Pavlodar qalasynyń prokýrorlary halyqqa meditsinalyq kómek kórsetýge jaýapty "Áleýmettik meditsinalyq saqtandyrý qory" KEAQ-qa júrgizilgen tekseris barysynda birqatar zańbuzýshylyqty áshkereledi, dep habarlaidy Dalanews.kz.
Vedomstvo málimetinshe, nevropatolog, kardiolog, hirýrg, psiholog jáne basqa da mamandar qaitys bolǵan adamdardy "qabyldaǵany" kórsetilgen. Sondai-aq, akýsher-ginekologtyń qyzmeti er adamdarǵa "kórsetilgen" jaǵdailar tirkelgen. Budan bólek, meditsinalyq qyzmetterdi qaitalap kórsetý arqyly qosarlanǵan tólem alý derekteri belgili boldy.
Tekseris barysynda tiisti sertifikattary men ruqsat qujattary joq tulǵalar em júrgizgeni de anyqtalǵan. Qadaǵalaý aktileri negizinde zańbuzýshylyqtardy joiý, qajet qujattardy rásimdeý jáne kinálilerdi jaýapkershilikke tartý jumystary qolǵa alynǵan.
Qabyldanǵan sharalar nátijesinde 100 million teńgeden asa shyǵyn óteldi. Qazir sotta meditsina salasynda zańsyz kásipkerlikpen ainalysyp, 62 million teńge kólemindegi biýdjet qarajatyn jymqyrý jáne 41 million teńge kóleminde zalal keltirý deregi boiynsha eki qylmystyq is qaralyp jatyr.
