Dezinsektsiia júrgizý aimaqtary retinde Túrkistan, Kentaý, Arys qalalary men Saýran, Otyrar, Shardara aýdandary belgilengen. Zalalsyzdandyrylatyn aýmaq kólemi – 7 713,1 gektardy quraidy.
Shirkeilerge qarsy himiialyq óńdeý jumystary tiisti deńgeide júrgizilip jatqan joq. Osylai degen oblys ákimi sala basshylaryn qatań synǵa aldy. Kemshilikterge jol bergeni úshin salaǵa jaýapty basqarma basshysyna qoldanystaǵy zańnama aiasynda tiisti shara qoldanýdy tapsyrdy.
– Jyl bastalmai jatyp, shybyn-shirkeimen kúreske saqadai sai bolý qajet ekeni talai ret eskertildi. Qazir turǵyndar tarapynan nege shaǵym kóp? Shuǵyl túrde ziiankesterge qarsy dárileý, dezinsektsiialaý jumystaryn sapaly júrgizýdi, onyń barysyn baqylaýdy kúsheitýdi tapsyramyn. Másele qatań baqylaýda. Atqarylyp jatqan jumystardyń barysy týraly apta saiyn baiandalsyn, – dedi oblys ákimi.
Dezinsektsiia sharalaryn jáne ǵylymi súiemeldeýdi merdiger «Satti Tulik» JShS ótkizýde. Biylǵa bul maqsatqa 644,4 mln teńge qaralǵan. Zalalsyzdandyrý jumystary oblys aýmaǵynda naýryz aiynan bastap júzege asyrylýda. Ǵylymi zerdeleý jumystaryna 10 adam jáne dezinsektsiia sharalaryna 62 tehnika, 77 adam tartylǵan.
Shirkeilerdiń sanyn azaitýdyń tiimdi ádisi retinde Syrdariia ózenine biologiialyq preparatpen óńdeý ádisi qoldanylady. Mamandardyń aitýynsha, bul – Syrdariia ózenniń florasy men faýnasyna qaýip tóndirmeidi. Jándikterdiń sanyn azaitýǵa baǵyttalǵan. Dezinsektsiialyq is-sharalardy júrgizý kezinde saqtyq sharalaryn ustaný asa mańyzdy.
