Almatydaǵy Ál-Farabi dańǵylynda birneshe adamnyń ómirin qiǵan jol apatynan keiin qoǵamda kúdiktini keshirý jáne jeńil jaza suraý máselesi qyzý talqylanyp jatyr. Osyǵan bailanysty marqumdardyń týysy Kúlánda Batyrbekova pikir bildirip, mundai isterde eń kóp zardap shegetin tarap – jetim qalǵan balalar ekenin aitty, dep habarlaidy dalanews.kz.
Onyń sózinshe, qoǵamda rezonans týdyrǵan jol apattarynan keiin marqumdardyń týystary kúdiktilerdi keshirip, sottan shartty jaza suraityn jaǵdailar jii kezdesedi. Alaida syrttai meiirim nemese kelisim bolyp kóringen mundai sheshimderdiń astarynda basqa máseleler bolýy múmkin.
Batyrbekova adam qaza tapqannan keiin onyń artynda ata-anasy, baýyrlary jáne kámeletke tolmaǵan balalary qalýy múmkin ekenin atap ótti. Onyń pikirinshe, mundai jaǵdaida eń aldymen marqumnyń balasynyń quqyǵy qorǵalýy tiis.
«Ákesiniń jylýynsyz qalǵan, endi ómir jolyn tireksiz bastaýǵa májbúr bolatyn – sol bala. Sondyqtan barlyq materialdyq kómek pen ótemaqy eń aldymen sol balanyń bolashaǵyna jumsalýy kerek», – dedi ol.
Sonymen qatar ol sot protsesteri men kelissózder kezinde kóbine eresek týystar belsendi rólge shyǵyp ketetinin aitty. Onyń sózinshe, kei jaǵdaida ótemaqy qarajaty baýyrlar nemese ózge týystar arasynda bólinip, al marqumnyń balasy nazardan tys qalyp jatady.
«Keide dál osy adamdar jábirlenýshi mártebesin paidalanyp, keshirý týraly qujattarǵa qol qoiady. Al jetim qalǵan bala eshteńesiz qalady», – dedi Batyrbekova.
Marqumdardyń týysy qoǵam mundai jaǵdailardyń tasada qalmaýy kerek dep esepteidi. Onyń aitýynsha, qoǵam rezonansty ister boiynsha qabyldanatyn sheshimderdiń shynaiy sebepterin bilýge quqyly.
«Kóp jaǵdaida mundai “tatýlasý” ádilet úshin jasalǵan mámile emes. Bul – eń álsiz taraptyń, iaǵni kishkentai balanyń múddesi aiaqasty bolatyn kelisim», – dedi ol.
Sondai-aq Batyrbekova eresek, eńbekke qabiletti týystardyń qylmystyq is taǵdyryn sheship, qarajatty ózderi ielenýin moraldyq másele dep atady.
Ol azamat ári salyq tóleýshi retinde adam ólimine ákelgen jol apattary boiynsha tatýlasý institýtyn qaita qaraý qajet dep esepteitinin jetkizdi.
«Adam ómirin qiǵany úshin jaza bultartpas bolýy kerek. Elge qaýipsiz joldar men jaýapty júrgizýshiler qajet, al aqshasy barlarǵa arnalǵan zańdaǵy olqylyqtar emes», – dedi ol.
Budan bólek, Batyrbekova ótemaqy tólenetin jaǵdaida memleket pen sottar qarajattyń qaida jumsalatynyn qatań baqylaýy qajet dep sanaidy. Onyń pikirinshe, aqsha marqumdardyń balalaryna arnalǵan arnaiy maqsatty esepshottarǵa aýdarylýy tiis.
«Biz quqyqtyq ári qaýipsiz qoǵamda ómir súrgimiz keledi. Al quqyqtyq qoǵam eń aldymen balalardy qorǵaýdan jáne zań buzǵandardyń jaýapkershilikten jaltarmaýynan bastalady. Adam óliminen biznes jasaýdy toqtatý kerek. Kináliler jazasyn alýy tiis, al jetim qalǵan balalar zańmen qorǵalýy kerek», – dep túiindedi ol.
Eske salaiyq, Almatydaǵy Ál-Farabi dańǵylynda adam ólimine ákelgen jol apaty boiynsha jábirlenýshi tarap kúdikti Aleksandr Pakpen tatýlasqanyn málimdep, sottan oǵan bas bostandyǵynan aiyrmaityn jaza taǵaiyndaýdy suraǵan bolatyn.
Oqi otyryńyz:
