قونايەۆ قالاسىنىڭ اكىمى اسحات بەردىحانوۆ اتالعان شاعىن اۋدان تۇرعىندارىمەن كوشپەلى جيىن وتكىزدى. جينالىستا گازداندىرۋ ماسەلەسى تالقىلاندى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇرعىنداردىڭ سوزىنشە، وسىدان بىرنەشە جىل بۇرىن اۋدانعا كوگىلدىر وتىن قۇبىرى تارتىلۋى كەرەك بولعان. الايدا، قۇرىلىس-جۇمىستارى ءالى باستالماعان. شاھار باسشىسى تۇيتكىلدىڭ تۋىنداۋ نەگىزىنە توقتالدى.
– قونايەۆ قالاسى وبلىس ورتالىعى مارتەبەسىنە يە بولعان سوڭ، ارنايى جوبا جاسالىپ، كەشەندى دامۋ جوسپارى بەكىتىلدى. سوعان سايكەس، ينفراقۇرىلىمدى دامىتۋ ماقساتىندا 189 ءىس-شارا قولعا الىنادى دەپ جوسپارلانۋدا. ونىڭ ىشىندە، كوگىلدىر وتىنمەن قامتۋ ماسەلەسى دە بار، – دەدى اسحات بەردىحانوۆ.
اكىمنىڭ مالىمەتىنشە، جالپى شاھارداعى نىسانداردىڭ كوگىلدىر وتىنعا قوسىلۋ ۇلەسى 34 پايىزدى قۇرايدى. بيىل ارنا، راۋان، 12ا، 12ۆ شاعىن اۋداندارىنا گاز قۇبىرىن جۇرگىزۋ ءۇشىن جوبالىق-سمەتالىق قۇجاتى ازىرلەنىپ جاتىر. مەملەكەتتىك ساراپتامانىڭ وڭ قورىتىندىسىن العاننان كەيىن، قۇرىلىس-مونتاج جۇمىستارىنا بيۋدجەتتىك ءوتىنىم بەرىلىپ، ءتيىستى جۇمىستار اتقارىلماق.
– اتالعان جوبادا 3 اۆتوماتتاندىرىلعان گاز تاراتۋ ستانسياسىن سالۋ دا قاراستىرىلعان. ستانسيا جاڭادان بوي كوتەرەتىن نىساندار مەن تۇرعىن ۇيلەرگە قىسىم جەتكىلىكتى بولۋىنا مۇمكىندىك بەرەدى، – دەدى شاھار باسشىسى.
سونىمەن قاتار حالىق كوشە جارىعى، جول، يت اۋلاۋ ماسەلەسى تۋرالى ايتتى. اكىم بارلىق پروبلەمالاردىڭ نازارعا الىناتىنىن جەتكىزدى.
ايتا كەتەيىك، 25 ماۋسىم كۇنى ساعات 11.00-دە قالا اكىمى ۆوستوچنىي، گۇلدەر، №8، 10، 12، 12ا-ب، اسەم-تاس، ارنا، قارلىعاش شاعىن اۋداندارىنىڭ تۇرعىندارىمەن مادەنيەت ۇيىندە كەزدەسۋ وتكىزەدى.
