ءال-فارابي اتىنداعى قازاق ۇلتتىق ۋنيۆەرسيتەتىنىڭ اعا وقىتۋشىسى، PhD دوكتور ايجان نۇعىمانوۆا جاڭا پاتەردىڭ يەسى اتاندى،- دەپ حابارلايدى Dalanews.kz ءال-فارابي اتىنداعى قازۇۋ-دىڭ باسپا ءسوز قىزمەتىنە سىلتەمە جاساپ.
باسپانا سەرتيفيكاتىن ق ر عىلىم جانە جوعارى ءبىلىم ءمينيسترى ساياسات نۇربەك عىلىم سالاسىنداعى سىيلىقتار مەن مەملەكەتتىك ستيپەنديا لاۋرەاتتارىن ماراپاتتاۋ راسىمىندە سالتاناتتى تۇردە تابىستادى.
ايجان ولجابەك قىزى – ءال-فارابي اتىنداعى قازۇۋ-دىڭ جانە «بولاشاق» حالىقارالىق باعدارلاماسىنىڭ تۇلەگى، سونداي-اق «جاس عالىم» جوباسىنىڭ گرانت يەگەرى. جاس زەرتتەۋشى 10 جىلدان استام ۋاقىت بويى ۋنيۆەرسيتەتتە تاباندى جۇمىس ىستەپ كەلەدى.
«جاس عالىمداردىڭ اتىنان مەملەكەت باسشىسى قاسىم-جومارت توقايەۆقا ءوز العىسىمدى بىلدىرگىم كەلەدى. بىزگە سەنىممەن قاراپ، جاڭا پاتەردىڭ كىلتىن تابىستاپ جاتىر. بۇل ءوز كەزەگىندە ءبىز ءۇشىن ۇلكەن جاۋاپكەرشىلىك جۇكتەيدى. بۇگىنگە دەيىن ءوزىمنىڭ باسپانام بولمادى. جالدامالى پاتەردە تۇردىم. ەندى الداعى ۋاقىتتا ءوزىمنىڭ پاتەرىمدە تۇراتىن بولامىن. وتە قۋانىشتىمىن»، – دەيدى ايجان نۇعىمانوۆا.
قازىرگى تاڭدا ايجان ولجابەك قىزى جىلۋ الماسۋ پروسەستەرىن 3D مودەلدەۋ بويىنشا زەرتتەۋ جۇمىستارىن جۇرگىزەدى. عىلىمي جوبا قازاقستان اۋماعىنداعى قازاندىقتاردىڭ جانۋ كامەراسىندا تومەن سۇرىپتى وتىندى جاعۋ كەزىندە جىلۋ مەن ماسسا الماسۋ پروسەستەرىن جانە زياندى زاتتاردىڭ ءتۇزىلۋىن انىقتاۋعا ارنالعان. جاس زەرتتەۋشى ايجان نۇعىمانوۆا اتالعان جوبا بويىنشا قازاقستاندا العاشقىلاردىڭ ءبىرى بولىپ زەرتتەۋ ۇستىندە.
ەستەرىڭىزگە سالساق، بۇعان دەيىن ءال-فارابي اتىنداعى قازۇۋ-دىڭ 11 جاس عالىمى ق ر پرەزيدەنتى قاسىم-جومارت توقايەۆتىڭ اتىنان باسپانا كىلتىن العان بولاتىن. اتاپ ايتساق ولار: ەرعالي قۇرمانوۆ، سامەت بايجۇما، نۇرگۇل امانگەلدى، ايگەرىم قۋانباي، ولجاس قۇرمانبايەۆ، اجار مالىك، جانار رايمبەكوۆا، اسەل ابدۋللايەۆا، قايرات كەڭەس، شولپان تلەتاي جانە كاميللا ابديلدينا.
