Ótken jyldary respýblikalyq mańyzy bar «Taldyqorǵan-Úsharal», «Úsharal-Dostyq» avtomobil joldary qaita jańǵyrtýdan ótkizilip, el igiligine qoldanysqa berilgen bolatyn. Endigi kezekte aýdannyń oblystyq jáne jergilikti mańyzy bar avtomobil joldary kezeń-kezeńimen jóndeledi. Bul týraly oblys ákimi Beibit Isabaevtyń Alakól aýdanynyń turǵyndarymen kezdesýi kezinde aityldy,- dep habarlaidy Dalanews.kz
Oblys ákimi kezdesý barysynda aýdandaǵy infraqurylymdy damytý týraly turǵyndarǵa keńinen aityp berdi.
- Aýyldyq jerlerdegi joldyń jaǵdaiy – halyqtyń kúndelikti ómirine tikelei áser etetin mańyzdy máseleniń biri. Sondyqtan biyl aýdannyń jergilikti mańyzy bar avtomobil joldaryn jóndeý men kútip ustaýǵa 3,6 mlrd. teńge qarastyrylyp otyr. Onyń ishinde oblystyq mańyzy bar Qabanbai-Toqjailaý, Qabanbai-Lepsi baǵytyndaǵy avtomobil joldarynda asfalt jamylǵylaryn kesý, sý ótkizý qubyryn aýystyrý jumystary júrgizilýde. Bul jumystardyń qarqynyn arttyrý kerek. Biyl kúzde qurylys jumystary aiaqtalady. Oblystyń avtomobil joldary basqarmasy jol qurylysyn ýaqytyly jáne sapaly aiaqtalýyn qamtamasyz etýi tiis, - dedi Beibit Isabaev.
Óńir basshysynyń sózine súiensek, Jambyl aýylyna kireberis, Arqarly aýylyna deiingi avtojoldar da jóndeledi. On eldi mekenniń 24 kóshesine ortasha jóndeý jumystary júrgizilýde. Sonyń ishinde Úsharal, Budyr, Qazaqstan, Balapanov, Qabanbai, Arharly, Jylandy, Qamysqala aýyldarynda jóndeý jumystary bitti, qalǵan Qainar, Janama aýyldaryndaǵy jóndeý jumystary qarashada aiaqtalady.
Aýyz sý máselesine kelsek, aýdandaǵy 56 eldi mekenniń 48-i ortalyqtandyrylǵan sýmen qamtamasyz etilgen. Al Qońyr aýyly aýyz sýǵa biyl qosylady. Qalǵan 7 aýylda kóp degende 20-dan astam úi ǵana turatyndyqtan, olardy ortalyq sý júiesin tartý ekonomikalyq jaǵynan tiimsiz bolyp otyr.
- Ótken jyly aýyz sý sapasyn jaqsartý úshin Bibaqan aýyly ortalyq sýmen jabdyqtaý júiesine qosylyp, Terekti, Kóktuma, Ekpindi aýyldarynda qaita jańǵyrtý júrgizilgen bolatyn. Sondai-aq Toqjailaý aýylynda osyndai jeliniń qurylysy aiaqtaldy, qazirgi ýaqytta iske qosý jumystary júrip jatyr. Ózderińizdiń ótinishterińiz boiynsha Bulaqty aýylynda sý jelilerin qaita jańǵyrtýǵa qujattar ázirlenip, saraptamadan ótkizildi. Kelesi jylǵa respýblikalyq biýdjetke ótinim berildi, - dedi aýyz máselesine egjei-tegjeili toqtalǵan oblys ákimi.
Sol siiaqty turǵyndar tarapynan ortalyq jylýmen qamtamasyz etý máselesi birneshe ret kóterilgeni eskerilip, Úsharal qalasynda ortalyq qazandyqty qaita jańǵyrtý jobasy iske asyryla bastady. Qajetti qarajat tolyǵymen bólindi. Búgingi kúni jumystar 80%-ǵa oryndalǵan. Nysan jylytý maýsymyna deiin iske qosylady.
