Búgin Semei qalasynyń Qaraǵaily yqsham aýdanynda 1200 oryndyq mektep paidalanýǵa berildi, dep habarlaidy Dalanews.kz
«Jaily mektep» ulttyq jobasy aiasynda salynǵan №51 bilim ordasynyń ashylý saltanatyna oblys ákimi Berik Ýáli, «Samuryq Qazyna konstrakshn» AQ basqarma tóraǵasy Máýlen Aimanbetov, bilim salasynyń ardagerleri, aqsaqaldar jáne ata-analar qatysty.
Jańa da jaily mektepte oqýshylardyń jan-jaqty bilim alýyna barlyq jaǵdai jasalǵan. Zamanaýi jabdyqtarmen tolyq qamtamasyz etilgen bilim ordasynda 65 synyp-komplekt bar. Onyń ishinde eki mektepaldy daiarlyq synyby jumys isteidi. Mektepte 100-ge jýyq pedagog eńbek etedi.
Jańa mektep 33 oqý kabinetimen qatar, úsh informatika kabineti, robototehnika synyby, STEM zerthanasy, grafika jáne modeldeý, mýltimedia, vizýaldy óner pándik kabinetterimen jabdyqtalǵan. Sondai-aq «úi mádenieti» men «tamaqtaný mádenieti» sheberhanalary qarastyrylǵan. 250 oryndyq akt zaly, 338 oryndyq ashana, resýrstyq ortalyq pen kitaphana, eki sport zaly, eki fýtbol alańy oqýshylardyń shyǵarmashylyq, intellektýaldyq, sporttyq turǵydan damýyna múmkindik beredi.
Aimaq basshysy jańa mekteptiń ashylý saltanatynda sóilegen quttyqtaý sózinde bilim ordasynyń Qaraǵaily yqsham aýdany úshin ǵana emes, qala turǵyndary úshin mańyzy zor ekenin atap ótti.
«Ózderińiz jaqsy bilesizder, Memleket basshysy óz Joldaýynda «Árbir oqýshynyń bilim alyp, jan-jaqty damýy úshin qolaily jaǵdai jasalýǵa tiis» dep «Jaily mektep» ulttyq jobasyn júzege asyrýdy tapsyrǵan bolatyn. Búgin, mine, osy joba aiasynda Abai oblysyndaǵy alǵashqy mektepti paidalanýǵa berip jatyrmyz. Oqýshylar men ata-analar bul kúndi asyǵa kútti. Biz de ákimdik tarapynan mektepterdiń tezirek, tórtinshi toqsanda paidalanýǵa berilýine kúsh saldyq. Buǵan deiin qalanyń basqa mektepterine qatynap oqyǵan oqýshylarǵa tamasha tartý jasadyq dep oilaimyn. Bilim ordasynyń barlyq ustazdary men oqýshylaryna úzdik jetistikter men jarqyn bolashaq tileimin. Jańa da jaily mektep qutty bolsyn»,- dedi oblys ákimi.
Aimaq basshysy oblysta «Jaily mektep» ulttyq jobasy aiasynda 5 mektep salý josparlanǵanyn, búgin Besqaraǵai aýdanynda 300 oryndyq mektep ashylatynyn, jańa oqý jylynda Semei qalasy men Aiagóz qalasynda eki bilim ordasy paidalanýǵa beriletinin aitty.
Oblys ákimi ashylý saltanatynan soń qonaqtarmen birge mekteptiń kabinetteri, kitaphanasy, zerthanalaryn jáne sheberhanalaryn aralap, sport zaldary men fýtbol alańyn kórdi. Oqýshylarmen, muǵalimdermen pikirlesip, jańa mekteptegi jańa qadamdaryna sáttilik tiledi.
Oqýshylardyń ata-analary jańa yqsham aýdannyń ekinshi mekteppen tolyqqanyna rizashylyqtaryn jetkizdi.
«Jańa mekteptiń salynýy Qaraǵaily turǵyndarynyń kópten bergi armany edi. Yqsham aýdannyń ata-analary balalaryn qalanyń túkpir-túkpirindegi mektepterge túrli kólikpen tasyp, qinalyp júrýshi edi. Óitkeni, Qaraǵailyda jalǵyz ǵana mektep boldy. Búgin osy másele sheshimin taýyp, qýanyshqa bólenip otyrmyz. Jańa mektepte oqýshylarǵa ne kerektiń bári bar. Barlyq jaǵdai jasalǵan. Osyndai mektep salyp bergeni úshin Prezidentimizge alǵys aitamyz», - dedi Qaraǵaily yqsham aýdanynyń turǵyny Baqtyly Qanafina.
