Ákim orynbasary qolarbaǵa otyryp, pandýstardy tekserdi
«Senim júrek» múgedekterdiń qoǵamdyq birlestiginiń jetekshilerimen birlese ótkizgen shara aiasynda bir top sheneýnik Túrkistan qalasyndaǵy qoǵamdyq oryndar men ortalyqtardy aralap, qoǵamdyq kólikke minip kórdi.
Atalǵan birlestik qoǵamda qamkóńil jandardyń teń múmkindikte ómir súrýine bastaityn «Qoljetimdi Qazaqstan» jobasyn usynǵan bolatyn. Jobany qoldap, múmkindigi shekteýli jandardyń jaǵdaiyn túsiný úshin qolarbaǵa otyrǵan bilik basshylary, qolaisyz pandýstardy aýystyrýdy tapsyrdy.
Múgedek jandardyń kez kelgen qoǵamdyq orynǵa barýyna kedergi keltirmeitindei jaǵdai jasaý kerektigin, jańadan salynyp jatqan ǵimarattarda pandýstar salyp, onyń biiktigin tiisti talapqa sai keltirýdi mindettedi.
