Shyǵys Qazaqstan oblysynyń ákimshilik-aýmaqtyq qurylymyn ózgertý barysynda Tarbaǵatai aýdanynyń quramynan Aqsýat jáne Tarbaǵatai aýdandaryn, al Kókpekti aýdanynyń quramynan Samar jáne Kókpekti aýdandaryn bólý jolymen jańa aýdandar qurý týraly sheshim qabyldanyp otyr.
Aldaǵy ýaqytta Tarbaǵatai aýdanynyń ákimshilik ortalyǵy – Aqjar aýyly, Aqsýat aýdanynyń ákimshilik ortalyǵy – Aqsýat aýyly, Samar aýdanynyń ákimshilik ortalyǵy – Samar aýyly, Kókpekti aýdanynyń ákimshilik ortalyǵy – Kókpekti aýyly bolyp ózgermek.
Territoriialyq bólinisterge sáikes Shyǵys Qazaqstan oblysynyń aýmaǵy 97,8 myń sharshy metr bolady. Quramyna 9 aýdan jáne 2 qala kiredi.
Abai oblysynyń aýmaǵy 185,5 myń sharshy metrdi quraidy, al quramyna 8 aýdan jáne 2 qala kiredi.
Atap aitqanda, ShQO aýmaǵynda – Óskemen, Ridder qalalary, Glýbokoe, Zaisan, Katonqaraǵai, Kúrshim, Samar, Tarbaǵatai, Ulan, Shemonaiha, Altai aýdandary qalady.
Abai oblysyna – Semei, Kýrchatov qalalary, Abai, Aiagóz, Aqsýat, Besqaraǵai, Borodýliha, Jarma, Kókpekti, Úrjar aýdandary qaraidy. Jańadan qurylatyn oblys halqynyń sany – 638,3 myń adamdy qurasa, Shyǵys Qazaqstan oblysynyń halqy – 717,6 myń bolmaq, bul oblys halqynyń 53 paiyzy.
Sessiiada jańadan qurylatyn Abai oblysyna qatysty aimaq basshysy Danial Ahmetov óziniń pikirin bildirdi.
– Semei óńirine shamamen 354 mlrd teńge shamasynda investitsiia salynǵanyn atap ótkim keledi. Turǵyn úi qurylysy, injenerlik-kommýnaldyq jáne jol-kólik infraqurylymy, bilim berý jáne densaýlyq saqtaý salalarynda birqatar iri jobalar iske asyryldy. Ózekti ekologiialyq máseleni sheshken diýkerdi jóndeý, eldegi alǵashqy Radionýklidtik terapiia bólimshesi bar iadrolyq meditsina ortalyǵyn iske qosý, Qaraǵaily jańa shaǵyn aýdanyn, kóp beiindi sporttyq-mádeni keshenin salý jáne áýejaidy qaita jańartý taǵy basqalary tabysty mysal bola alady. Jyldar boiy máseleleri qordalanǵan Semei qalasy búginde tanymastai ózgerdi. Osynyń bári Sizder men bizderdiń etken eńbekterimizdiń arqasynda múmkin boldy. Shyǵys Qazaqstan oblysynyń, sondai-aq qazirgi Abai óńiriniń órkendeýine qomaqty úles qosqan árbir janǵa alǵys aitamyn, – dedi oblys basshysy.
Sondai-aq, Alashtyń rýhani ordasy Semeidi damytýdyń keshendi josparyn júzege asyrýǵa 260 mlrd teńge qarastyrylǵan, aldaǵy tórt jylǵa birqatar iri jáne mańyzdy jobalarǵa JSQ da daiyn.
Búginde jańadan qurylǵan oblystyń myqty qarjylyq negizin ónerkásiptik alyptar – Aqtoǵai ken-baiytý kombinaty, Baqyrshyq taý-ken óndirý kásiporyndary, sondai-aq orta biznes obektileri óńirdiń ekonomikasyna qan júgirtpek.
Sessiianyń qorytyndysynda birlesken qaýly men sheshim Úkimetke joldandy.
