Memlekettik qyzmet isteri agenttiginiń tóraǵasy Darhan Jazyqbai «Aiqyn» gazetine bergen suhbatynda ákimderdiń biliktiligin arttyrý jáne qaita daiarlaý baǵdarlamasynyń mańyzdylyǵy týraly aitty,- dep habarlaidy Dalanews.kz
Bilimdi úzdiksiz jetildirý – qajettilik
Bilim berý úzdiksiz júretin protsess, sondyqtan bilim zamanǵa sai ózgerip, jańaryp otyrýy zańdylyq. Máselen, osydan on jyl buryn alǵan bilim, qazirgi ǵylymi-tehnologiialyq progrestiń qarqyndy damýyna bailanysty jańa zaman talaptaryna jaýap bere almaýy da yqtimal. Osyǵan orai zaman kóshine ilesý úshin bilimdi úzdiksiz jetildirip otyrý mańyzdy. Bilimdi jetildirý barysynda qazirgi zamannyń ǵylymi-tehnikalyq jetistikterin tiimdi paidalaný zaman talaby.
Aýyl ákimderin sailaý 2021 jyldan bastaldy. Bul elimizdegi memlekettik basqarý isindegi jańa júiege ainaldy. Aýyl ákimine sailanýǵa Konstitýtsiiaǵa sáikes Qazaqstan azamattary túse alady. Memleket basshysy Qasym-Jomart Kemeluly Toqaev halyqqa Joldaýynda «Azamattardyń sońǵy jyldardaǵy taǵy bir talaby – ákimderdi tikelei sailaý júiesin engizý. Bul talap ta oryndaldy... Halyq ózi tańdaǵan ákimderdiń quramy edáýir jańardy» degen bolatyn. Sailanǵan ákimderdiń ishinde el arasynan shyqqan, buryn mektepte ustaz bolǵan, jeke kásipte júrgen túrli salanyń mamandary bar. Aýyl ákimderiniń shamamen 40%-nyń (919 ákim) atqaryp jatqan laýazymdaǵy merzimi eki jyldan da aspaidy. Sáikesinshe 213 ákimniń jalpy memlekettik qyzmettegi tájiribesi eki jyldan az.
Sailanǵan ákimderdiń tiimdiligin arttyrýǵa qoldaý kórsetý
Keibir aqparat resýrstarynda ákimderdi oqytýdyń qajeti qansha, olardyń bilimi jetkiliksiz bolsa nege sailandy degen pikirler aitylyp júr. Osy rette, memleket halyq tańdaýymen sanasatynyn aitý oryndy. Demek, bul sailaýshylardyń senimine ie bolyp, tańdalǵan ákimderge memleket tarapynan jasalǵan qoldaý ekenin umytpaǵan jón. Sebebi, sailanǵan ákimderdiń memlekettik basqarý, jergilikti ózin-ózi basqarý isinde, salyq kodeksi men tórtinshi deńgeidegi biýdjetti tiimdi igerý men basqarý, memlekettik satyp alý, investitsiialyq jobalardy tartý jáne ózge de kóptegen salalyq baǵyttardan tájiribesin shyńdap, arnaiy quzyretin arttyrý kerek. Sebebi, atalǵan salalar boiynsha jetkilikti deńgeidegi quzyretterdiń bolmaýy múmkin. Osyǵan bailanysty, halyq óz tańdaýyn jasaǵandyqtan, memleket sailanǵan ákimderdiń bilimin jetildirý men tiimdiligin arttyrýǵa qoldaý kórsetýdi basty mindetterdiń biri retinde qarastyratynyn túsinýimiz qajet.
Ákimderdiń biliktiligin arttyrý qalai uiymdastyrylýda?
Ákimderdiń biliktiligin arttyrý Memlekettik qyzmet isteri agenttiginiń úilestirýimen jáne Prezident janyndaǵy Memlekettik basqarý akademiiasynyń uiymdastyrýymen júzege asyrylýda. Ákimderdi qaita daiarlaýǵa «Amanat» partiiasy da qatysyp otyr. Bul baǵdarlama barlyq deńgeide sailanǵan aýdan, aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimderine arnalǵan.
Baǵdarlamanyń negizgi maqsaty
Oqytýdyń negizgi maqsaty – ákimderdiń kásibi quzyrettiligin arttyrý, basqarýshylyq daǵdylaryn damytý jáne jergilikti basqarýdyń tiimdiligin arttyrý. Olarǵa zamanaýi basqarý ádisterin meńgerý, jergilikti turǵyndardyń qajettilikterin tiimdi sheshý jáne óńirdi damytýǵa baǵyttalǵan qajetti bilim men daǵdylar beriledi.
Ákimderdi oqytý baǵdarlamasy interaktivti formatta júrgiziledi, ol praktikalyq tapsyrmalar, strategiialyq josparlaý boiynsha treningterdi qamtidy. Osylaisha, olar teoriialyq bilimdi naqty jumysynda qoldanýǵa múmkindik alady.
