دەزينسەكسيا جۇرگىزۋ ايماقتارى رەتىندە تۇركىستان، كەنتاۋ، ارىس قالالارى مەن ساۋران، وتىرار، شاردارا اۋداندارى بەلگىلەنگەن. زالالسىزداندىرىلاتىن اۋماق كولەمى – 7 713،1 گەكتاردى قۇرايدى.
شىركەيلەرگە قارسى حيميالىق وڭدەۋ جۇمىستارى ءتيىستى دەڭگەيدە جۇرگىزىلىپ جاتقان جوق. وسىلاي دەگەن وبلىس اكىمى سالا باسشىلارىن قاتاڭ سىنعا الدى. كەمشىلىكتەرگە جول بەرگەنى ءۇشىن سالاعا جاۋاپتى باسقارما باسشىسىنا قولدانىستاعى زاڭناما اياسىندا ءتيىستى شارا قولدانۋدى تاپسىردى.
– جىل باستالماي جاتىپ، شىبىن-شىركەيمەن كۇرەسكە ساقاداي ساي بولۋ قاجەت ەكەنى تالاي رەت ەسكەرتىلدى. ءقازىر تۇرعىندار تاراپىنان نەگە شاعىم كوپ؟ شۇعىل تۇردە زيانكەستەرگە قارسى دارىلەۋ، دەزينسەكسيالاۋ جۇمىستارىن ساپالى جۇرگىزۋدى، ونىڭ بارىسىن باقىلاۋدى كۇشەيتۋدى تاپسىرامىن. ماسەلە قاتاڭ باقىلاۋدا. اتقارىلىپ جاتقان جۇمىستاردىڭ بارىسى تۋرالى اپتا سايىن باياندالسىن، – دەدى وبلىس اكىمى.
دەزينسەكسيا شارالارىن جانە عىلىمي سۇيەمەلدەۋدى مەردىگەر «Satti Tulik» ج ش س وتكىزۋدە. بيىلعا بۇل ماقساتقا 644،4 ملن تەڭگە قارالعان. زالالسىزداندىرۋ جۇمىستارى وبلىس اۋماعىندا ناۋرىز ايىنان باستاپ جۇزەگە اسىرىلۋدا. عىلىمي زەردەلەۋ جۇمىستارىنا 10 ادام جانە دەزينسەكسيا شارالارىنا 62 تەحنيكا، 77 ادام تارتىلعان.
شىركەيلەردىڭ سانىن ازايتۋدىڭ ءتيىمدى ءادىسى رەتىندە سىرداريا وزەنىنە بيولوگيالىق پرەپاراتپەن وڭدەۋ ءادىسى قولدانىلادى. مامانداردىڭ ايتۋىنشا، بۇل – سىرداريا وزەننىڭ فلوراسى مەن فاۋناسىنا ءقاۋىپ توندىرمەيدى. جاندىكتەردىڭ سانىن ازايتۋعا باعىتتالعان. دەزينسەكسيالىق ءىس-شارالاردى جۇرگىزۋ كەزىندە ساقتىق شارالارىن ۇستانۋ اسا ماڭىزدى.
