Abaidyń 180 jyldyǵyna orai aqynnyń týǵan jeri – Abai aýdanynyń Jidebai qoryǵy aýmaǵyndaǵy «TauKum» etno aýyl kesheninde uiymdastyrylǵan búrkitshiler básekesinde elimizdiń 9 oblysy men 3 qalasynan 70-ke jýyq búrkit, 14 itelgi men 15 qarshyǵa óner kórsetti. Eki kúnge sozylǵan tartysty týrnir aiasynda qumai tazy jarysy da boldy, dep habarlaidy Dalanews.kz
Jarysqa qatysýshylar týrnirdiń joǵary deńgeide ótkenin atap ótti. Mysaly, Qaraǵandy oblysynan kelgen qatysýshy Temiráli Tólegenuly óz áserimen bólisip, uiymdastyrýshylarǵa rizashylyǵyn bildirdi.
«Biz búgin ótip jatqan «Abai Salbýryny – 2025» jarysyna Qaraǵandy oblysynan 5 búrkitshi bolyp keldik. Jalpy jarystyń uiymdastyrylý deńgeii óte joǵary. Sportshylarǵa barlyq jaǵdai jasalǵan. Ulttyq sportymyz dami bersin. Uiymdastyrýshylarǵa alǵysymdy bildiremin», – dedi Temiráli Tólegenuly.
Sondai-aq Jetisý oblysynan kelgen qusbegi Ázen Shaimardan ulttyq ónerdiń órkendep kele jatqanyn aitty.
«Tól ónerimiz endi burynǵa qaraǵanda edáýir joǵary deńgeide damydy. Alǵashqy kezderde 10–20 búrkitshi úlken aqsaqaldar ǵana bolǵan. Qazirgi jaǵdaida jastarymyz kóbeidi. Qazaqtyń tól óneri, tól murasy bolǵannan keiin búrkitshilik degen óte qasietti nárse», – dedi qusbegi.
Ulttyq qundylyqtarymyzdy ulyqtap, salt-dástúrlerimizdi dáripteýge arnalǵan sharanyń jabylý saltanatyna oblys ákimi, respýblikalyq qusbegilik federatsiiasynyń prezidenti Berik Ýáli qatysty. Shymkent qalasynyń mádeni kúnderi aiasynda oblysymyzǵa kelgen delegatsiia ókilderi de aimaq basshysymen birge saiystyń marapattaý rásiminde boldy.
«Memleket basshysy Qasym-Jomart Kemeluly Toqaev «Táýelsizdik bárinen qymbat» atty maqalasynda: «Ulttyq bolmysymyzdan, tól mádenietimiz ben salt-dástúrimizden ajyrap qalmaý – barlyq órkenietter midai aralasqan alasapyranda jutylyp ketpeýdiń birden bir kepili» – dep jahandaný kezeńinde jutylý qaýpinen saqtaityn eń basty qalqan ulttyq qundylyqtar men ozyq dástúrimiz ekenin airyqsha atap ótken bolatyn. Ulttyq sport túrleri men ulttyq oiyndar jas urpaqty ulttyq qundylyqtardy súiýge, otansúigishtik rýhpen tárbieleýde igi áserimen, tiimdi yqpalyn jasap kele jatqany belgili. «Abai salbýryny – 2025» respýblikalyq týrniri óz deńgeiinde uiymdastyrylyp, elimizdiń eń úzdik qusbegilerin bir alańǵa jinady. Búgin osy dodada erekshe óner kórsetken jeńimpazdar men júldegerlerdi shyn júrekten quttyqtaimyn. Qazaqstannyń qusbegilik federatsiiasyna, uiymdastyrýshylarǵa, tóreshilerge jáne arnaiy kelgen qurmetti qonaqtarǵa Abai oblysy atynan alǵys aitamyn. Sizderdiń eńbekterińiz ben qoldaýlaryńyz osy týrnirdiń joǵary deńgeide ótýine negiz boldy. Abai oblysynda ulttyq sport túrlerin damytý baǵytynda júieli jumys jalǵasýda. Qusbegilikke qyzyǵýshy jas býynnyń qatary artyp, osy saladaǵy tájiribeli mamandar sany kóbeiip keledi. Bul halqymyzdyń rýhani murasynyń bolashaqqa berik negizdelip, senimdi túrde jalǵasyn taýyp kele jatqanyn kórsetedi», - dedi oblys ákimi.
Búrkitshiler saiysynda astanalyq Erasyl Serikbek «Qarasholaq» atty qusymen 1 oryndy ielendi. Qarshyǵa básekesinde Jambyl oblysynan kelgen Berikbolsyn Babajan jeńimpaz atandy. Qustyń aty – «Qanjar». Itelgi jarysynda Babajan Baqdaýlet «Qarakóz» atty qusymen jeńiske jetti. «Qumai tazy» dodasynda Úrjar aýdanynyń qatysýshysy Rahat Aqyljanov top jardy.
Dástúrli ánshi, jyrshy, Qazaqstannyń eńbek sińirgen qairatkeri Aigúl Elshibaeva men QR mádeniet qairatkeri Ómirqul Ainiiazov óner kórsetip, ánnen shashý shashty.
Shara barysynda Japoniiada ótken HHV Sýrdlimpiada oiyndarynda dziýdodan qola medal ielengen Altynbek Kákitaevqa Abai aýdany turǵyndary atynan avtokólik, jattyqtyrýshysyna sertifikat tabys etildi.