Bir sózben aitqanda baǵdarlamanyń basty maqsaty – jergilikti basqarý tiimdiligin arttyrý, aýyl halqynyń ál-aýqatyn jaqsartý jáne ákimderdiń qazirgi zamanǵy basqarýshylyq quzyretterin damytý.
1901 aýyl ákimi qaita daiarlaý kýrsynan ótýde
Elimizde Prezident Qasym-Jomart Toqaevtyń Úkimetke Memlekettik qyzmet isteri agenttigimen birlesip ákimderdiń biliktiligin arttyrý jumysyn iske asyrý boiynsha tapsyrmasyn oryndaý aiasynda aýdan, aýyl ákimderiniń biliktiligin arttyrýǵa jáne olardyń jańa tájirbie jinaqtaýyna baǵyttalǵan arnaiy qaita daiarlaý kýrstary ótýde.
Bul týraly Memlekettik qyzmet isteri agenttiginiń tóraǵasy Darhan Jazyqbai «Aiqyn» gazetine bergen suhbatynda aitty.
Qaita daiarlaý baǵdarlamasynyń mańyzdylyǵy
Baǵdarlama aiasynda sailanǵan barlyq aýdan, aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimderi oqytýdan ótedi. 2025 jylǵy aqpandaǵy jaǵdai boiynsha 1901 aýyl ákimi qaita daiarlaý kýrsynan ótýde. Al elimizdegi aýyl ákimderiniń jalpy sany – 2322. Bul kórsetkishten baǵdarlamanyń keń aýqymda júzege asyp jatqanyn ańǵarýǵa bolady. Qaita daiarlaý nátijesinde ákimderdiń quzyretteri artyp, jergilikti basqarýdy sapaly jańa deńgeige kóterýge oń serpin beredi
Baǵdarlamanyń basty baǵyttary
- Aýyldyq biýdjetti durys josparlaý jáne qarjyny tiimdi jumsaý
- Memlekettik satyp alý jáne salyqtyq túsimderdi basqarý
- Kommýnaldyq menshikti tiimdi basqarý
- Tsifrlandyrý men jańa tehnologiialardy aýyl sharýashylyǵyna engizý
Baǵdarlama 240 akademiialyq saǵattan turady. Oqytý 17 modýl boiynsha ótedi, olardyń árqaisysy ákimderdiń kásibi jáne basqarýshylyq daǵdylaryn damytýǵa baǵyttalǵan. Qaita daiarlaý nátijesinde ákimderdiń quzyretteri artyp, jergilikti basqarýdy sapaly jańa deńgeige kóterýge oń serpin beredi. Sebebi ákimderdiń quzyrettiligi men bilimi aýyldyń ekonomikalyq jáne áleýmettik damýyna tikelei yqpal etedi.
Ákimderdi oqytý baǵdarlamasy turaqty túrde jetildiriledi
Memlekettik qyzmet isteri agenttiginiń tóraǵasy Darhan Jazyqbaidyń aitýynsha, ákimderdi oqytý baǵdarlamasy turaqty túrde jetildirilip otyrady.
Oqý barysynda ákimder naqty jaǵdailardy modeldeý arqyly tájiribelik daǵdylardy qalyptastyrady. Kýrs sońynda árbir qatysýshy óz aýyldyq okrýginiń ekonomikalyq damýy boiynsha naqty baǵdarlamasyn ázirleidi. Bul ákimderdiń alǵan bilimderin tikelei tájiribege engizýine múmkindik beredi. Sondai-aq Memlekettik basqarý akademiiasy ákimderdiń qyzmetine monitoring júrgizip, oqytý nátijelerin saralap otyrady. Bul tásil baǵdarlamanyń tiimdiligin arttyryp, keleshekte ony odan ári jetildirýge múmkindik beredi.
«Bul joba – memlekettik qyzmetti jetildirý jolyndaǵy mańyzdy qadam. Ákimderdi turaqty túrde oqytý men kásibi turǵyda damytý mehanizmderin jetildirýdi jalǵastyramyz. Aldaǵy ýaqytta baǵdarlamany keńeitip, ony jańa baǵyttarmen tolyqtyryp odan ári aýdan ákimderin oqytýdy josparlap otyrmyz. Sondai-aq jas ákimder úshin mentorlyq baǵdarlamalardy damytý, tájiribe almasý alańdaryn qurý jáne halyqaralyq deńgeidegi úzdik tájiribelerdi engizý josparymyzda bar.
Bizdiń basty maqsatymyz – kásibi, bilikti jáne halyqqa qyzmet etetin ákimder korpýsyn qalyptastyrý. Memleket basshysynyń «Halyq únine qulaq asatyn memleket» tujyrymdamasyna sáikes, jergilikti atqarýshy organdar halyqtyń muń-muqtajyna jedel ári sapaly jaýap berýge qabiletti bolýy tiis», - dedi Agenttik tóraǵasy «Aiqyn» gazetine bergen suhbatynda.
