Qonaev qalasynyń ákimi Ashat Berdihanov atalǵan shaǵyn aýdan turǵyndarymen kóshpeli jiyn ótkizdi. Jinalysta gazdandyrý máselesi talqylandy, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Turǵyndardyń sózinshe, osydan birneshe jyl buryn aýdanǵa kógildir otyn qubyry tartylýy kerek bolǵan. Alaida, qurylys-jumystary áli bastalmaǵan. Shahar basshysy túitkildiń týyndaý negizine toqtaldy.
– Qonaev qalasy oblys ortalyǵy mártebesine ie bolǵan soń, arnaiy joba jasalyp, Keshendi damý jospary bekitildi. Soǵan sáikes, infraqurylymdy damytý maqsatynda 189 is-shara qolǵa alynady dep josparlanýda. Onyń ishinde, kógildir otynmen qamtý máselesi de bar, – dedi Ashat Berdihanov.
Ákimniń málimetinshe, jalpy shahardaǵy nysandardyń kógildir otynǵa qosylý úlesi 34 paiyzdy quraidy. Biyl Arna, Raýan, 12A, 12V shaǵyn aýdandaryna gaz qubyryn júrgizý úshin jobalyq-smetalyq qujaty ázirlenip jatyr. Memlekettik saraptamanyń oń qorytyndysyn alǵannan keiin, qurylys-montaj jumystaryna biýdjettik ótinim berilip, tiisti jumystar atqarylmaq.
– Atalǵan jobada 3 avtomattandyrylǵan gaz taratý stantsiiasyn salý da qarastyrylǵan. Stantsiia jańadan boi kóteretin nysandar men turǵyn úilerge qysym jetkilikti bolýyna múmkindik beredi, – dedi shahar basshysy.
Sonymen qatar halyq kóshe jaryǵy, jol, it aýlaý máselesi týraly aitty. Ákim barlyq problemalardyń nazarǵa alynatynyn jetkizdi.
Aita keteiik, 25 maýsym kúni saǵat 11.00-de qala ákimi Vostochnyi, Gúlder, №8, 10, 12, 12A-B, Ásem-tas, Arna, Qarlyǵash shaǵyn aýdandarynyń turǵyndarymen Mádeniet úiinde kezdesý ótkizedi.
