Májilis depýtaty Baqytjan Bazarbek jalǵan memlekettik nómir paidalanǵandardy qylmystyq jaýapkershilikke tartýdy usyndy, dep habarlaidy dalanews.kz.
Depýtattyń aitýynsha, jalǵan nómir paidalaný elde jappai qubylysqa ainalǵan jáne onyń saldary aýyr bolyp otyr.
«Osynyń kesirinen óte kóp adam zardap shegedi. Tergeý barysynda jol apatyn jasaǵan adamnyń jalǵan memlekettik nómir paidalanǵany anyqtalatyn jaǵdailar óte kóp», - dedi Bazarbek Májilis otyrysynda.
Ol mundai faktiler tek Almatyda emes, eldiń basqa óńirlerinde de tirkelip jatqanyn aitty.
«Óte uzaq ýaqyt boiy kóptegen adamdar, sonyń ishinde aýqatty azamattar men olardyń balalary jalǵan nómir paidalanyp júr. Sonyń saldarynan qarapaiym azamattar zardap shegedi, al biýdjet qomaqty qarjydan qaǵylady», - dedi depýtat.
Májilismen qazirgi zańnama bul máseleni tolyq qamtymaitynyn atap ótti.
«Qylmystyq kodekstiń jol qozǵalysy erejelerin buzýǵa qatysty 345–351-baptary bul qatynastardy rettemeidi. Al 386-bap tek memlekettik nómirlerdi qoldan jasaý jáne satqany úshin jaýapkershilikti qarastyrady», - dedi ol.
Depýtattyń sózinshe, qazir jalǵan nómir paidalaný ákimshilik quqyqbuzýshylyq retinde qaralady.
«Ákimshilik quqyqbuzýshylyq týraly kodekstiń 590-baby boiynsha adamǵa 15 AEK kóleminde aiyppul salynady. Bul ne degen sóz? Aiyppulyn tóleidi de, kete beredi. Al mundai jaǵdailardan adamdar qaza taýyp jatyr», - dedi Bazarbek.
Qaitalanǵan jaǵdaida 20 AEK aiyppul nemese bir jylǵa júrgizýshi kýáliginen aiyrý jazasy qarastyrylǵan.
«Múmkin bul quqyqbuzýshylyqty ákimshilik emes, qylmystyq jaýapkershilik sanatyna aýystyratyn ýaqyt kelgen shyǵar?» - dedi depýtat.
Ishki ister ministriniń orynbasary Sanjar Ádilov depýtat kótergen máseleniń ózekti ekenin moiyndady.
«Shynynda da, bul másele ózekti. Kóp jaǵdaida jalǵan memlekettik nómirlerdi kúdiktiler men qylmystyq elementter múliktik quqyqbuzýshylyqtar jasaý kezinde paidalanady», - dedi vitse-ministr.
Onyń aitýynsha, mundai faktiler jol-kólik oqiǵalarynda da kezdesedi.
«Jol apattary kezinde jalǵan nómir paidalaný faktileri bar. Qazir nómirdi qoldan jasaǵany úshin qylmystyq jaýapkershilik kózdelgen, alaida ony paidalaný máselesi qosymsha qaraýdy talap etedi», - dedi Ádilov.
Vitse-ministr depýtattyń usynysy qaralatynyn aitty.
«Sizdiń usynysyńyz jumysqa qabyldandy. Qylmystyq zańnamany qaita qaraý aiasynda biz qazirdiń ózinde zańger-ǵalymdarmen jáne memlekettik organdarmen jumysty bastadyq. Tiisti ózgerister birlesip pysyqtalady», - dedi Sanjar Ádilov.
