitariia. Men birden bas tartýǵa májbúr boldym», – deidi ol.
Onyń aitýynsha, jaýapty tulǵalar bul páterlerde «múgedekter men basqa da adamdar turyp jatyr» dep jaýap bergen.
«Sonda mundai turǵyn úidi kez kelgen adamǵa, tipti tegin bolsa da, qalai usynýǵa bolady? Mundai jaǵdai dáriger túgili, basqa adam da tura almaidy», – dep jazdy dáriger.
«Jóndelgen» ekinshi páter de kóńil kónshitpedi
Ánel Jumadil keiin ekinshi qyzmettik páter kórsetilgenin aitady. Alaida jaýapty mekeme «jóndeý júrgizilgen» dep aitqan bul úidiń de jaǵdaiy talapqa sai bolmaǵan.
«Munda jóndeý jumystary júrgen dep aitýǵa kelmeidi. Bul – dárigerdiń turýyna arnalǵan jaǵdai emes», – deidi ol.
Dáriger bul jaǵdaidy «Jańa Qazaqstan» uǵymymen sáikestendirý qiyn ekenin ashyq jazǵan.
9,8 mln teńge týraly ýáde qaida qaldy?
Jas maman taǵy bir mańyzdy jaitty kóterdi. Onyń aitýynsha, jumysqa qabyldanar kezde ózine turǵyn úi satyp alýǵa 9,8 mln teńge kóleminde qarjy beriletini resmi túrde aitylǵan.
«Osy ýádeniń negizinde men sheshim qabyldadym, jumysqa shyqtym, buiryq shyqty. Al búgin ǵana bul baǵdarlamanyń 15 jeltoqsannan keiin jabylǵanyn aitty», – deidi ol.
Dáriger bul jaǵdaidy jaýapsyzdyq dep baǵalaidy.
«Aldymen memlekettik qoldaý ýáde etip, adamdy resmi jumysqa ornalastyryp, keiin birjaqty túrde “baǵdarlama joq” degendi qalai túsinemiz? Bul jeke kompaniia emes, bul – adamdardyń júiege degen senimine jaýapty memlekettik qurylymdar», – dep jazdy ol.
Ánel Jumadil bul máseleni jeke jaǵdai retinde emes, júielik problema retinde kóterip otyrǵanyn aitady.
«Dárigerler óńirlerge barýdan “barǵysy kelmegennen” emes, osyndai kózqarastan barǵysy kelmeidi. Mundai jaǵdaida ómir súrý de, jumys isteý de múmkin emes», – deidi ol.
Jas dáriger naqty áreket pen tekserý júrgizýdi talap etti.
«Dáriger – ekinshi sortty adam emes. Qyzmettik turǵyn úi – jertóle emes, kirgenniń ózine uialatyn jer bolmaýy kerek», – dep jazdy ol.
Sondai-aq jazbasynda ol jergilikti bilik pen memleket basshysyna úndeý jasap, kómek surady.
Biz bul jaittyń mán-jaiyn Alataý qalasynyń ákimdiginen anyqtaýǵa tyrysamyz. Aqparat qosymsha habarlanatyn bolady.
