Qaitarylǵan aktivterdi basqarý kompaniiasy 13 milliard teńgeden astam tabys tapty. Jinalǵan qarajat esebinen eldiń aimaqtarynda mektepter, balabaqshalar jáne sport keshenderin salý josparlanýda, - dep habarlaidy Dalanews.kz Inbusiness.kz saityna silteme jasap.
Qazaqstan biligi birneshe jyldan beri zańsyz iemdenilgen nemese alynǵan qarajatty el biýdjetin qaitarýmen belsendi ainalysyp keledi. Keibir jaǵdailarda memleket múlikti qylmystyq is aiasynda tárkileidi, al keide menshik ieleri sotqa deiingi tekserýden qutylý úshin zańsyz alynǵan múlikti óz erkimen «Qaitarylǵan aktivterdi basqarý kompaniiasyna» (QABK) tapsyrady. Inbusiness.kz portalynyń málimetinshe, qazirgi ýaqytta kompaniiaǵa jalpy somasy 89,9 milliard teńgeni quraityn 70 nysan berilgen.
QABK 2023 jyly qurylǵanymen, óziniń is júzindegi jumysyn 2024 jyly bastady. Búginde kompaniianyń basqarýynda «Dýman» qonaq úi kesheni, kásiporyndardyń jarǵylyq kapitalyna qatysý úlesteri («Jarkent sý», «Tulpar»), óndiristik baza, ashana, janarmai quiý stantsiialary, jer ýchaskeleri, aiaqtalmaǵan qurylystar jáne 2,8 milliard teńge somasyna zergerlik buiymdar bar.
Sonymen qatar, Qazaqstan shetelden jalpy somasy 29,89 milliard teńgeni quraityn aktivterdi qaitardy:
- BAÁ: 2 villa jáne 2 avtokólik (17,09 mlrd teńge);
- Resei: 5 páter, 5 qoima jáne 5 avtoturaq orny (4,78 mlrd teńge);
- Túrkiia: 2 úi jáne 1 páter (4,20 mlrd teńge);
- Frantsiia: 4 páter (3,82 mlrd teńge).
2024 jyldyń shildesinen beri kompaniia 12,6 milliard teńgege aktivterdi satty, onyń ishinde 8,2 milliard teńge Qazaqstan aýmaǵynda, al 4,4 milliard teńge sheteldegi múlikten tústi. Mysaly, BAÁ-de Aston Martin jáne Rolls-Royce markaly kólikteri satyldy, al Túrkiiada Bodrýmdaǵy eki úi men Ystanbuldaǵy páter ótkizildi.
Barlyq túsken qarajat Arnaiy memlekettik qorǵa (AMQ) baǵyttalyp, áleýmettik jáne ekonomikalyq jobalardy qarjylandyrýǵa jumsalýda.
Aktivterden qoǵamǵa qandai paida bar?
Joǵaryda aitylǵandai, aktivterdi satýdan túsken qarajat Arnaiy memlekettik qorǵa jiberiledi. Búgingi tańda Respýblikalyq biýdjettik komissiia osy qarajat esebinen kelesi nysandardyń qurylysyn maquldady:
- Aqmola oblysy Zerendi aýylynda jáne Almaty oblysy Jalanash aýylynda sport keshenderi;
- Túrkistan oblysy Temirlan aýylynda balalar mýzyka mektebi;
- Abai oblysy Semei qalasynda 18 jastan asqan adamdarǵa arnalǵan psihonevrologiialyq mekeme;
- Aqtóbe qalasynda erekshe balalarǵa arnalǵan 300 oryndyq balabaqsha;
- Shymkent qalasyndaǵy Sairam internat-kolledjine arnalǵan jataqhana;
- Petropavlda 280 oryndyq balabaqsha;
- Ulytaý oblysy Manadyr stantsiiasy men Qarajal qalasynda 80 oryndyq eki qabatty mektepter;
- Jetisý oblysy Rýdnichnyi aýylynda 200 oryndyq mektep jáne 30 oryndyq shaǵyn ortalyq;
- Jetisý oblysy Kóksai aýylynda 60 oryndyq mektep.
