Qazaq eli qai kezde de memlekettik muratyn kózdegen el. Tarihi taǵdyrymyzdy paraqtasaq, ult retinde qalyptasý jolymyzdyń qily bolǵanyn, qashan da sol jolda halqymyzdyń bolashaqty kózdegen igi isterin baiqaimyz. Arysy alys ketpei-aq, Altyn orda dáýiri men berisi Alash avtonomiiasyn qurý kezeńderindegi ulttyq, ádildik ustanymdary halqymyzdyń órkeniet keńistiginen de habar beredi. Bizdiń ult retindegi ózindik bet-beinemizdi tek ótken ǵasyrdyń Táýelsizdik ýaqytymen ólsheýimizdiń de negizdemesi baryn tarihymyzdan túsinip otyrmyz.
Óz shekarasy men memlekettigi bar ulttardyń órkendeý printsipteri qashan da basqarý isine halyqtyń tikelei aralasýymen ótken ǵasyrlarda batyr, bi, sheshender institýty arqyly júzege assa, búginde azamattyq qoǵam ókilderi arqyly atqarylatyny anyq.
Qazirgi jańa Qazaqstanda úkimettik emes uiymdardyń saiasi, áleýmettik ómirdegi ózgeristerge bastaityn áleýetteri azamattardyń belsendiligine táýeldi. Osy jolda «Ádildik jáne Órkendeý» qoǵamdyq qory quryldy. Elimizdiń barlyq oblystarynan qoǵamǵa tanymal, belsendi tulǵalar ózderi bastamashy bolyp, Úndeýin jariialady.
Bul 2024 jyldyń aqpan aiynda Astana qalasynda qordyń aimaqtyq ókildikteri basshylarynyń basqosýynda jariialanyp, qol qoiýlarymen rásimdeldi.
Halqymyzdyń áleýmettik, ekonomikalyq jaǵdaiyna alańdap, máselelerimizdi syndarly jol arqyly sheshýge den qoiǵan sanaly azamattar «jeke júrip jetistikke jetý emes, birigip ulttyń jaǵdaiyn jaqsartý» jolyn tańdady.
Basty maqsat - eńbek adamynyń quqyqtary qorǵalyp, óz elinde bai, baqytty ǵumyr keshýine múddeli qoǵam qalyptastyrý. Jasyratyny joq, qazirgi tańda halyq men bilik arasy alshaqtap ketti, adamdarda biliktiń árbir isine kúdikpen qaraityn senimsizdik paida boldy. Jemqorlyq barlyq salada jaiylǵany sonsha, adal jolmen eńbek etý degen uǵym joǵaldy desek bolǵandai. Sondyqtan azamattyq qoǵam belsendi, konstýktivti bola otyryp, óz talaptaryna nazar aýdartyp, durys sheshilýine múddeli bolǵanda qoǵam ózgeredi dep bilemiz.
Alǵashqy nátijemiz - Astana qalasynda «Jumysshylardyń óndiristegi eńbek qaýipsizdigin qamtamasyz etý» jóninde talqylaý ótip, usynystar úkimetke joldandy. Sondai-aq, «Ádildik jáne Órkendeý» respýblikalyq qoǵamdyq qorynyń belsendileri qoǵamda qordalanǵan mańyzdy máselelerdiń biri – «Mindetti áleýmettik meditsinalyq saqtandyrý jáne densaýlyq saqtaý salasyna qatysty problemalar» taqyrybynda sessiialyq talqylaý da uiymdastyrdy.
Burynǵy Densaýlyq saqtaý ministri aýyssa da, sheshile qoimaǵan MÁMS máselesinde qandai suraqtar oń sheshimin taba almady, jańa ministrdiń aldynda sheshetin qandai saýal bar? Basqa da problemalar boiynsha qyzý talqylaýlar ótti. Jiynǵa Densaýlyq saqtaý ministrligi ókili, MÁMS qorynyń tóraǵa orynbasary, dárigerler, densaýlyq salasy boiynsha táýelsiz ekspertter jáne Qordyń belsendileri qatysty. Talqylaý sońynda qorytyndy qujatta usynystar joldandy.
Qordyń belsendileri elimizde oryn alǵan sý tasqynynan zardap shekken aimaqtarǵa alǵashqylardyń biri bolyp gýmanitarlyq kómekter jiberdi. Aldaǵy qalpyna keltirý jumystary boiynsha da ortalyq shtab qor tarapynan úles qosý mehanizmderin jasaýda.
«Ádildik jáne Órkendeý» qoǵamdyq qory - elimizdegi eńbek adamdarynyń quqyǵyn qorǵaityn, «adal eńbek» kýltin dáriptep, qoǵamda sondai adamdar arqyly jegi qurttai bolǵan jemqorlyq siiaqty ziiandy minezden qutylý joldaryna jumylatyn belsendiler toby.
Eńbek adamdary: óndiris jumysshylary, sharýalar, maqtashy, agronom, ustaz, dáriger t.b.qyzmet kórsetý salalary mamandarynyń qyzmet etip, órkendeýine kedergi óńirlik máselelerdiń basyn biriktirip, sheshý joldaryn da kórsetip, úkimettik, quzyrly uiymdarmen birlese nátijege jetý - basty maqsatymyz. Qordyń qoǵamdyq qabyldaýlary da turaqty jumys istep tur.
Atap aitqanda, qańtar aiynan beri Túrkistan oblysy boiynsha 112 adam ókildik qabyldaýynda boldy. Tolǵandyrǵan máseleleri boiynsha quqyqtyq keńester berip, belsendi jaqtastarymyzben birlese usynystar daiyndaýdamyz.
«Ádildiktiń eki qainar kózi bar: eshkimge ziian shektirmeý jáne qoǵamǵa paida keltirý» printsipi - bizdiń tiregimiz. «Ádildik jáne Órkendeý» qoǵamdyq qorynyń ár aimaqtarǵa tán problemalar boiynsha ortaq jobalar negizinde nátijege jetý algoritmderimen jumystary jalǵasýda.
«Ádildik jáne Órkendeý» qoǵamdyq qorynynyń
Túrkistan oblysy ókildiginiń jetekshisi
Ádemaý Turdybaiqyzy Tolysbaeva
