Túrkistan qalasynda 1 mamyr – Qazaqstan halqynyń birligi kúni atalyp ótildi. Esimhan alańynda uiymdastyrylǵan merekelik shara «Adamzattyń bárin súi, baýyrym dep» atalatyn teatrlandyrylǵan qoiylymmen bastaldy. Birlik pen tatýlyqty ulyqtaityn meiramda oblys ákimi Ómirzaq Shókeev kópshilik qaýymdy merekemen quttyqtady.
– Qazaq halqynda «Birlik bolmai – tirlik bolmas» degen maqal bar. Táýelsizdigimiz tuǵyrly, eldigimiz máńgi bolýy úshin eń aldymen myqty tatýlyq jáne turaqtylyq kerek. Tuńǵysh Prezidentimiz, Elbasymyz Nursultan Nazarbaev eldiń yntymaǵyn nyǵaitý baǵytynda óte aýqymdy jumystar atqardy. Elbasy bastamasymen qurylǵan Qazaqstan halqy Assambleiasy búginde el birliginiń uiytqysy, rýhani qundylyqtardyń qainar kózine ainaldy. Qazaqta «Baǵalaǵanǵa baq qonady» degen qanatty sóz bar. Bizdiń baǵymyz da, barymyz da – Táýelsiz Qazaqstan! Azattyq kókten túse salǵan syi emes. Ol – babalardyń qanymen, erligimen kelgen uly baqyt. Kezinde Túrki eliniń uly qairatkeri Kúltegin «Tatý elge tynyshtyq pen toqshylyq násip» degen eken. Endeshe birlikti tý etip, Qazaqstandy, tuǵyrly Túrkistandy damytýǵa úles qosaiyq, aǵaiyn! Otbasylaryńyzǵa amandyq, bastamalaryńyzǵa sáttilik tileimin! Birliktiń merekesi qutty bolsyn! – dedi oblys ákimi Ó. Estaiuly.
«Birligi men tilegi bir elmiz» atty merekelik is-shara «Gúl mekenim –Túrkistan», «Qazaqstan» atty ándermen jalǵasyn tapty. «Birjan-Sara» operasynan úzindi aityldy. Al Túrkistan oblystyq Qazaqstan halqy Assambleiasy tóraǵasynyń orynbasary, aimaqtyq Iran birlestiginiń tóraǵasy Kapar-Pýr Nýrsbek Qurbanuly óziniń jyly lebizin bildirip, quttyqtaý sózin joldady. Sondai-aq, eldi birlikke úgitteitin urandy sózder aitylǵan merekede kópshilik qaýym án men kúige bólendi.
