قايتارىلعان اكتيۆتەردى باسقارۋ كومپانياسى 13 ميلليارد تەڭگەدەن استام تابىس تاپتى. جينالعان قاراجات ەسەبىنەن ەلدىڭ ايماقتارىندا مەكتەپتەر، بالاباقشالار جانە سپورت كەشەندەرىن سالۋ جوسپارلانۋدا، - دەپ حابارلايدى Dalanews.kz Inbusiness.kz سايتىنا سىلتەمە جاساپ.
قازاقستان بيلىگى بىرنەشە جىلدان بەرى زاڭسىز يەمدەنىلگەن نەمەسە الىنعان قاراجاتتى ەل بيۋدجەتىن قايتارۋمەن بەلسەندى اينالىسىپ كەلەدى. كەيبىر جاعدايلاردا مەملەكەت مۇلىكتى قىلمىستىق ءىس اياسىندا تاركىلەيدى، ال كەيدە مەنشىك يەلەرى سوتقا دەيىنگى تەكسەرۋدەن قۇتىلۋ ءۇشىن زاڭسىز الىنعان مۇلىكتى ءوز ەركىمەن «قايتارىلعان اكتيۆتەردى باسقارۋ كومپانياسىنا» (قابك) تاپسىرادى. Inbusiness.kz پورتالىنىڭ مالىمەتىنشە، قازىرگى ۋاقىتتا كومپانياعا جالپى سوماسى 89،9 ميلليارد تەڭگەنى قۇرايتىن 70 نىسان بەرىلگەن.
قابك 2023 جىلى قۇرىلعانىمەن، ءوزىنىڭ ءىس جۇزىندەگى جۇمىسىن 2024 جىلى باستادى. بۇگىندە كومپانيانىڭ باسقارۋىندا «دۋمان» قوناق ءۇي كەشەنى، كاسىپورىنداردىڭ جارعىلىق كاپيتالىنا قاتىسۋ ۇلەستەرى («جاركەنت سۋ»، «تۇلپار»)، وندىرىستىك بازا، اسحانا، جانارماي قۇيۋ ستانسيالارى، جەر ۋچاسكەلەرى، اياقتالماعان قۇرىلىستار جانە 2،8 ميلليارد تەڭگە سوماسىنا زەرگەرلىك بۇيىمدار بار.
سونىمەن قاتار، قازاقستان شەتەلدەن جالپى سوماسى 29،89 ميلليارد تەڭگەنى قۇرايتىن اكتيۆتەردى قايتاردى:
- ءباا: 2 ۆيللا جانە 2 اۆتوكولىك (17،09 ملرد تەڭگە)؛
- رەسەي: 5 پاتەر، 5 قويما جانە 5 اۆتوتۇراق ورنى (4،78 ملرد تەڭگە)؛
- تۇركيا: 2 ءۇي جانە 1 پاتەر (4،20 ملرد تەڭگە)؛
- فرانسيا: 4 پاتەر (3،82 ملرد تەڭگە).
2024 جىلدىڭ شىلدەسىنەن بەرى كومپانيا 12،6 ميلليارد تەڭگەگە اكتيۆتەردى ساتتى، ونىڭ ىشىندە 8،2 ميلليارد تەڭگە قازاقستان اۋماعىندا، ال 4،4 ميلليارد تەڭگە شەتەلدەگى مۇلىكتەن ءتۇستى. مىسالى، باا-دە Aston Martin جانە Rolls-Royce ماركالى كولىكتەرى ساتىلدى، ال تۇركيادا بودرۋمداعى ەكى ءۇي مەن ىستانبۇلداعى پاتەر وتكىزىلدى.
بارلىق تۇسكەن قاراجات ارنايى مەملەكەتتىك قورعا (امق) باعىتتالىپ، الەۋمەتتىك جانە ەكونوميكالىق جوبالاردى قارجىلاندىرۋعا جۇمسالۋدا.
اكتيۆتەردەن قوعامعا قانداي پايدا بار؟
جوعارىدا ايتىلعانداي، اكتيۆتەردى ساتۋدان تۇسكەن قاراجات ارنايى مەملەكەتتىك قورعا جىبەرىلەدى. بۇگىنگى تاڭدا رەسپۋبليكالىق بيۋدجەتتىك كوميسسيا وسى قاراجات ەسەبىنەن كەلەسى نىسانداردىڭ قۇرىلىسىن ماقۇلدادى:
- اقمولا وبلىسى زەرەندى اۋىلىندا جانە الماتى وبلىسى جالاناش اۋىلىندا سپورت كەشەندەرى؛
- تۇركىستان وبلىسى تەمىرلان اۋىلىندا بالالار مۋزىكا مەكتەبى؛
- اباي وبلىسى سەمەي قالاسىندا 18 جاستان اسقان ادامدارعا ارنالعان پسيحونيەۆرولوگيالىق مەكەمە؛
- اقتوبە قالاسىندا ەرەكشە بالالارعا ارنالعان 300 ورىندىق بالاباقشا؛
- شىمكەنت قالاسىنداعى سايرام ينتەرنات-كوللەدجىنە ارنالعان جاتاقحانا؛
- پەتروپاۆلدا 280 ورىندىق بالاباقشا؛
- ۇلىتاۋ وبلىسى مانادىر ستانسياسى مەن قاراجال قالاسىندا 80 ورىندىق ەكى قاباتتى مەكتەپتەر؛
- جەتىسۋ وبلىسى رۋدنيچنىي اۋىلىندا 200 ورىندىق مەكتەپ جانە 30 ورىندىق شاعىن ورتالىق؛
- جەتىسۋ وبلىسى كوكساي اۋىلىندا 60 ورىندىق مەكتەپ.
