Ál-Farabi atyndaǵy Qazaq ulttyq ýniversitetiniń aǵa oqytýshysy, PhD doktor Aijan Nuǵymanova jańa páterdiń iesi atandy,- dep habarlaidy Dalanews.kz Ál-Farabi atyndaǵy QazUÝ-dyń baspasóz qyzmetine silteme jasap.
Baspana sertifikatyn QR ǵylym jáne joǵary bilim ministri Saiasat Nurbek ǵylym salasyndaǵy syilyqtar men memlekettik stipendiia laýreattaryn marapattaý rásiminde saltanatty túrde tabystady.
Aijan Oljabekqyzy – Ál-Farabi atyndaǵy QazUÝ-dyń jáne «Bolashaq» halyqaralyq baǵdarlamasynyń túlegi, sondai-aq «Jas ǵalym» jobasynyń grant iegeri. Jas zertteýshi 10 jyldan astam ýaqyt boiy ýniversitette tabandy jumys istep keledi.
«Jas ǵalymdardyń atynan Memleket basshysy Qasym-Jomart Toqaevqa óz alǵysymdy bildirgim keledi. Bizge senimmen qarap, jańa páterdiń kiltin tabystap jatyr. Bul óz kezeginde biz úshin úlken jaýapkershilik júkteidi. Búginge deiin ózimniń baspanam bolmady. Jaldamaly páterde turdym. Endi aldaǵy ýaqytta ózimniń páterimde turatyn bolamyn. Óte qýanyshtymyn», – deidi Aijan Nuǵymanova.
Qazirgi tańda Aijan Oljabekqyzy jylý almasý protsesterin 3D modeldeý boiynsha zertteý jumystaryn júrgizedi. Ǵylymi joba Qazaqstan aýmaǵyndaǵy qazandyqtardyń janý kamerasynda tómen surypty otyndy jaǵý kezinde jylý men massa almasý protsesterin jáne ziiandy zattardyń túzilýin anyqtaýǵa arnalǵan. Jas zertteýshi Aijan Nuǵymanova atalǵan joba boiynsha Qazaqstanda alǵashqylardyń biri bolyp zertteý ústinde.
Esterińizge salsaq, buǵan deiin Ál-Farabi atyndaǵy QazUÝ-dyń 11 jas ǵalymy QR Prezidenti Qasym-Jomart Toqaevtyń atynan baspana kiltin alǵan bolatyn. Atap aitsaq olar: Erǵali Qurmanov, Sámet Baijuma, Nurgúl Amangeldi, Áigerim Qýanbai, Oljas Qurmanbaev, Ajar Málik, Janar Raimbekova, Ásel Abdýllaeva, Qairat Keńes, Sholpan Tletai jáne Kamilla Abdildina.
