ابايدىڭ 180 جىلدىعىنا وراي اقىننىڭ تۋعان جەرى – اباي اۋدانىنىڭ جيدەباي قورىعى اۋماعىنداعى «TauKum» ەتنو اۋىل كەشەنىندە ۇيىمداستىرىلعان بۇركىتشىلەر باسەكەسىندە ەلىمىزدىڭ 9 وبلىسى مەن 3 قالاسىنان 70-كە جۋىق بۇركىت، 14 يتەلگى مەن 15 قارشىعا ونەر كورسەتتى. ەكى كۇنگە سوزىلعان تارتىستى تۋرنير اياسىندا قۇماي تازى جارىسى دا بولدى، دەپ حابارلايدى Dalanews.kz
جارىسقا قاتىسۋشىلار ءتۋرنيردىڭ جوعارى دەڭگەيدە وتكەنىن اتاپ ءوتتى. مىسالى، قاراعاندى وبلىسىنان كەلگەن قاتىسۋشى تەمىرالى تولەگەن ۇلى ءوز اسەرىمەن ءبولىسىپ، ۇيىمداستىرۋشىلارعا ريزاشىلىعىن ءبىلدىردى.
«ءبىز بۇگىن ءوتىپ جاتقان «اباي سالبۋرىنى – 2025» جارىسىنا قاراعاندى وبلىسىنان 5 بۇركىتشى بولىپ كەلدىك. جالپى جارىستىڭ ۇيىمداستىرىلۋ دەڭگەيى وتە جوعارى. سپورتشىلارعا بارلىق جاعداي جاسالعان. ۇلتتىق سپورتىمىز دامي بەرسىن. ۇيىمداستىرۋشىلارعا العىسىمدى بىلدىرەمىن»، – دەدى تەمىرالى تولەگەن ۇلى.
سونداي-اق جەتىسۋ وبلىسىنان كەلگەن قۇسبەگى ازەن شايماردان ۇلتتىق ونەردىڭ وركەندەپ كەلە جاتقانىن ايتتى.
«ءتول ونەرىمىز ەندى بۇرىنعا قاراعاندا ەداۋىر جوعارى دەڭگەيدە دامىدى. العاشقى كەزدەردە 10–20 بۇركىتشى ۇلكەن اقساقالدار عانا بولعان. قازىرگى جاعدايدا جاستارىمىز كوبەيدى. قازاقتىڭ ءتول ونەرى، ءتول مۇراسى بولعاننان كەيىن بۇركىتشىلىك دەگەن وتە قاسيەتتى نارسە»، – دەدى قۇسبەگى.
ۇلتتىق قۇندىلىقتارىمىزدى ۇلىقتاپ، سالت-داستۇرلەرىمىزدى دارىپتەۋگە ارنالعان شارانىڭ جابىلۋ سالتاناتىنا وبلىس اكىمى، رەسپۋبليكالىق قۇسبەگىلىك فەدەراسياسىنىڭ پرەزيدەنتى بەرىك ءۋالي قاتىستى. شىمكەنت قالاسىنىڭ مادەني كۇندەرى اياسىندا وبلىسىمىزعا كەلگەن دەلەگاسيا وكىلدەرى دە ايماق باسشىسىمەن بىرگە سايىستىڭ ماراپاتتاۋ راسىمىندە بولدى.
