Abai oblysynyń ákimi Berik Ýáli jumys saparymen Maqanshy aýdanyna keldi. Aimaq basshysy saparyn Alakól kóliniń jaǵalaýynda júrgizilip jatqan abattandyrý jumystarymen tanysýdan bastady, – dep habarlaidy Dalanews.kz
Buǵan deiin turǵyndar tarapynan jaǵalaýdaǵy Arbattyń jaǵdaiyna bailanysty syn kóp aitylǵan edi. Qazirgi ýaqytta Arbat jańartylyp, boiaý, syrlaý jumystary júrgizilýde. Budan bólek jaǵalaýdaǵy eskirgen temir jaqtaýlar tolyq aýystyrylýda.
"Biyl oblys ákimdiginen bólingen qarajatqa týristik aimaqta aýqymdy jumys júrgiziledi. Jaǵalaýdaǵy 5 shaqyrymǵa jýyq jolǵa asfalt tóseledi, 10 modýldi, 15 biodárethana, 40-tan astam kiim aýystyratyn kabinalar qoiylady, qoqys jáshikteri men beinebaqylaý kameralarynyń sany artady. Jaǵalaýdy nyǵaitý úshin pirs jáne qalqyma ornatylady", - deidi aýdan ákimi Dáýren Qoigeldin.
Týrister kóp keletin Arbattyń júktemesin azaitý úshin jańa qoǵamdyq keńistik salynady. Munda 100 adamǵa arnalǵan saýda-sattyq oryndary qarastyrylady, úlken sahna, sýburqaq salynady, turǵyndar serýendeitin arnaiy alań bolady.
Qazirgi ýaqytta jerdi tegisteý, keramikalyq taqtaishalardy tóseý jáne qorshaý ornatý jumystary bastalǵan. Qoǵamdyq keńistik qurylysy 1 shildege deiin aiaqtalady. Aimaq basshysy Arbat pen jaǵalaýdy aralap, jańa qoǵamdyq keńistiktiń ornyn kórip, aýdan ákimine abattandyrý jumysyn sapaly ári ýaqtyly aiaqtaýdy tapsyrdy.
"Osydan eki ai buryn Alakólge arnaiy kelip, qajettilikterdi bilip, barlyq máselelermen tanysqan bolatynmyn. Halyq kóp keletin týristik aimaqta 2018 jyldan beri jóndeý jumystary júrgizilmegen eken. Osyny eskere otyryp, oblystyq biýdjetten 658 million teńge qarjy bóldik. Qazir abattandyrý jumystary qarqyndy júrgizilip jatyr. Maqsatymyz – demalýshylarǵa jaily jaǵdai jasaý. Sýǵa túsý maýsymy ashylǵanǵa deiin barlyq jumysty sapaly aiaqtaýymyz kerek",- dedi oblys ákimi.
Jazǵy demalys maýsymynda Alakól jaǵalaýynda qaýipsizdikti qamtamasyz etý úshin 40 politsiia qyzmetkeri jumyldyrylady. Órt qaýipsizdigin saqtaý maqsatynda Tótenshe jaǵdailar departamentiniń qyzmetkerleri kezekshilikke tartylyp, órt sóndirý kólikteri jumys isteidi.