«مەملەكەت باسشىسى قاسىم-جومارت كەمەل ۇلى توقايەۆ «تاۋەلسىزدىك بارىنەن قىمبات» اتتى ماقالاسىندا: «ۇلتتىق بولمىسىمىزدان، ءتول مادەنيەتىمىز بەن سالت-داستۇرىمىزدەن اجىراپ قالماۋ – بارلىق وركەنيەتتەر ميداي ارالاسقان الاساپىراندا جۇتىلىپ كەتپەۋدىڭ بىردەن ءبىر كەپىلى» – دەپ جاھاندانۋ كەزەڭىندە جۇتىلۋ قاۋپىنەن ساقتايتىن ەڭ باستى قالقان ۇلتتىق قۇندىلىقتار مەن وزىق ءداستۇرىمىز ەكەنىن ايرىقشا اتاپ وتكەن بولاتىن. ۇلتتىق سپورت تۇرلەرى مەن ۇلتتىق ويىندار جاس ۇرپاقتى ۇلتتىق قۇندىلىقتاردى سۇيۋگە، وتانسۇيگىشتىك رۋحپەن تاربيەلەۋدە يگى اسەرىمەن، ءتيىمدى ىقپالىن جاساپ كەلە جاتقانى بەلگىلى. «اباي سالبۋرىنى – 2025» رەسپۋبليكالىق ءتۋرنيرى ءوز دەڭگەيىندە ۇيىمداستىرىلىپ، ەلىمىزدىڭ ەڭ ۇزدىك قۇسبەگىلەرىن ءبىر الاڭعا جينادى. بۇگىن وسى دودادا ەرەكشە ونەر كورسەتكەن جەڭىمپازدار مەن جۇلدەگەرلەردى شىن جۇرەكتەن قۇتتىقتايمىن. قازاقستاننىڭ قۇسبەگىلىك فەدەراسياسىنا، ۇيىمداستىرۋشىلارعا، تورەشىلەرگە جانە ارنايى كەلگەن قۇرمەتتى قوناقتارعا اباي وبلىسى اتىنان العىس ايتامىن. سىزدەردىڭ ەڭبەكتەرىڭىز بەن قولداۋلارىڭىز وسى ءتۋرنيردىڭ جوعارى دەڭگەيدە وتۋىنە نەگىز بولدى. اباي وبلىسىندا ۇلتتىق سپورت تۇرلەرىن دامىتۋ باعىتىندا جۇيەلى جۇمىس جالعاسۋدا. قۇسبەگىلىككە قىزىعۋشى جاس بۋىننىڭ قاتارى ارتىپ، وسى سالاداعى تاجىريبەلى ماماندار سانى كوبەيىپ كەلەدى. بۇل حالقىمىزدىڭ رۋحاني مۇراسىنىڭ بولاشاققا بەرىك نەگىزدەلىپ، سەنىمدى تۇردە جالعاسىن تاۋىپ كەلە جاتقانىن كورسەتەدى»، - دەدى وبلىس اكىمى.
بۇركىتشىلەر سايىسىندا استانالىق ەراسىل سەرىكبەك «قاراشولاق» اتتى قۇسىمەن 1 ورىندى يەلەندى. قارشىعا باسەكەسىندە جامبىل وبلىسىنان كەلگەن بەرىكبولسىن باباجان جەڭىمپاز اتاندى. قۇستىڭ اتى – «قانجار». يتەلگى جارىسىندا باباجان باقداۋلەت «قاراكوز» اتتى قۇسىمەن جەڭىسكە جەتتى. «قۇماي تازى» دوداسىندا ءۇرجار اۋدانىنىڭ قاتىسۋشىسى راحات اقىلجانوۆ توپ جاردى.
ءداستۇرلى ءانشى، جىرشى، قازاقستاننىڭ ەڭبەك سىڭىرگەن قايراتكەرى ايگۇل ەلشىبايەۆا مەن ق ر مادەنيەت قايراتكەرى ءومىرقۇل اينيازوۆ ونەر كورسەتىپ، اننەن شاشۋ شاشتى.
شارا بارىسىندا جاپونيادا وتكەن ححV سۋردليمپيادا ويىندارىندا دزيۋدودان قولا مەدال يەلەنگەن التىنبەك كاكىتايەۆقا اباي اۋدانى تۇرعىندارى اتىنان اۆتوكولىك، جاتتىقتىرۋشىسىنا سەرتيفيكات تابىس ەتىلدى.
